काठमाडौं- अखिल नेपाल फुटबल संघ (एन्फा)ले वरिष्ठ उपाध्यक्ष पंकज विक्रम नेम्वाङ र राष्ट्रिय फुटबल टोलीका मुख्य प्रशिक्षक अब्दुल्लाह अलमुताइरीको विवादबारे छानबिन गर्न युवा तथा खेलकुद मन्त्रालयलाई जिम्मा दिएकाे छ।
एन्फा कार्यसमितिको शुक्रबार बसेको आकस्मिक बैठकले उनीहरु दुवैले घटनाकाे सत्यतथ्य छानबिन गर्न दिएकाे निवेदनका सम्वन्धमा कुनै निर्णय लिन नसकेपछि मन्त्रालयलाई पत्र लेखेको प्रवक्ता किरण राईले जानकारी दिए।
‘घटनाको सत्यतथ्य छानबिन होस् भनेर मन्त्रालयलाई पत्र लेखेका छौं। उतैबाट यो विवादको निर्णय हुन्छ,’ उनले भने।
वरिष्ठ उपाध्यक्ष नेम्वाङ र मुख्य प्रशिक्षक अलमुताइरीले एकअर्काविरुद्ध छानवबिनको माग गर्दै एन्फामा निवेदन दिएका थिए। तर, नेम्वाङसहित केही पदाधिकारी बैठक चल्दाचल्दै बाहिरिएका थिए।
दुई सञ्चारकर्मीबीच भएको विवादमा वरिष्ठ उपाध्यक्ष नेम्वाङको भूमिका रहेको प्रशिक्षक अलमुताइरीले आरोप लगाएका छन्।
उनले आइतबार सामाजिक सञ्जालमा समर्थकलाई सम्बोधन गर्दै वरिष्ठ उपाध्यक्ष नेम्वाङका कारण आफूले राजीनामा दिन लागेको घोषणा गरेका थिए। यद्दपी, उनले लिखित राजीनामा भने दिएका छैनन्।
यता, नेम्वाङले भने एन्फाको निर्वाचनलाई प्रभावित गर्नेगरि प्रशिक्षकलाई आफूमाथि प्रयाेग गरिएकाे आराेप लगाएका छन्। उनले यही बिषयमा छानबिनका लागि एन्फा केन्द्रिय समितिको बैठक माग गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
