काठमाडौं- अखिल नेपाल फुटबल संघ (एन्फा)का वरिष्ठ उपाध्यक्ष पंकज विक्रम नेम्वाङ र नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताइरीबीचको विवाद प्रकरणबारे छानबिन गर्न गठिन समितिले थप ६ जनाको बयान लिएको छ।
राष्ट्रिय खेलकुद परिषद् (राखेप)का बोर्ड सदस्य पुरेन्द्र विक्रम लाखेको संयोजकत्वमा रहेको ७ सदस्यीय छानबिन समितिले बिहीबार ६ जनाको बयान लिएको हो।
करिब २ घण्टा बयान दिएर फर्किएका प्रशिक्षक अलमुताइरीले आफू छानबिन समितिको अनुसन्धानसँग सकारात्मक भएको बताएका छन्।
सञ्चारकर्मीसँग भएको विवादमा प्रशिक्षक अल्मुताइरीले नेम्वाङको नाम जोडेपछि विवाद सतहमा आएको हो। जसमा प्रशिक्षकले उपाध्यक्षका कारण रहेको बताएका थिए। विवाद उत्कर्षमा पुगेपछि खेलकुद मन्त्रालयको निर्देशनमा राखेपले छानबिन प्रक्रिया अगाडि बढाएको हो। छानबिनका लागि आजै उपाध्यक्ष पंकज विक्रम नेम्वाङले करिब डेढ घण्टा बयान दिएका थिए।
प्रशिक्षक अलमुताइरी र एन्फा वरिष्ठ उपाध्यक्ष नेम्वाङसहित राष्ट्रिय फुटबल टिमका कप्तान किरणकुमार लिम्बु, नेपाल घोडचडी संघका अध्यक्ष रवी राजकर्णिकार र दुई जना सञ्चारकर्मीसँग बयान लिइएको छानबिन समितिकी सदस्य सुवर्ण केशरी श्रेष्ठले बताइन्।
यसअघि मंगलबार ३ र बुधबार ५ जनाको बयान लिएको थियो। यसअघि मंगलबार एन्फा अध्यक्ष कर्मा छिरिङ शेर्पा, एन्फा पूर्व प्रवक्ता किरण राई र राखेप अन्तर्गत फुटबलको मुख्य प्रशिक्षक अरुणा गुरुङसँग बयान लिइएको थियो।
बुधबार प्रशिक्षक बालगोपाल महर्जन र राष्ट्रिय फुटबल टिमका व्यवस्थापक मधुसुदन उपाध्याय, एन्फा उपाध्यक्ष कृष्ण थापा र वीरबहादुर खड्का र एन्फा महासचिव इन्द्रमान तुलाधरसँग समितिले बयान लिएको थियो।
छानबिन समितिले तीन दिनमा १४ जनाको बयान लिएको छ। अन्य कसैको आवश्यक परेमा बयान लिन सक्ने श्रेष्ठले जानकारी दिइन्।
अब शुक्रबारदेखि बयान र कागजातको अध्ययन गर्नेछ। ‘अब भोलिदेखि बयान र अहिलेसम्म आएको डकुमेन्टहरुको भेरिफिकेसन गर्ने काम सुरु गर्छौं,’ उनले भनिन्।
प्रशिक्षक अलमुताइरीले साउन १० गते राजीनामा दिने सामाजिक सञ्जालबाट घोषणा गरेपछि देखिएको विवाद एन्फाभित्रबाट समाधान हुन नसकेपछि आकस्मिक बैठकले युवा तथा खेलकुद मन्त्रालयमा छानबिनका लागि अनुरोध गरेको थियो।
तर, मन्त्रालयले राखेपलाई छानबिनका लागि निर्देशन दिएपछि समिति बनाएर यस विषयमा छानबिन गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
