काठमाडौं- अखिल नेपाल फुटबल संघ (एन्फा) र प्रशिक्षक अब्दुल्लाह अलमुताइरीबीचको विवाद छानबिनका लागि राष्ट्रिय खेलकुद परिषद् (राखेप)ले समिति गठन गरेको छ।
राष्ट्रिय फुटबल टिमका मुख्य प्रशिक्षक अलमुताइरी र एन्फाका वरिष्ठ उपाध्यक्ष पंकज नेम्वाङबीचको विवाद छानबिन राखेपले मंगलबार समिति गठन गरेको छ।
राखेपको कार्यकारी समितिको बैठकले बोर्ड सदस्य पुरेन्द्रविक्रम लाखेको संयोजकत्वमा ७ सदस्यीय समिति गठन गरेको हो।
समितिमा चन्द्र बन्दना राई, अर्जुन बिक, रेनुका नगरकोटी, सुर्वण श्रेष्ठ, नारायण अर्याल र सरोज पोखरेल सदस्य रहेका छन्।
राखेपले समितिलाई ७ दिन भित्र छानबिनको प्रतिवेदन बुझाउन निर्देशन दिएको छ।
केही समय अघि सञ्चारमाध्यममा दिएको अन्तर्वार्तामा प्रशिक्षक अमुताइरीले नेपालमा खेलाडीसँगै खेलकुद पदाधिकारीहरुको मानसिकता पनि परिर्वतन हुनुपर्ने अभिव्यक्ति दिएका थिए।
त्यसपछि प्रशिक्षकले यसरी बोल्नु अनुशासन उल्लंघन भएको भन्दै एन्फाका वरिष्ठ उपाध्यक्ष नेम्वाङ लगायतले कारबाहीको माग गरेका थिए।
त्यसपछि प्रशिक्षक अलमुताइरीले गत आइतबार वरिष्ठ उपाध्यक्ष नेम्वाङ कारण आफूले राजीनामा दिने घोषणा गरेका थिए ।
एन्फाले प्रशिक्षक र वरिष्ठ उपाध्यक्षको निवेदनमाथि छलफल गर्न आकस्मिक कार्यसमिति बैठक आह्वान गरेको थियो ।
त्यहि बैठकले विवाद छानबिनका लागि युवा तथा खेलकुद मन्त्रालयलाई जिम्मा लिने निर्णय गरेको थियो।
तर, मन्त्रालयले सोमबार राखेपलाई छानबिनका लागि निर्देशन दिएको छ। यद्यपि, सोमबार प्रशिक्षक अलमुताइरीले नेपाली राष्ट्रिय टिम र पूर्वखेलाडी तथा प्रशिक्षकहरुको विषयमा बोल्दा कतिपयलाई चोट पुगेको स्वीकार गर्दै आफ्नो मनसाय कसैलाई चोट पुर्याउने नरहेको भन्दै माफी मागेका थिए।
उक्त माफीसँगैप्रशिक्षक र बरिष्ठ उपाध्यक्षको विवाद मिलिसकेको एन्फा स्रोतले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
