काठमाडाैं– नेपाली कांग्रेसमा क्रियाशील सदस्यताको सर्वाधिक विवाद प्रदेश २ मा छ। विवादकै कारण हालसम्म प्रदेश २ का कुनै पनि जिल्लामा क्रियाशील सदस्यताको सूची प्रकाशित हुन सकेको छैन।
रौतहटका नेता कार्यकर्ता केन्द्रीय कार्यालयमा अहिले पनि धर्नामा छन्। धनुषा र सप्तरीका नेता÷कार्यकर्ता धर्ना केही दिन अघिसम्म जारी थियो। सप्तरीको प्रतिनिधि सभा क्षेत्र १, २ र ४ मा नयाँ क्रियाशील सदस्यता स्थगन गरिएको छ। साथै, बाराको १ र ४ क्षेत्रमा पनि नयाँ क्रियाशीललाई रोकिएको छ। विवाद टुंगाएको भनिएका कतिपय स्थानमा १३औं महाधिवेशनका क्रियाशीललाई मान्यता दिने गरी निर्णय गरिएको छ।
क्रियाशील सदस्यको सूची प्रकाशित गर्न पार्टीले विलम्ब गरे पनि जिल्ला नेतृत्वको आकांक्षी भने अघि सरिसकेका छन्। प्रदेश २ मा तुलनात्मक रुपमा संस्थापन पक्ष बलियो छ। संस्थापन पक्षबाटै सभापतिमा विमलेन्द्र निधि प्रत्यासी हुनाले उक्त समूहमा लागेका पनि विभाजित हुने भएका छन्। जिल्ला नेतृत्वको तय गर्दा संस्थानपइतरले निधि पक्षसँग समीकरण बनाउने सम्भावना बढी छ।
प्रदेश २ का जिल्लामा निधिको पकड बलियो रहेको भनिए पनि उनले सम्पर्क कार्यालय सञ्चालन गर्दा केही जिल्ला सभापति मात्रै देखिए। निधिलाई प्रदेश २ मा बलियो हुन नदिन सभापति शेरबहादुर देउवा नै लागेको निधि पक्षको बुझाइ छ। कुन पक्षमा खुल्न नसके पनि जिल्ला नेताहरूले सभापतिको लाइनमा अघि बढेका छन्।
जिल्ला सभापतिका आकांक्षीहरूः
सप्तरी
संस्थापनइतरबाट हालका पार्टी सचिव रामकुमार यादवलाई जिल्ला सभापति बन्ने लाइनमा छन्। उनी डा शेखर कोइराला निकट रहेको बताइन्छ। केन्द्रीय सदस्य तेजुलाल चौधरीलाई वरिष्ठ नेता रामचन्द्र पौडेलले जिल्ला सभापति बनाउन रुचि देखाएका छन्। सोही समूहबाट रामदेव साह र बद्रिनारायण यादव पनि आकांक्षी छन्। चारमध्ये एक जना संस्थापनइतरबाट सभापतिको प्रत्यासी बन्ने भएका छन्।
देउवाबाट शत्रुघन यादव सभापतिका आकांक्षी हुन्। उनी जिल्ला सचिव छन्। क्षेत्रीय सभापति नारायण चौधरी शेखर, महासमिति सदस्य रामदेव साह, बद्री महात्मन् र रामु यादव पनि सभापतिका आकांक्षी हुन्।
जिल्ला सभापति दिनेश यादव जुन पक्षमा उभिए त्यही समूहले जित निकाल्ने सम्भावना छ। निधिले सम्पर्क कार्यालय आरम्भ गर्दा उनी पनि पुगेका थिए।
सिरहा
हालका सभापति रामचन्द्र यादवलाई दोहोर्याउने पक्षमा केन्द्रीय नेता चित्रलेखा यादव छिन्। संस्थापन पक्षबाटै उपेन्द्र यादव पनि सभापतिको दौडमा छन्।
पौडेल पक्षबाट सुभासचन्द्र यादव आकांक्षी छन्। उनी पार्टीको केन्द्रीय कोषाध्यक्ष सीतादेवी यादवका पुत्र हुन्। चौधरी समुदायको मत ल्याउनका लागि बलियो उम्मेद्वारको नाममा रामसुन्दर चौधरीको नाम पनि चर्चामा छ। संस्थापन इतरबाटै नरेशकुमार यादव र जिल्ला कार्यसमिति सदस्य रामकिशोर यादव पनि सभापतिको चर्चामा छन्। नरेशकुमार यादव प्रदेश २ का सांसद हुन्।
देउवा पक्षबाट उपेन्द्रकुमार यादव र पञ्चलाल महतो सभापतिको आकांक्षी हुन्। यादव र महतो जिल्ला सचिव हुन्। उक्त खेमाबाट महासमिति सदस्य रामसुन्दर चौधरी सभापतिको दौडमा छन्।
धनुषा
