काठमाडौं- राष्ट्रिय टोलीको प्रशिक्षण सम्हालिसकेका बालगोपाल महर्जनलाई नेपाली राष्ट्रिय यू-२३ फुटबल टोलीको प्रशिक्षकको जिम्मेवारी दिइएको छ।
अखिल नेपाल फुटबल संघ (एन्फा)ले सोमबार नेपालले अक्टोबर अन्तिम साता ताजिकिस्तानमा आयोजना हुने एएफसी यू-२३ एसियन कपको छनोट प्रतियोगिताका लागि उनलाई प्रशिक्षकको जिम्मेवारी दिइएको जनाएको हो।
महर्जनले यसअघि पनि यू-२३ छनोटमा टोलीको प्रशिक्षण सम्हालेका थिए। उनकै प्रशिक्षणमा नेपालले चैतमा थ्री नेसन्स कपको उपाधि जितेको थियो। महर्जनसँगै रोजित केसी सहायक प्रशिक्षक र ललित चन्द गोलरक्षक प्रशिक्षकमा नियुक्त गरिएको छ।
नेपालले छनोटअन्तर्गत २३ अक्टोबरमा इरान, २८ अक्टोबरमा ताजिकिस्तान र अन्तिम खेलमा ३१ अक्टोबरमा लेबनानको सामना गर्नेछ।प्रत्यक समूहको शीर्ष टोलीले सिधै अन्तिम प्रतियोगितामा स्थान बनाउने छन्। त्यस्तै, दोस्रो स्थान हासिल गर्ने शीर्ष ४ टोली पनि छनोट हुनेछन्।
उज्वेकिस्तान आयोजकको रुपमा स्वत: छनोट भएको प्रतियोगितामा १६ टिम भिड्नेछन्। छनोट प्रतियोगितामा आगामी अक्टोबर २३ देखि २१ सम्म हुने तय छ।
नेपालले पाँचौ पटक यू-२३ छनोट खेल्न लागेको हो। नेपालले हालसम्म एएफसीको यू-२३ एसियन कप प्रतियोगिताको छनोट चरण पार गर्न सकेको छैन।
पछिल्लो दुई संस्करणमा नेपाल जितविहिन हुँदै छनोटबाट घर फर्केको थियो। दुवै संस्करणमा नेपालले गोल गर्न सकेको थिएन। इराक, जापान, उज्बेकिस्तान र दक्षिण कोरियाले १-१ पटक प्रतियोगिताको उपाधि जितेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
