काठमाडौं- अर्जेन्टिनी फरवर्ड लिओनल मेस्सीले आइतबार पेरिस सेन्ट जर्मन (पीएसजी) बाट डेब्यू गर्ने भएका छन्। यसै सिजन स्पेनिस क्लब बार्सिलोना छाडेर पीएसजी गएका मेस्सीले अहिलेसम्म डेब्यूको मौका पाएका थिएनन्। पीएसजीले लिग वानको चौथो खेलमा आज राइम्ससँग प्रतिस्पर्धा गर्दैछ।
खेल नेपाली समयअनुसार मध्यरात १२:३० बजे हुनेछ । प्रशिक्षक माउरिसियो पोचेटिनोले मेस्सी पहिलो पटक पीएसजीको टोलीमा हुने पक्का गरेका छन्। तर, उनी आजको खेलमा पहिलो रोजाइमा मैदान उत्रन्छन् वा बेन्चमा रहन्छन् भन्ने एकीन भने छैन।
सम्भवत उनी खेलको अन्तिम ३० मिनेटमा मैदान उत्रन सक्ने आकलन गरिएको छ। तर, फरवर्ड माउरो इकार्डी घाइते भएका कारण मेस्सीले सुरुवाती रोजाइमा खेल्ने सम्भावना पनि छ।
कोपा अमेरिकाको उपाधि जितेपछि मेस्सी लामो समय विश्राममा थिए। अगस्ट १० मा पीएसजीमा अनुबन्धित भएका मेस्सीले पछिल्लो दुई साता टोलीसँग प्रशिक्षण गरिरहेका छन्। ‘म्याच फिटनेस’ नभएका कारण नै उनलाई तयार हुन समय दिइएको प्रशिक्षक पोचेटिनोले बताउँदै आएका छन् ।
राइम्सविरुद्धको आजको खेलमा मेस्सीसँगै नेयमार र केलियन एम्बाप्पे एकैसाथ मैदानमा देखिने सम्भावना छ। एम्बापेको बहिर्गमनको चर्चा चलिरहँदा उनी टोलीसँग राइम्सको घरेलु मैदान स्टेड अगुस्टेन पुगेका छन्।
मेस्सीले दायाँ, नेयमार बाँया र एम्बाप्पे सेन्ट्रल भागबाट खेल्न सक्नेछन्। यता, टोलीका प्रशिक्षक मौरिसियो पोचेटिनोले एम्बापेले क्लब छाड्नेबारे अहिलेसम्म आफूलाई केही जानकारी नगराएको बताएका छन्।
यसअघिका तीन खेलमा मेस्सी र नेयमारविनै मैदान उत्रेको पीएसजीले शतप्रतिशत नतिजा निकालेको छ। ३ खेलबाट ९ अंक जोडेको पीएसजी अंक तालिकाको शीर्ष स्थानमा छ।
तीनै खेलमा बराबरी गरेको राइम्स तीन अंकसहित तालिकाको १२औँ स्थानमा छ। राइम्सविरुद्धको खेलपछि मेस्सीले अर्को साता हुने कतार २०२२ विश्वकप छनोट अन्तर्गतका तीन खेल राष्ट्रिय टोलीबाट खेल्ने छन्।
अर्जेन्टिनाले सेप्टेम्बर पहिलो साता भेनेजुएला, ब्राजिल र बोलिभियासँग खेल्ने कार्यक्रम छ। छनोटका ६ खेलमा अपराजित अर्जेन्टिनाले ३ जित र ३ बराबरीसँगै १२ अंक जोडेको छ। अर्जेन्टिना अंक तालिकाको दोस्रो स्थानमा छ। यता, ६ खेलमा १८ अंक जोडेको ब्राजिल शीर्षस्थानमा छ।
मेस्सीसँगै ब्राजिलका नेयमार पनि विश्वकप छनोटको खेलमा सहभागी हुने बताएको छ। प्रशिक्षक पोचेटिनोले आफ्ना खेलाडीले राष्ट्रिय टोलीबाट खेल्ने कुरामा आफू सकारात्मक रहेको बताएका छन्।
‘अर्जेन्टिना जाने विषयमा कुनै समस्या छैन। हाम्रा खेलाडीले राष्ट्रिय टोलीबाट खेल्ने कुरामा हामी सधैं सकारात्मक छौं। अर्जेन्टिना मात्र होइन, अन्य खेलाडी र देशको विषयमा पनि हाम्रो यहि धारणा हो,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
