केही दिनअगाडि जापान सरकारले नेपाललाई सहयोगस्वरुप एस्ट्राजेनेकाको खोप उपलब्ध गराएको छ। यो खोप कोभिशिल्ड लगाएर लामो समयदेखि दोश्रो डोजको पर्खाइमा बसिरहेकाहरुलाई लगाउने नेपाल सरकारले घोषणा गरिसकेको छ। र, सोमबारदेखि खोप अभियान सुरु पनि भएको छ।
अहिले धेरैले 'के कोभिशिल्ड र एस्ट्राजेनेकाको खोप एकै हुन्?' भन्ने प्रश्न गर्न थालेका छन्। 'कोभिशिल्ड लगाएका व्यक्तिले एस्ट्राजेनेकाको खोप लगाउन मिल्छ?' भन्ने प्रश्न पनि सुनिन थालेको छ।
कोभिड-१९ विरुद्धको यो खोप एस्ट्राजेनेका र अक्सफोर्ड विश्वविद्यालय मिलेर विकास गरेका हुन्। यसको अनुसन्धान/वैज्ञानिक नाम ChAdOx1 nCoV-19 (AZD1222) हो।
यो खोप भारतको 'सेरम इन्स्टीच्यूट अफ इन्डिया (एसआईआई) लाई पनि उत्पादन गर्न अनुमति प्रदान गरिएको थियो। एसआईआईले 'कोभिशिल्ड' नामबाट यो खोपको उत्पादन गरिरहेको छ।
नेपालले आफ्नो नागरिकलाई कोभिड-१९ बाट हुनसक्ने मानवीय क्षति रोक्न सर्वप्रथम कोभिशिल्ड खोप नै लगाउन शुरु गरेको थियो। हाल यो खोप 'भ्याक्सजेभ्रिया' र 'कोभिशिल्ड' गरि दुई ब्रान्डअन्तर्गत उत्पादन भइरहेको छ।
नेपालमा कोभिशिल्ड प्रचलित नाम हो। जापान सरकारले दिएको एस्ट्राजेनेकाको खोप कोभिशिल्डको पहिलो डोज लगाएर बसेकाहरुलाई दिने घोषणा गरेसँगै अन्यौल सिर्जना भयो। नेपाल सरकारले यसअघि दुई फरक खोप नलगाउन आग्रह गरिरहेको अवस्थामा अहिले दुई फरक खोप लगाउन मिल्ने कुराले अन्योल छाउनु अस्वाभाविक होइन।
धेरै जनाले यो अन्योल स्पष्ट पारिदिन आग्रह गर्दै लेखकलाई सम्पर्क गरिरहेका छन्। माथि उल्लेख गरे झैँ उही/एकै खोप दुई फरक नामले चिनिएका मात्र हुन्। अर्थात् कोभिशिल्ड वा एस्ट्राजेनेकाको खोप एकै हो। यसमा द्विविधा लिइराख्नु पर्दैन।
खोपले कोरोना संक्रमणबाट हुनसक्ने जटिल अवस्थालाई रोक्ने प्रमाणित भैसकेकोले आफ्नो पालोमा तोकिएको खोप केन्द्रमा गई सुरक्षित तरिकाले खोप लगाउन आग्रह गर्दछु।
(डा. पुन शुक्रराज ट्रोपिकल तथा सरुवारोग अस्पतालको क्लिनिकल रिसर्च युनिट संयोजक हुन्।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790143139.jpeg)
-1786602170.png)
-1789631269.jpg)
