काठमाडौं- तनहुँको ब्यास नगरपालिका-५ पतेनीस्थित पक्की पुलनजिक बाख्रेतर्फ जाने कच्ची सडकबाट बाघको अवैध छाला, खप्पर, हड्डीलगायतका अंगसहित तीन जनालाई शनिबार साँझ प्रहरीले पक्राउ गरेको छ।
पक्राउ पर्नेमा सोही नगरपालिका-६ सिरुबारी बस्ने ३९ वर्षीय अर्जुन श्रेष्ठ, शुक्लागण्डकी नगरपालिका-१ ओखल्दी बस्ने ४० वर्षीय सन्जित गुरुङ र सोही नगरपालिका-१ रतनपुर बस्ने ३२ वर्षीय सन्तोष गुरुङ रहेका छन्।
उनीहरुमध्ये अर्जुनको साथबाट दुई थान बाघको छाला, बा ४९ प ५९२३ नम्बरको स्कुटर, एक थान मोबाइल र नगद एक हजार रुपैयाँ, सन्जितको साथबाट १२२ वटा बाघको हड्डी, ग १८ प ५४११ नम्बरको मोटरसाइकल, एक थान मोबाइल र नगद दुई हजार रुपैयाँ र सन्तोषको साथबाट बा ३५ प ५४५१ नम्बरको मोटरसाइकल, नगद तीन हजार ५८५ रुपैयाँ, एक थान लाइटर र एक थान मोबाइल प्रहरीले बरामद गरेको छ।
शंकास्पद गतिविधि गरिरहेका उनीहरुलाई केन्द्रीय अनुसन्धान ब्यूरो सीआईबी र जिल्ला प्रहरी कार्यालय तनहुँबाट खटिएको प्रहरीले जाँच गर्ने क्रममा बाघका ती अंगहरुसहित फेला पारी पक्राउ गरेको हो। उनीहरुलाई थप अनुसन्धानका लागि दमौलीस्थित जिल्ला वन कार्यालयमा पठाइएको जिल्ला प्रहरी कार्यालय तनहुँले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
