काठमाडौं- नेकपा (माओवादी केन्द्र) अध्यक्ष पुष्पकमल दाहाल 'प्रचण्ड'ले सरकारलाई पूर्णता दिने विषयमा सोमबारदेखि सघन छलफल हुने बताएका छन्।
शनिबारदेखि सुरु भएको माओवादीको केन्द्रीय समितिको पूर्ण बैठकमा अध्यक्ष प्रचण्डले पार्टी बैठक आइतबार सक्ने र सोमबारदेखि सरकारलाई पूर्णता दिने बताएका हुन्।
'भोलिसम्ममा हाम्रो र कांग्रेसको बैठक सकिन्छ। बैठक सकिएपछि पर्सदेखि सरकारको सन्दर्भमा सघन ढंगले छलफल हुन्छ। परिवर्तनको यो अवस्था ल्याउन माधवकुमार नेपालले नेतृत्व गरेको एमालेको पनि महत्त्वपूर्ण भूमिका छ। अहिले उहाँहरू अफ्ठेरो स्थितिमा हुनुहुन्छु', प्रचण्डको भनाइ उदृत गर्दै नेता गिरिराजमणि पोखरेलले भने, 'यो मोर्चालाई लामै समय सँगै लैजानुपर्छ। वाम लोकतान्त्रिक अभियानलाई निरन्तरता दिनुपर्छ।'
शनिबार बत्तिसपुतलीस्थित अनुपम फुडल्यान्डमा सुरु भएको बैठक भोलिसम्मका लागि स्थगित गरिएको छ। बैठकले नेताहरुको कार्यविभाजन गर्ने भएको छ।
'सांगठनिक अजेन्डा प्रस्तुत गरिएको छ। त्यसमा मुख्यतः अहिले हाम्रो कार्यविभाजन हुनेछ। प्रदेशको विभागहरुको र आवश्यक कार्यविभाजनहरु गर्नेछौं', बैठकपछि प्रवक्ता नारायणकाजी श्रेष्ठले भने।
बैठकमा प्रचण्डले राजनीतिक प्रस्ताव पनि प्रस्तुत गरेका छन्। जहाँ पुस ११, १२ र १३ गते राष्ट्रिय सम्मेलन गर्ने प्रस्ताव गरिएको श्रेष्ठले बताए। प्रचण्डको प्रस्तावमा प्रतिगमनप्रति अझै पनि सचेत हुनुपर्ने बताइएको श्रेष्ठको भनाइ छ।
बैठकमा सदस्यहरुलाई आठ वटा समूहमा विभाजन गरेर छलफल सुरु भएको छ। आठ वटै समूहलाई भोलि बिहान ११ बजेसम्मको लागि समय दिइएको प्रवक्ता श्रेष्ठले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
