क्रिस्टियानो रोनाल्डो अर्थात् फुटबलका सर्वकालीन महान खेलाडीको पंक्तिमा राखिने नाम। जसरी दुई वर्ष पहिले रियल मड्रिड छाडेर इटालियन क्लब युभेन्टस जाने रोनाल्डोको निर्णयले धेरैलाई चकित पारेको थियो, अहिले फेरि रोनाल्डोले त्यस्तै निर्णय लिएका छन्। उनको इटालियन लिग च्याम्पियन युभेन्टस सँग एक वर्षको सम्झौता अवधि बाँकी नै छ। तर, युभेन्टस पाँच पटकको बलोन डी‘ओर विजेता रोनाल्डोलाई बेच्न तयार भएको छ।
युभेन्टसले आफ्नो शर्त पूरा भए उनलाई बेच्ने बताएको छ। युभेन्टस रोनाल्डोलाई टिममा राख्न चाहन्छ तर, उनलाई छोड्न पर्दा पनि दुःखी नहुने स्पेनिस अनलाइन मार्काले जनाएको छ। युभेन्टसमा रोनाल्डोको तलब वार्षिक ६० मिलियन युरो रहेको छ।
३६ वर्षीय रोनाल्डोले बिहीबार राति क्लब छाड्न चाहेको जानकारी दिएका थिए। उनका एजेन्ट जोर्ज मेन्डसले पनि युरोपका विभिन्न क्लबहरुसँग सम्पर्क गरिरहेका छन् ।
रोनाल्डो युभेन्टस छाडेर इंग्लिस क्लब म्यान्चेस्टर सिटी जाने चर्चा चलिरहेको बेलमा उनी शुक्रबार प्रशिक्षण केन्द्र पुगेर ४० मिनेटमै फर्किएका थिए। उनले सबै सहकर्मीहरुसँग बिदा मागेको बताइएको छ।
रोनाल्डोलाई किन्न सक्ने क्लबका रुपमा सिटीलाई हेरिएको छ। रोनाल्डोका एजेन्ट मेन्डसले सिटीसँग कुरा अगाडि बढिरहेको स्वीकार गरेका छन्। यद्यपि, सिटी युभेन्टसको जवाफ पर्खाइमा रहेको छ।
रोनाल्डोले सन् २००३ देखि २००९ सम्म इंग्लिस क्लब म्यान्चेस्टर युनाइटेडबाट खेलेका थिए। त्यसपछि ९ सिजन रियल मड्रिडबाट खेलेका थिए। उनले युनाइटेडबाट २९२ खेलमा ११८ गोल गरेका थिए। रियलबाट ९ सिजनमा ४३८ खेलमा ४५० गोल गरेका थिए। ०१८ पछि उनी इटालियन क्लब युभेन्टस पुगेका उनले तीन सिजन खेल्दा १३४ खेलमा १०१ गोल गरेका छन्।
उनले गत सिजन सिरी ए मा ३३ खेल खेल्दै २९ गोल गरेका थिए। यद्यपि, रोनाल्डोका लागि युभेन्टस यात्रा त्यति फलदायी देखिएको छैन। उनी क्लबमा आएपछि उनले च्याम्पियन्स लिगमा युभेन्टसलाई क्वार्टरफाइनलभन्दा माथि लैजान सकेनन्।
लगातार नौ वर्षसम्म सिरी ए को उपाधि जितेको युभेन्टसले गत सिजन उपाधि गुमायो। त्यसैले पनि रोनाल्डो निराश बनेको हुनसक्ने जानकारहरुले बताएका छन्।
आउलान् त सिटी?
