काठमाडौं- जिल्ला अदालत धनुषाले श्रीमती र छोरीमाथि एसिड प्रहार गर्ने श्रीमान्लाई दोषी ठहर गरेको छ। जिल्ला न्यायाधीश कृष्णमुरारी शिवाकोटीको इजलासले श्रीमान्लाई दोषी ठहर गर्दै अर्को एक जनालाई सफाइ दिएको जिल्ला अदालत धनुषाका सूचना अधिकारी गंगाकुमार मिश्रले जानकारी दिए।
श्रीमान् सञ्जयकुमार साहलाई जिल्ला अदालतले एसिड प्रहार गर्दै ज्यान मार्ने अभिप्राय लिएको भन्दै दोषी ठहर गरेको हो। उनीहरुको हकमा दोषी ठहर गर्ने सजाय भएको र कति सजाय हुने भन्नेबारे फेरि अर्को दिन सोही इजलास बसेर सजाय निर्धारण गर्ने सूचना अधिकारी मिश्रले बताए।
३० कात्तिक २०७७ मा जनकपुरधाम–७ पेठियाका सञ्जीव साहले श्रीमती र छोरीमाथि एसिड प्रहार गरेका थिए। एसिड प्रहार लगत्तै प्रहरीले उनलाई पक्राउ गरेको थियो। जिल्ला अदालतले श्रीमानलाई सुरुमै पुर्पक्षका लागि थुनामा राखेको थियो।
एसिड प्रहारबाट साहकी २१ वर्षीया श्रीमती आरती र ४ वर्षीया छोरी रिया घाइते भएका थिए। आरतीलाई लक्षित गरेर प्रहार गरिएको एसिड उछिट्टिएर छोरी रिया साहको बायाँ हात पनि जलेको थियो।
छुट्टै बसेका श्रीमती र छोरीलाई उनीहरुको डेरामा पुगेर साहले एसिड प्रहार गरेका थिए। प्रहरीले उनलाई पक्राउ गरि मुद्दा चलाएको थियो। जिल्ला सरकारी वकिलको कार्यालयले एसिड प्रहार गरि अङ्गभङ्ग बनाएको आरोपमा २०७७ कात्तिक २४ गते जिल्ला अदालतमा मुद्दा दायर गरेको थियो। जिल्ला सरकारी वकिलको कार्यालयले दुवै जनालाई जनही अधिकतम सजाय र कैदको माग गरेको थियो।
श्रीमान्ले एसिड प्रहारबाट गम्भीर घाइते भएपछि आरतीको जनकपुरमा उपचार हुन नसकि काठमाडौं ल्याएर उपचार गरिएको थियो। आरतीको शरीरको २५ प्रतिशत भाग जलेको थियो। एसिडले आरतीको अनुहारको दायाँ भाग, आँखा, छाती र हात जलेको थियो। छोरी रियाको भने जनकपुरको जानकी हेल्थ केयरमा उपचारपछि डिस्चार्ज गरिएको थियो।
सरकारले एसिड आक्रमणमा संलग्नलाई कडा कारबाही गर्ने भन्दै अध्यादेश पनि ल्याएको छ। उक्त अध्यादेश अहिले प्रतिनिधि सभामा पेश भएको छ। यो अध्यादेशलाई छिटै प्रतिस्थापन विधेयक पेश गरेर कानुनको रुपमा ल्याउन सरोकारवाला निकाय र अधिकारकर्मीहरुले माग गर्दै आएका छन्।
तरकारी बेचेर गुजारा चलाउँदै आएकी आरती र सञ्जीवबीच पाँच वर्षअघि विवाह भएको थियो। बिहेको दुई वर्षपछि उनीहरू छुट्टाछुट्टै डेरा लिएर बस्दै आएका थिए। सम्पत्ति लेनदेनका विषयमा दुईजनाबीच झगडा हुँदै आएको थियो।
सम्पत्तिको कुरा नमिलएको भन्दै उनले अलग बसेकी श्रीमतीलाई डेरामा पुगेर एसिड प्रहार गर्नु अक्षम्य अपराध भएको जिल्ला अदालतको फैसलामा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787645626.png)
-1786602170.png)
-1786513116.png)
