काठमाडौं- गृहमन्त्री बालकृष्ण खाँणले पछिल्लो समय देशभर आएको बाढी र त्यसले पुर्याएको क्षति न्यूनीकरण, उद्धार र राहतमा सक्रिय भएर काम गर्न सुरक्षा निकायलाई निर्देशन दिएका छन्।
शुक्रबार गृहमन्त्रालयमा नेपाली सेना, नेपाल प्रहरी, सशस्त्र प्रहरी, राष्ट्रिय पुनर्निर्माण प्राधिकरण, सडक विभाग, जल तथा मौसम विज्ञान विभागलगायतका प्रतिनिधि उपस्थित रहेको बैठकमा मन्त्री खाँणले उक्त निर्देशन दिएका हुन्।
बाढी र पहिरोले क्षति पुर्याएको क्षेत्रको भैरहेको उद्वार थप प्रभावकारी बनाउन उनले निर्देशन दिए। यस्तै, प्रभावित क्षेत्रमा उद्धार र राहतमा सक्रिय हुन र बेपत्ताको खोजी गर्नसमेत उनले निर्देशन दिए।
बाढीले पूर्वपश्चिम राजमार्ग अन्तर्गत बुटवल नारायण खण्ड, तुरिया र घोडाहा खोलामा रहेको दुई पुल भत्किँएको र सडक अवरुद्ध भएको स्थानमा तत्काल बेलिब्रिज बनाउन र सवारी साधन संचालनको लागि अन्य बैकल्पिक उपाय अपनाएर सञ्चालनमा ल्याउन निर्देशन दिएका छन्।
बाढी प्रभावित ४०० परिवार रहेको र उनिहरूलाई सुरक्षित स्थानमा राख्न र तत्काल राहत र उपचारको व्यवस्था मिलाउन उनले निर्देशन दिए। प्रभावित क्षेत्रमा बासिन्दालाई सरकारी कार्यालय र विद्यालयमा सिविर बस्ने व्यवस्था मिलाउन निर्देशन दिएका छन्।
जेठ ३१ यता ८५ को मृत्यु, ४४ बेपत्ता
मनसुन शुरु भएयता (गत जेठ ३१ पछि) मुलुकभर मनसुनजन्य घटनामा ८५ जनाको मृत्यु भएको छ। पछिल्लो बर्षाले नवलपरासी र रूपन्देहीमा बढी क्षति पुर्याएको छ।
बाढी पहिराले पछिल्लो समय ३८ जिल्ला क्षतिको पुनर्निर्माण गर्न १ अर्ब ११ करोड बढी लाग्ने भएको निष्कर्ष बैठकले निकालेको छ।
नवलपरासीमा पछिल्लो १२ घण्टामा ४३४ मिलिमिटर नवलपरासी पानी परेको छ। बाढीले धनुषाको कमला तटबन्द जोखिममा परेको छ। ८ जना मलामी बर्षाले फसेको र उद्वार भैरहेको छ।
नारायणघाट-मुग्लिन सडक अवरुद्ध भएको छ। बर्दघाट पुरै डुबानमा परेको छ भने मनाङमा बाढी पहिरो क्षतिको पुनर्निर्माणमा प्रभावित भए पनि सडक निर्माणको काम अन्तिम चरणमा पुगेको बताइको छ।
बाजुरामा सडक निर्माणमा कठिनाई भएको छ। २०५ वटा डोजर मेसिन प्रयोग गरेर अवरुद्ध सडक खुलाउने काम भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