गत महिना अर्जेन्टिनी फरवार्ड सर्जियो अगुएरो क्याटलान क्लब बार्सिलोनामा ‘फ्रि ट्रान्सफर’मार्फत् २ वर्षका लागि अनुबन्धित भएका थिए। उनको स्थानमा टोटनह्यामका ह्यारी केनलाई भित्र्याउने प्रयास सिटीले गरेको थियो।
तर, केनले उक्त प्रस्ताव अस्वीकार गरेर टोटनह्याममै सम्झौता नवीकरण गरे। त्यसैले अगुएरोको स्थानमा रोनाल्डोलाई सिटीले भित्र्याउन लागेको बताइन्छ। तर, उनी शहरी प्रतिस्पर्धी म्यानचेस्टर युनाइटेडबाट खेल्दा सिटी जाने सम्भावना निकै कम रहेको बताइन्थ्यो।
यता, सिटीका प्रशिक्षक पेप ग्वार्डिओलाले रोनाल्डोभन्दा लिओनल मेस्सीलाई मन पराउँछन्। त्यसको एकै कारण हो ग्वार्डिओलाको खेलाउने शैली। ग्वार्डिओलासँग रोनाल्डोको तालमेल मिल्न गाह्रो रहेको बताइएको छ। तर, ग्वार्डिओला यो सिजन सिटीमा बस्ने भएकाले रोनाल्डोलाई सम्झौता गर्नसक्ने विश्लेषण छ। उनी पनि रोनाल्डो आउने कुरामा विश्वस्त रहेको बताइएको छ। मेस्सीलाई भित्र्याउन नसकेको तोडमा परेका पेप ग्वार्डिओला त्यत्तिकै हाइप्रोफाइल खेलाडी रोनाल्डोलाई कुनै पनि हालतमा गुमाउन भने चाहँदैनन्।
अन्य क्लबमा सम्भावना
बार्सिलोनाका कप्तान लिओनल मेस्सीलाई भित्र्याएसँगै विश्व फुटबलकै सशक्त टीम भएको फ्रेन्च क्लब पेरिस सेन्ट जर्मेन (पीएसजी)ले रोनाल्डोलाई अनुबन्ध गर्नसक्ने सम्भावना रहेको मार्काले उल्लेख गरेको छ ।
पीएसजीमा ब्राजिलियन नेयमार, रियल मड्रिडका पूर्वकप्तान सर्जियो रामोस र फ्रान्सेली राष्ट्रिय टोलीका युवा फरवार्ड केलियन एम्बाप्पे जस्ता खोलाडी छन्। फरवार्ड माउरो इकार्डी र अर्जेन्टिनी विंगर एन्जल डी मारिया, जर्मन मिडफिल्डर जुलियन ड्राक्स्लर र स्पेनिस विंगर पाब्लो सराबिया हुँदा यो टीम हालसम्मकै शक्तिशाली भएकोमा दुईमत छैन ।
तर, फरवार्ड एम्बाप्पे सम्झौताको अन्तिम वर्षमा छन्। तर, उनी रियल मड्रिड जाने लगभग निश्चित भएको छ। रियलले पहिलेभन्दा १० मिलियन युरो बढीको प्रस्ताव गरेपछि पीएसजी एम्बाप्पेलाई बेच्न तयार भएको हो।
रियलले यसअघि १ सय ६० युरो मिलियन प्रस्ताव गरेको थियो। तर, उक्त प्रस्ताव अस्वीकार गरेसँगै रियलले पछिल्लो समय १ सय ७० मिलियन युरो प्रस्ताव गरेको छ।
नयाँ प्रस्तावसँगै रियल र पीएसजी ट्रान्सफर सहमतिको नजिक पुगेको बताइएको छ। एमबाप्पेले आफूलाई क्लब छाड्न अनुमति दिन क्लबलाई आग्रह गरेका थिए।
सानैदेखि रियलबाट खेल्ने सपना बुनेका एम्बाप्पे आफैँ पनि चाँडो भन्दा चाँडो रियल जान चाहन्छन्। यसैबीच, एम्बाप्पे आउने भएपछि रियलले उनको स्वागतार्थ भव्य पार्टी आयोजनाको तयारी गरेको मार्काले जनाएको छ।
योसँगै आइतबार रेइम्सविरुद्धको लिग वान खेलमा पीएसजीले एम्बाप्पेलाई टिममा नराख्ने संकेत दिइसकेको छ। आइतबार वा सोमबार नै रियलले एम्बाप्पेसँग आधिकारिक सम्झौता गर्ने तयारी गरिएको बुझिएको छ।
मेस्सीलाई भित्र्याएसँगै हौसिएको पीएसजीको नजर अब रोनाल्डोतर्फ छ। आधुनिक फुटबलका दुई सुपरस्टार मेस्सी र रोनाल्डोलाई एकसाथ उतार्ने प्रयासमा रहेको छ, पीएसजी ।
यता, रोनाल्डोका एजेन्ट मेन्डसले पनि पीएसजीबाट कुरा आएको र छलफल भइरहेको बताएका छन्। उनले रोनाल्डोले अर्को सिजन पीएसजीबाट खेल्ने सम्भावना रहेको पनि बताए।
यता, रोनाल्डोको पहिलो रोजाइ रहेको रियलले उनलाई भित्र्याउने विषयलाई बन्द गरिसकेको छ ।
क्रिस्टियानो रोनाल्डोको पुनरागमनको लागि म्यानचेस्टर युनाइटेड पनि उत्तिकै सक्रिय छ। युनाइटेडले बिहीबार रातिदखि मेन्डससँग सिधा सम्पर्क गरिरहेको छ। अब बोर्ड बैठकमा कुरा गर्दै सम्भावित तलबसहित युभेन्टससमक्ष प्रस्ताव राख्ने तयारीमा युनाइटेड रहेको जनाइएको छ।
युनाइटेडका नर्वेली प्रशिक्षक ओले गुन्नार सोल्सायरले भने,‘रोनाल्डोका लागि हामीले सधैं सम्पर्क गरेका छौं। ब्रुनो फर्नान्डेज (पोर्चुगिज टिममेट) ले पनि उनीसँग कुरा गरिरहेछन्। उनी जान्दछन् कि हामी उनको बारेमा के महसुस गर्छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
