काठमाडौं- अखिल नेपाल फुटबल संघ (एन्फा) को प्रवक्ताबाट राजीनामा दिएका किरण राईले ‘अर्ली चुनाव’को माग गरेका छन्। ३ वर्ष एन्फाको प्रवक्ताको जिम्मेवारी सम्हालेका राईले सातदोबाटोस्थित एन्फा मुख्यालयमा सोमबार पत्रकार सम्मेलन गरेर चुनावको माग गरेका हुन्।
राष्ट्रिय टोलीका मुख्य प्रशिक्षक अब्दुल्लाह अलमुताइरीले वरिष्ठ उपाध्यक्ष पंक्रजविक्रम नेम्वाङले नाटक गरेको भन्दै सामाजिक सञ्जालमार्फत् राजीनामाको घोषणा गरेको घटनाबाट प्रवक्ता राई रुष्ट थिए।
पछिल्लो समय एन्फा कार्यसमिति दुई खेमामा बाँडिदा तटस्थ देखिएका उनले शनिबार राति फेसबुकमा स्टेटस लेख्दै प्रवक्ताको जिम्मेवारी त्याग्ने घोषणा गरेका थिए। यद्यपि, उनले आज राजीनामा बुझाएका हुन्।
‘एन्फाभित्र जुन शक्तिसंघर्ष चलेको छ, यसको समाधान देखिँदैन। वर्तमान फुटबलको समाधान चुनावबाट मात्र निस्कने देखेको छु’ उनले भने, ‘चाँडो जिल्ला र प्रदेश अधिवेशन सकेर ६/७ महिनाभित्र चुनाव गर्नुपर्छ।’
पछिल्लो समय जालझेल र षड्यन्त्र उत्कर्षमा पुगेको बताउँदै उनले फुटबल विकासका लागि सबै जना रोकिनुपर्ने अवस्था आएको पनि बताए।
‘राजनीति र फुटबलको गतिविधि दुई फरक धारबाट जानुपर्छ। फुटबल पदाधिकारी तल्लो स्तरको गालीगलौजमा जानु हुँदैन। फुटबलभित्र जे जालझेल भइरहेको छ त्यो गम्भीर छ। तर, अब प्रशिक्षक, अध्यक्षज्यूपक्ष, पंकजीको पक्ष यहीँ रोकिनुपर्छ। थप विवाद चर्काउनु हुँदैन,’ उनले भने।
पछिल्ला निर्णयहरुमध्ये वरिष्ठ उपाध्यक्ष नेम्वाङ र मुख्य प्रशिक्षक अलमुताइरीबीचको विवादको सहजै समाधान खोज्न सकिने अवस्थामा युवा तथा खेलकुद मन्त्रालय गुहार्ने एन्फा कार्यसमितिको निर्णयले गलत भएको उनकाे जिकिर छ।
‘विधानमा सबै कुरा स्पस्ट छ। राष्ट्रिय र अन्तर्राष्ट्रिय नियम र फुटबलको मर्मअनुसार फुटबल भित्रको समस्या फुटबल भित्रबाट हल गर्नुपर्छ भन्ने मान्यता छ। गर्नु पनि त्यही पर्थ्यो। सहजै समाधान हुनसक्थ्यो। मन्त्रालयलाई छानबिन गर्न दिने केन्द्रीय कमिटीले निर्णय लियौं। यो गल्ती हो,’ राईले भने।
राईले यो छानबिन मन्त्रालयबाट राष्ट्रिय खेलकुद परिषद् हुँदै फेरि एन्फामै आएर ठोक्किनेसमेत ठोकुवा गरेका छन्।
यस्तै, उनले आफू अगाडि कुनै खेमामा पनि नजाने भन्दै आफूसँग सहीलाई सही र गलतलाई गलत भन्नसक्ने हैसियत भएको बताएका छन्। यद्यपि, जिम्मेवारीमा बसेर स्वतन्त्रपूर्वक धारणा राख्न नसकिने भएकाले आफू बाहिर आएको प्रष्टोक्ति दिए।
‘स्वतन्त्रपूर्वक विचार राख्न पर्ने भएकाले राजीनामा गरेको बाहिर आएको हुँ। यसमा कसैलाई दोषारोपण गर्न चाहन्नँ। केन्द्रीय सदस्य पदमा भने यथावत् छ। यसलाई निरन्तरता दिन्छु,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
