काठमाडाैं– युरोपियन फुटबलको सर्वोच्च निकाय यूईएफएले २०२१ को ‘यूईएफए प्रेसिडेन्ट्स’ अवार्ड डेनमार्कका कप्तान सिमोन जायर र मेडिकल टिमलाई प्रदान गरेको छ।
युरोकप २०२० फुटबल दौरान हृदयघात भएर मैदानमा लडेका मिडफिल्डर क्रिस्टियन एरिक्सनको ज्यान बचाउन महत्वपूर्ण भूमिका निर्वाह गरेको भन्दै उनीहरुलाई उक्त अवार्ड प्रदान गरिएको हो।
गत जुनमा कोपनहेगनमा फिनल्याण्डविरुद्धको आफ्नो पहिलो खेलको क्रममा इटालियन क्लब इन्टर मिलानका २९ वर्षीय मिडफिल्डर हृदयघातका कारण ४३औं मिनेटमा मैदानमा नै ढल्न पुगेका थिए।
त्यसलगत्तै, कप्तान सिमोनले मेडिकल टिम बोलाउदै मैदानको स्थिति नियन्त्रण गरेका थिए। मैदानमा प्रवेश गरेका स्वास्थ्यकर्मीले उनलाई सीपीआर (कार्डियो पल्मनरी रिससिटेसन), बन्द भएको मुटुलाई पुन: चलाउने विधि गरेका थिए।
लगभग १५ मिनेट मैदानमा नै प्राथमिक उपचार गरेपश्चात् होसमा आएका उनलाई त्यसपछि अस्पताल लगिएको थियो। अस्पतालले उनलाई हृदयघात भएको पुष्टि गरेको थियो।
अहिले एरिक्सनको शरीरमा ‘हर्ट डिफिब्रिलेटर’ जडान गरिएको छ। मुटुको विभिन्न परीक्षणपश्चात् उनको मुटुको चालमा रहेको गडबडीलाई नियन्त्रण गर्न इम्प्लान्टेबल कार्डियोभर्टर डेफिब्रिलेटर (आईसीडी) प्रत्यारोपण गरिएको हो।
‘यस वर्षको ‘यूईएफए प्रेसिडेन्ट्स’ अवार्ड फुटबलभन्दा माथि छ,’ यूईएफए अध्यक्ष अलेक्जेन्डर सेफेरिनले भने,‘यो एक महत्वपूर्ण र अनन्त रिमाइन्डर गरिरहने कुरा हो जीवन कति बहुमूल्य छ।’
यस्तै, उनले स्वास्थ्यलाभ गरिरहेका एरिक्सन र उनको परिवारलाई शुभकामना पनि व्यक्त गरेका छन्। मिलानका एरिक्सन व्यवसायिक खेलका लागि मैदान फर्किएका छैनन्।
‘एरिक्सन र उनको परिवारलाई स्वास्थ्यलाभको लागि मेरो तर्फबाट धेरै धेरै शुभकामना,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