उपसभापति विमलेन्द्र निधिको गृह जिल्लासमेत रहेकाले जिल्ला सभापतिको चयनमा उनी हाबी हुनेछन्। महेश शंकर गिरी दोहोर्याउने पक्षमा संस्थापन पक्ष छ। उनी उपसभापति निधिप्रति ढल्किएका छन्। संस्थापनइतरमा रहेर हाल संस्थापनमा लागेका सन्तोष यादव उक्त पदको आकांक्षी हुन्। जिल्ला सचिव विश्वेश्वर यादव र क्षिरेश्वरनाथ नगरपालिकाका प्रमुख योगी पञ्जियारको सभापतिको उम्मेद्वारीमा चर्चा छ। यादव र पञ्जियार दुबै निधि निकट हुन्।
संस्थापनइतरका लागि उम्मेद्वारका आकांक्षी कम छन्। संस्थापन पक्षले दिनेशप्रसाद प्रसौलालाई अघि बढाउने सम्भावना छ। उनी सभासद् थिए।
महोत्तरी
संस्थापनइतरले नागेश्वर यादव, चिरञ्जीवी हमाल र बजरंग नेपाली मध्येबाट एकलाई सभापतिको प्रत्यासी बनाउने भएको छ। यादव गत निर्वाचनमा पराजित हुन्। हमाल जिल्लाका पुराना नेता हुन्। विगतमा खुमबहादुर खड्काको पक्षमा रहेका उनी हाल शेखर कोइराला निकट मानिन्छन्।
सुशील यादव देउवा पक्षबाट सभापतिको उम्मेद्वार बन्ने भएका छन्। वर्तमान सभापति महेन्द्रकुमार रायको झुकाव जुन समूहमा देखिन्छ, त्यही पक्षले सभापति जित्ने आकलन गरिएको छ।
सर्लाही
संस्थापनइतरबाट लक्ष्मण राय सभापतिबाट भिड्नका लागि अघि सरिसकेका छन्। महामन्त्री शशांक कोइराला निकट उनी गत महाधिवेशनमा जिल्ला सभापतिमा पराजित भएका थिए। देउवा पक्षले हालका सभापति नागेन्द्र रायलाई दोहोर्याउन चाहेको छ।
बारा
राम अयोध्या यादव संस्थापन इतरबाट सभापतिका प्रमुख दाबेदार हुन्। उनी पूर्व सांसदसमेत हुन्। उनी नेता शेखर कोइराला निकट छन्। पूर्वजिविस सभापति राजेन्द्र यादव वरिष्ठ नेता पौडेलको साथले सभापतिको दौडमा छन्।
जिल्ला सभापति जयचन्द्र चौरसियालाई देउवा पक्षले दोहोर्याउन खोजेको छ। पार्टीको तेस्रो समूहका नेता उमाकान्त चौधरीले रामानन्दन यादवलाई बोकेका छन्। हालका पार्टी सचिव रहेका मनोज भट्ट पनि आकांक्षी छन्।
पर्सा
१३औं महाधिवेशनमा केन्द्रीय नेता रमेश रिजालले जिल्ला अधिवेशनमा हाबी भएका थिए। देउवाको रुचि बाहिरबाट उनले जिल्लामा राजनीति गरेको आरोप लागेको थियो। अजय द्विवेदीलाई सभापतिमा सघाएर संस्थापनइतरले सचिव पद लिएको थियो। निधिले सभापतिमा उम्मेद्वारी दिएकाले संस्थापनइतर उनीसँगको समीकरण बनाउने पक्षमा छ।
देउवा निकट जिल्ला नेता जनार्दनसिंह क्षेत्रीले सभापति बन्ने इच्छा देखाएका छन्। जिल्ला नेता रामनारायण कुर्मी र राजेन्द्रबहादुर अमात्य पनि सभापतिका आकांक्षी हुन्।
रौतहट
मोहम्मद अफताब आलम जेलमा नपरेको भए रौतहटमा संस्थापनइतरका सभापतिका बलियो उम्मेद्वार उनै हुने थिए। संस्थापनइतरबाट शेख ओकिल, रामस्नेही यादव र देवराज तिमल्सिना सभापतिका लाइनमा छन्।
सुनील यादव संस्थापन पक्षका बलियो आकांक्षी हुन्। रौतहटको राजनीतिमा उपसभापति निधि हाबी हुने सम्भावना देखिन्छ। उनी निधिको पक्षमा लागे भने जित निकाल्ने आकलन गरिएको छ। संस्थापनबाट नै जितेन्द्र यादव पनि सभापतिको दौडमा छन्। जिल्ला सभापति कृष्णप्रसाद यादव पनि यहाँको राजनीतिमा हाबी हुनेछन्।
रौतहटमा जातीय तथा क्षेत्रीय राजनीतिले पनि प्रभाव पार्दछ। मधेस र पहाडी समुदायको उम्मेद्वारले पनि फरक पार्दछन्। चन्द्रनिगाहापुर क्षेत्रमा पहाडी समुदाय छ भने जिल्लामा मुस्लिम समुदायको पनि उल्लेख्य संख्या छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
