काठमाडौं- इंग्लिस प्रिमियर लिग फुटबलको नयाँ सिजनमा ब्राइटन, एभर्टन, लेस्टर सिटी र वाटफोर्डले विजयी सुरुवात गरेका छन्।
शनिबार साँझ भएको आ-आफ्नो खेलमा उनीहरुले जित निकाल्दै नयाँ सिजनको सुरुवात गरेका हुन्।
घरेलु मैदानमा ब्राइटनले बर्नलेलाई २-१ ले पराजित गरेको छ। ब्राइटनका लागि निल माउपे र एलेक्सिस मकालिस्टरले गोल गरेका थिए। यस्तै, बर्नलेका लागि जेम्स टार्कोस्कीले गोल गरेका थिए।
बर्नलेका टार्कोस्कीले खोलको दुई मिनेटमा गोल गर्दै अग्रता दिलाएका थिए। तर, खेलको ७३ र ७८औं मिनेटमा माउपे र मकालिस्टरले गोल गर्दै ब्राइटनलाई २-१ को पुनरागमन जित दिलाए।
यस्तै, आजै भएको अर्को खेलमा एभर्टनले साउथह्याम्टनलाई ३-१ ले हराएको छ। खेलको २२औं मिनेटमा साउथह्याम्टनका एडम आर्मस्ट्रङले गोल गर्दै टोलीलाई अग्रता दिलाएका थिए। तर, ४७औं मिनेटमा रिचार्लीसनले गोल गर्दै खेल १-१ को बराबरीमा ल्याए।
यस्तै, एभर्टनका अब्दुलाए डुकुरे र डोमिनिक काल्भर्ट लेविनले ७६ र ८१औं मिनेटमा गोल गर्दै ३-१ खेल जिताए।
यस्तै, अर्को खेलमा लेस्टर वल्भ्सलाई १-० ले हराएको छ। लेस्टरका लागि जेमी भार्डीले ४१औं मिनेटमा गरेको गोल नै निर्णायक भएको थियो।
यता, वाटफोर्डले एस्टन भिल्लालाई ३-२ ले हराएको छ। खेलको ९औं मिनेटमै वाटफोर्डका इम्यानुएल डेनिसले सुरुवाति अग्रता दिलाएका थिए।
त्यसपछि, इस्माएला सार र जुआन हर्नान्डेजले खेलको ४१ र ६६औं मिनेटमा गोल गर्दै ३-० को अग्रता बनाए।
यता, एस्टन भिल्लाका जोन मक्गिन र ड्यानी इंग्सले खेलको ६९ र ९०औं मिनेटमा गोल गरेपनि हार टार्न सकेनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
