काठमाडौं- बेलायती प्रहरीले तीन अश्वेत इंग्लिस फुटबल खेलाडीलाई नस्लीय दुर्व्यवहार गरेको आरोपमा ११ जनालाई पक्राउ गरेको छ।
प्रहरीका अनुसार पक्राउ परेकाहरुले गत महिना घरेलु मैदानमा आयोजना भएको युरोकप २०२० को फाइनलमा टीमको प्रदर्शनपछि ती तीन खेलाडीमाथि सामाजिक सञ्जालमार्फत् नश्लिय दुर्व्यवहार गरेका थिए।
पक्राउ पर्नेहरु एकबाहेक सबै पुरुष छन्। उनीहरु १८ देखि ६३ वर्ष उमेर समूहको रहेको बताइएको छ।
गत ११ जुलाईमा इटालीविरुद्धको फाइनल खेलमा पेनाल्टी शुटआउटमा पराजित भएपछि मार्कस राशफोर्ड, जाडोन सान्चो र बुकायो साकालाई उनीहरुले अनलाइनमार्फत् नश्लिय दुर्व्यवहार गरेको प्रहरीले जनाएको छ।
इंग्लिस फुटबलका प्रशिक्षक ग्यारेथ साउथगेट र बेलायती प्रधानमन्त्री बोरिस जोनसन लगायत अन्य उच्च व्यक्तित्वहरुले त्यस समयमा भएको दुर्व्यवहारको निन्दा गरेका थिए।
युके फुटबल पुलिसिङ्ग युनिट (युकेएफपीयू) यस घटनाबारे अनुसन्धान गरिरहेको छ।
युकेएफपीयु बिहीबार एक विज्ञप्ति जारी गर्दै भनेको छ,‘उक्त खेलपछि खेलाडीलाई नश्लिय दुर्व्यवहार गरेको भन्दै ६ सयभन्दा बढी उजुरी प्राप्त भएको थियो। जसमध्ये २०७ जनालाई अपराधी प्रकृतिको रुपमा पहिचान गर्यौं।’
प्रहरीका अनुसार घटनासँग सम्बन्धित ३४ एकाउन्ट प्रयोगकर्ता पहिचान गरिएको थियो। तीमध्ये ११ जनालाई पक्राउ गरिएको छ।
यूकेएफपीयूले बाँकी ५० एकाउन्ट प्रयोगकर्ताहरुको बारेमा अनुसन्धान अगाडी बढाएको छ। यस्तै, यूकेएफपीयूले १२३ एकाउन्ट प्रयोगकर्ताहरु भने बेलायत बाहिरका रहेको जनाएको छ।
ती व्यक्तिको विवरण सम्बन्धित अधिकारीहरुलाई कारबाही गर्नको लागि हस्तान्तरण गरिने युकेएफपीयूले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
