काठमाडौं- अर्जेन्टिनी फरवार्ड लिओनल मेस्सीले गत साता क्याटलान क्लब बार्सिलोना छाडेर फ्रान्सेली क्लब पेरिस सेन्ट जर्मेन (पीएसजी)सँग दुई वर्षको सम्झौता गरे।
पीएसजीसँगको सम्झौतामा हस्ताक्षरपछि आफ्नो डेब्यू कहिले हुन्छ भन्नेबारे आफूलाई थाहा नभएको बताएका थिए। कोपा उपाधि जितेपछि मैदान बाहिर रहेको मेस्सीले यसबीचमा बार्सिलोनाबाट बहिर्गमन र नयाँ क्लब पीएसजीमा अनुबन्धन भएकाले मानसिक रुपमा मैदानमा फर्किन समय लाग्ने उनले संकेत गरेका थिए।
यद्यपि, सम्झौता भएको केही दिनमै मेस्सी पीएसजीमा प्रशिक्षण शुरु गरेका थिए। योसँगै मेस्सीले अब पीएसजीमा डेब्यू गर्ने चर्चा चलेको थियो।
तर, मेस्सीलाई पीएसजीको जर्सीमा खेलेको हेर्न भने केहि समय कुर्नुपर्ने भएको छ। मेस्सी आइतबार बिहान हुने स्ट्रासबर्गविरुद्ध खेल नखेल्ने भएका छन्।
प्रशिक्षक माउरिसियो पोचेटिनोले घोषणा गरेको २२ सदस्यीय टोलीमा मेस्सीसँगै यसै सिजन भित्रिएका डिफेन्डर सर्जियो रामोस र गोलरक्षक जियानलुइजी डोनारुम्माले स्थान बनाउन सकेनन्।
प्रशिक्षक पोचेटिनोले भर्खर अनुबन्ध भएका डिफेन्डर अक्रफ हाकिमी र मिडफिल्डर जिओर्जिनिओ वाइनाल्डम भने टोलीमा समेटिएका छन् ।
यता, ब्राजिलियन स्टार नेयमार, डिफेन्डर मार्किन्हस, मिडफिल्डर मारको भेराट्टी र डिफेन्डर लिएन्द्रो पारेडेस पनि टोलीमा पर्न सकेका छैनन्। युरोकप २०२० र कोपा अमेरिकामा व्यस्त रहेका यी खेलाडी केहि समय प्रशिक्षणपछि मात्र टोलीमा फर्कने अनुमान लगाइएको छ।
झन्डै आधा दर्जन स्टार खेलाडी भएको पीएसजीले ट्रान्सफर विन्डो अन्त्य हुनुअघि केहि खेलाडी बेच्ने छ। त्यसैले पनि टोलीका मुख्य खेलाडीलाई विश्राम दिएको आकलन गरिएको छ।
यता, प्रशिक्षक पोचेट्टीनो अर्जेन्टिनाकै भएको र धेरै जसो प्रशिक्षण टिमका स्टाफ पनि अर्जेन्टिनाकै रहेकाले मेस्सीलाई ड्रेसिङ रुममा सजिलो हुने बताएका छन्।
साथै, पीएसजीको टिममा पनि अर्जेन्टिनाकै एन्जल डी मारिया, माउरो इकार्डी लगायतका खेलाडी रहेको तथा मेस्सीका मिल्ने साथी नेयमार रहेकाले पनि खेलाडीसँग घुलमिल गर्न गाह्रो नहुने उनले विश्वास छ।
उनले मेस्सीलाई बलियो टोलीविरुद्ध डेब्यू गराउने संकेत गरेका छन्। पीएसजीले अर्को खेल २० अगस्टमा ब्रेस्टविरुद्ध, २९ अगस्टमा रेइम्सविरुद्ध र १२ सेप्टेम्बरमा क्लेरमोन्ट फूटविरुद्ध खेल्दैछ।
यता, फ्रेन्च सञ्चार माध्यमहरुले भने २९ अगस्टमा मेस्सीले डेब्यू गर्नसक्ने रिपोर्ट प्रकाशित गरेका छन्। तर, उक्त खेल रेइम्सको मैदानमा हुने भएका कारण मेस्सीको डेब्यू हुने सम्भावना कम देखिएको छ । पीएसजीले घरेलु मैदानमा आफ्ना दर्शकको अगाडी मेस्सीलाई डेब्यू गराउन चाहेको छ।
पीएसजीको योजना सहि भएमा मेस्सीले १२ सेप्टेम्बरमा क्लेरमोन्ट फूटविरुद्धको खेलमा डेब्यू गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
