काठमाडौं- अखिल नेपाल फुटबल संघ (एन्फा)ले भारतसँगको मैत्रीपूर्ण खेलका लागि सीमित दर्शकलाई मैदान प्रवेश गर्न दिने तयारी गरेको छ।
कोरोनाविरुद्धको पूर्ण खोप लगाएका दर्शकलाई मैदान प्रवेशको अनुमति दिनका लागि राष्ट्रिय खेलकुद परिषद् (राखेप) र अन्य सरोकारवाला निकायसँग प्रस्ताव राख्ने तयारी थालेको एन्फाले जनाएको हो।
‘रंगशालको क्षमता अनुसार नै दर्शक राख्न सकिँदैन। कोरोनाको समय भएकाले पूर्ण खोप लगाएका दर्शकलाई मैदान प्रवेशको अनुमति दिने विषयमा हामीले छलफल गरिरहेका छौं। एक योजना बनाएर सम्बन्धित ठाउँमा पहल गर्ने तयारी गरेका छौं,’एन्फाका महासचिव इन्द्रमान तुलाधरले नेपाल लाइभसँग भने।
काठमाडौं उपत्यकामा दैनिक एक हजारभन्दा बढी कोरोना संक्रमित फेला पर्दै आएका छन्। कोरोना न्यूनिकरणका लागि काठमाडौं जिल्ला प्रशासनले बेलुका ८ बजेदेखि रात्रीकालीन निषेधज्ञा लागू गर्दै आएको छ भने २५ जनाभन्दा बढीलाई भेला हुन रोकसमेत लगाएको छ।
‘अहिलेको अवस्थामा कोरोना प्रोटोकल फलो गरेर आधा दर्शक राख्नसक्ने स्थिति छ। तर, कोरोना महामारीको अवस्था अहिलेभन्दा बढ्दै गएमा पुनर्विचार गर्नेछौं,’उनले भने।
माल्दिभ्समा हुने साफ च्याम्पियनसिपको तयारीका लागि नेपालले यही भदौको १७ र २० गते भारतसँग दशरथ रंशालामा मैत्रीपूर्ण खेल खेल्दैछ।
भारतसँगको खेल र साफ च्याम्पियनसिपको तयारीका लागि नेपाली टोलीले अहिले पोखरामा अभ्यास गरिरहेको छ।
पोखरामा तयारी गरिरहेको नेपालले सोमबार दोस्रो चरणमा २८ खेलाडी छनोट गरेको थियो। टिमबाट १० खेलाडी बाहिरिएका थिए।
बन्द प्रशिक्षणबाट भरत खवास र जर्जप्रिन्स कार्कीसहित रजिन धिमाल, विशाल सुनार, रन्दीप पौडेल, राजीव लोप्चन, सञ्जोक राई, त्रिदेव गुरुङ, सेसेहाङ आङदम्बे र विक्रम लामा बाहिरिएका हुन्।
साफको पावर हाउस मानिने भारतसँगको मैत्रीपूर्ण खेललाई नेपालले महत्वका साथ हेरेको छ।
भारतले १३ संस्करणमध्ये सात पटक उपाधि जितेको छ। नेपाल भने अहिलेसम्म फाइनलसमेत पुग्न सकेको छैन।
भारतीय टोलीले प्रशिक्षक इगोर स्टिमाकको नेतृत्वमा अहिले कोलकतामा प्रशिक्षण गरिरहेको छ। कोलकतामा १५ दिन अभ्यास गरेपछि टोली नेपाल आउनेछ।
कोलकतामा अभ्यासका क्रममा टोलीले इन्डियन फुटबल एसोसिएसन (आइएफए ११) सँग मैत्रीपूर्ण खेल खेलेको थियो।
नेपाल र भारतबीच अहिलेसम्म १९ खेल भएको छ। जसमध्ये भारतले १३ खेलमा जित हात पारेको छ। नेपाल केवल २ खेलमा मात्र विजयी भएको छ। ४ खेल भने बराबरीमा सकिएका छन्।
भारतले नेपालविरुद्ध हालसम्म ३३ गोल गरेको छ। नेपालले भने ९ गोल मात्र गर्न सकेको छ। दुई टोलीबीचको प्रतिस्पर्धामा सुनिल क्षेत्री बढी गोल गर्ने खेलाडी हुन्। उनले नेपालविरुद्ध ८ खेल खेल्दै ५ गोल गरेका छन्।
पछिल्लो पटक नेपाल र भारतबीच ६ जुन २०१७ मा प्रतिस्पर्धा भएको थियो। मुम्बईमा भएको सो खेलमा भारत २-० गोलले विजयी भएको छ।
दुई टिमबीच नेपाली मैदानमा २०१५ मा प्रतिर्स्पर्धा भएको थियो। विश्वकप छनोटको दोस्रो लेगको उक्त खेल गोलरहित बराबरीमा सकिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
