काठमाडौं– बलात्कार मुद्दाका एक अभियुक्त जनसेवा वृत्तको गाडीबाटै फरार भएको घटनामा लापरबाही भएको भन्दै चार प्रहरीलाई निलम्बन गरिएको छ। हत्कडी लगाएका अभियुक्त विनोद परियार फरार भएको घटनामा राम्रोसँग जिम्मेवारी पूरा गर्न नसकेको निष्कर्ष निकाल्दै उनीहरुलाई जिल्ला प्रहरी परिसर काठमाडौंले निलम्बन गरेको हो।
निलम्बित हुनेहरुमा प्रहरी वृत्त जनसेवाका एक प्रहरी नायव निरीक्षक (सई), एक हवल्दार र दुई प्रहरी जवान छन्। अभियुक्त परियार गत शुक्रबार कोरोना परीक्षणका लागि वीर अस्पताल लगेर हिरासत कक्ष जनसेवा वृत ल्याउने क्रममा न्यूरोडबाट फरार भएका थिए।
गाडीबाटै हत्कडी लगाएका अयिभुक्त भाग्नुले उनलाई ल्याउने लैजाने जिम्मेवारी पाएका प्रहरीसमेतको मिलेमतोको आशंका गरी काठमाडौं उपत्यका प्रहरी कार्यालयले जिल्ला प्रहरी परिसर काठमाडौंलाई घटनाको छानबिन गरी कारबाही गर्न निर्देशन दिएको थियो।
त्यसपछि परिसर काठमाडौंले समिति गठन गरी छानबिन गरेको थियो। छानबिनका क्रममा ड्युटीमा खटिएकाहरुले राम्रोसँग जिम्मेवारी निभाउन नसकेको निष्कर्ष निकाल्दै उनीहरुलाई निलम्बन गरिएको काठमाडौंका एसएसपी अशोक सिंहले नेपाल लाइभलाई जानकारी दिए।
‘एक हवल्दार र दुई सिपाहीलाई निलम्बन गरेका छौं। सहीको हकमा भने निलम्बनका लागि प्रहरी हेडक्वाटरलाई लेखि पठाएका छौं,’ सिंहले भने।
अभियुक्त फरार भएको घटनामा राम्रोसँग जिम्मेवारी निभाउन नसकेको भन्दै चार प्रहरीलाई निलम्बन गरिएपनि पाँच दिन हुँदासम्म उनलाई भेट्टाउन सकिएको छैन। उनी भागेर जानसक्ने सम्भावित ठाउँदेखि मोबाइलसम्मको लोकेशन प्रहरीले केलाइसकेको छ।
उपत्यकाबाट प्रहरी नियन्त्रणमा रहेका अभियुक्त पटक पटक भाग्छन्
यसअघि पनि काठमाडौं उपत्यकाका हिरासतबाट तथा म्याद थपका लागि अदालत लैजाँदा अभियुक्तहरु फरार हुने गरेका थिए। २०७५ साउनमा प्रहरी वृत्त सिंहदरबारको हिरासतबाट चोरी मुद्दाका अनिल थापा, सुब्बा लामा, सुकलाल वाइबा र मदन तामाङ फरार भएका थिए।
उनीहरु फरार भएपछि ड्युटी अफिसर भीमबहादुर थापा, ड्युटीमा रहेका हवल्दार बोधबहादुर माझी र चन्द्रबहादुर विक निलम्बनमा परेका थिए।
त्यसैगरी, गत असोजमा मात्रै प्रहरी वृत्त कालिमाटीबाट पनि अनिल जैसवाल, आसु जैसवाल, सुजित गुप्ता र रवीन्द्र जैसवाल फरार भएका थिए। राति ड्युटीमा रहेको टोलीले उनीहरुलाई चोरीमा संलग्न रहेको हुनसक्ने आशंकामा पक्राउ गरेर वृत्त कालिमाटी पुर्याएको थियो।
कोरोना परीक्षण नगरी अभियुक्तलाई सिधैं हिरासतमा नराखि उनीहरुलाई वृत्त परिसरमै रहेको आइसोलेसनमा राखिएको थियो। सो क्रममा राति करिब ३ बजेतिर उनीहरु भागेका थिए।
२०७५ पुसमा काठमाडौं जिल्ला अदालतबाट चोरी मुद्दाका अभियुक्त सिन्धुपाल्चोकको बलेसीका लालकाजी तामाङ हत्कडीसहित फरार भएका थिए। पछि उनलाई सिन्धुलीबाट प्रहरीले पक्राउ गरेको थियो।
उता, २०७६ असारको तेस्रो साता प्रहरी प्रभाग भैंसेपाटीको हिरासतबाट तीन जना अभियुक्त फरार भएका थिए। हिरासतमा कक्षमा रहेको ट्वाइलेटको झ्यालको ग्रिल काटेर विकास र रुपेश भनिने रामेछाप नगरपालिका-५ का २५ वर्षीय रुद्रलाल श्रेष्ठ, सोही ठाउँका २५ वर्षीय समशेर माझी र रवीकुमार तिमल्सिना फरार भएका थिए।
म्याद थप गर्न अदालत लगेका बेला अदालतको ट्वाइलेटमा उनीहरूका साथीले पूर्वयोजना अनुसार ‘ह्याक्सो ब्लेड’ राखिदिएका थिए। सोही ह्याक्सो ब्लेड शरीरमा लुकाएर हिरासतसम्म पुग्न सफल भएका उनीहरू ग्रिलको रड काटेर भाग्नसमेत सफल भएका थिए। पछि उनीहरुलाई पक्राउ गरेको थियो।
अभियुक्त फरार भएपछि छानबिन समिति गठन गरेर कारबाही गरेजसो गरी केही दिनका लागि निलम्बन गर्नुबाहेक अहिलेसम्म ड्युटीमा खटिएका प्रहरीलाई त्यो बढी कारबाही हुन सकेको छैन।
मिलेमतोमा थुनुवा फरार भएको पुष्टि भएमा १० वर्षसम्म कैद सजाय हुने कानुनी व्यवस्था छ।
कारागार ऐन २०१९ को दफा २४ अनुसार अदालत र कारागारका कर्मचारीबाहेक प्रहरी वा अन्य सरकारी कर्मचारीले अभियुक्त भगाएमा जन्मकैद पाएको वा त्यस्तो सजाय पाउने खालको अपराध गरेको भए ६ वर्षसम्म कैद सजाय हुने व्यवस्था छ। अन्य थुनुवा, कैदीका हकमा भने २ वर्षदेखि ६ वर्षसम्म कैद सजाय हुने व्यवस्था छ।
कर्तव्य पालनका सिलसिलामा लापरबाही भएकै कारण कैदी तथा थुनुवा भागेको अवस्थामा भने ५ महिनासम्म कैद वा २ सय रुपैयाँसम्म जरिवाना हुनसक्छ। तर, कर्तव्य पालनकै सिलसिलामा प्रहरीबाट लापरबाही भएर थुनुवा वा कैदी फरार भएमा पनि २ सय जरिवाना र ५ महिनासम्म कैद भएको पाइँदैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
