काठमाडौं- नक्कली नागरिकता र अन्य कागजात बनाएर विभिन्न व्यक्तिसँग करोडौं ठगी गरेको आरोपमा एक भारतीय नागरिकलाई पक्राउ गरिएको छ।
काठमाडौं उपत्यका अपराध अनुसन्धान कार्यालयले भारतको हिमाञ्चल प्रदेश राज्यको रामपुर गसेरा सिम्ला जिल्ला नोगली पञ्चायत घर भएका ३९ वर्षीय शेर सिंह भनिने रविकुमार सिंहलाई ललितपुरको महालक्ष्मी नगरपालिका-५ सेतीपाखाबाट पक्राउ गरेको हो।
महाशाखाका एसपी कृष्ण कोइरालाका अनुसार उनले कैलाली टीकापुर नगरपालिका-९ स्थायी ठेगाना र सुर्खेतको साविका लाटीकोइली गाविस-७ जन्मस्थानको ठेगाना उल्लेख भएको नक्कली नागरिकताको प्रतिलिपि देखाएर विभिन्न व्यक्तिबाट रकम र सवारी साधन ठगी गरेका थिए।
सिंहले बुटवल उपमहानगरपालिका-८ का हरि मल्ल र महेन्द्रकुमार श्रेष्ठलाई बुटवल-नारायणघाट सडकखण्डको रुख कटानको आफूसँग सब-कन्ट्रयाक्ट भएको र त्यसमा लगानी गरे फाइदा हुन्छ भनी ४३ लाख ७३ हजार रुपैयाँ लिएर खातामा पैसा नभएको चेक दिएर सम्पर्कविहीन भएको उजुरी परेको छ।
त्यसैगरी, रुपन्देहीको लुम्बिनी साँस्कृतिक नगरपालिका-६ का अनिल गुरुङ भन्ने कृष्णबहादुर गुरुङलाई अञ्जुली कन्स्ट्रक्सनको म्यानेजिङ डाइरेक्टर हुँ भनेर सिंहले ठगी गरेको खुल्नमा आएको छ।
‘गुरुङको बा १२ च ३८५९ नम्बरको कारको मासिक ९० हजार भाडामा भनेर लिएर सिंहले बेपत्ता बनाएका थिए। पछि त्यही कार देखाएर प्रदिप रायाई देखाएर आफ्नै कार भन्दै कार ब्लुबुक धितो राखेर ८ लाख ३५ हजार लिएर फरार भएको अनुसन्धानबाट खुल्न आएको छ,’ एसपी कोइरालाले भने।
उता, चुरियामाई इन्टरप्राइजेज जडिबुटी, काठमाडौंका सञ्चालक कृष्णहरी गौतमसँग बा ९५ प १६८ नम्बरको मोटरसाइकल ३ लाख ३० हजारमा खरिद गरेका थिए। ३० हजार दिएर बाँकी रकम पछि दिने भन्दै मोटरसाइकलसहित उनी गत पुस २९ गतेबाट बेपत्ता भएका थिए।
यता, धनुषा जनकपुरधामस्थित न्यूसाह एण्ड इन्टरप्राइजेजका सञ्चालक प्रदिपकुमार साहलाई रोयल हाइड्रो कन्ट्रक्शनको म्यानेजिङ डाइरेक्टर हुँ भनेर ठगी गरेको पाइएको छ।
‘भिजिटिङ कार्डसमेत देखाएर मारुती सुजुकी कम्पनीको प्रदेश-३-०१र ०२३ च ००५० नम्बरको ब्रेजा कार मासिक १ लाख ५० हजार भाडा दिन्छु भनेर लगेर बेपत्ता भएका थिए,’ एसपी कोइरालाले भने।
यता, लाजिम्पाटस्थित रोयल हाइड्रो कन्ट्रक्शन प्रालिको नक्कली लेटर प्याड , कम्पनीको छाप, नक्कली दस्तखत प्रयोग गरेर ठगी गरेको पाइएको छ।
आफूलाई संस्थापक अध्यक्ष हुँ भनेर विभिन्न व्यक्तिहरूबाट करिब १ करोड रुपैयाँसमेत उनले ठगी गरेको पाइएको एसपी कोइरालाले बताए।
यसैरी, आफ्नो कार्यालयको लेटरप्याड दुरुपयोग गरेर ठगी गरेपछि उक्त संस्थाका अध्यक्ष सुरेन्द्रबहादुर शाही र प्रेमबहादुर शाहीले प्रहरीमा उजुरी दिएका थिए। सोही उजुरीको आधारमा पक्राउ परेपछि सिंहको ठगी श्रृखला अनुसन्धानको क्रममा थप खुलेको हो।
प्रारम्भिक अनुसन्धानको क्रममा सुर्खेत साविक लाटीकोइली गाविस-७ का देवीप्रसाद सिंहको छोरा भएको उल्लेख गर्दै जिल्ला प्रशासन कार्यालयबाट लिएको नेपाली नागरिकतासमेत नक्कली रहेको खुलेको छ।
सोही नागरिकता पेश गरेर विभिन्न बैंकहरूमा खाता खोलेर उनले ठगी कार्यमा प्रयोग गरेको, सवारी चालक अनुमतिपत्रसमेत बनाएको प्रहरीले जनाएको छ।
उनीविरुद्ध यसअघि महानगरीय प्रहरी परिसर टेकुमा समेत बैंकिङ कसूरमा मुद्दा दर्ता भएर पक्राउ पुर्जीसमेत जारी भएको थियो। पक्राउ परेका सिंहलाई कारबाहीका लागि परिसर टेकु पठाइएको महाशाखाले जनाएको छ।
उनले ठगी गरेका दुई वटा कार, नक्कली नागरिकता, विभिन्न बैंकका एटिएम र चेक समेत प्रहरीले बरामद गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
