काठमाडौं– नेकपा एमालेमा बुधबार रातिदेखि नयाँ घटनाक्रम विकास भएको छ। एमाले उपाध्यक्ष भीम रावलसहित दोस्रो तहका नेताहरुको बुधबार रातिदेखि बिहीबारसम्मको सक्रियतासँगै शीर्ष नेताद्वय, अध्यक्ष केपी शर्मा ओली र वरिष्ठ नेता माधवकुमार नेपाल संवाद गर्न राजी भएका छन्।
दोस्रो तहका नेताहरुले अध्यक्ष ओली र वरिष्ठ नेता नेपाललाई बिहीबार भेटेर संवादबाट समाधान खोज्न दबाब दिएका थिए। सोही दबाबस्वरुप उनीहरु संवाद गरेर सहमतिको प्रयासका लागि तयार भएका हुन्।
बुधबार रातिदेखि सक्रिय दोस्रो तहका नेताहरुले बिहानै बालकोट पुगेर अध्यक्ष ओली र कोटेश्वर पुगेर नेपालसँग भेट गरेका थिए। बालकोटमा उनीहरुले झन्डै चार घन्टा छलफल गरेको स्रोतले बताएको छ। उक्त छलफलबाट आफू उत्साहित भएको सहभागी एक नेताले बताए। उनले भने, ‘अहिले यत्ति संकेत गरें, हामीले एकताका लागि निरन्तर गरिरहेको प्रयास खेर नजाने ठाउँमा पुग्न थालेको छ।’
ओलीलाई संवादका लागि राजी बनाएपछि उनीहरुले नेपाललाई भेटेका थिए। समस्या समाधानको बिन्दु पहिल्याएर एकता प्रक्रियालाई अघि बढाउन ओली राजी भएको सन्देश नेपाललाई दिएका थिए। त्यसपछि दुवै नेताहरुले समय मिलाएर भेट्ने सहमति भएको थियो।
उक्त छलफलमा सहभागी एमाले नेता सुवासचन्द्र नेम्वाङले भने, ‘आज वा भोलि भेट्ने हो भनेर भन्नुभएको छ। भरसक आजै भेट्ने कुरा थियो।’
संवादपछि ‘आममाफी’ घोषणा
एकता प्रयासमा सकारात्मक पहल अघि बढेपछि एमालेको केन्द्रीय कमिटी बैठकले बिहीबार साँझ एकता प्रयासलाई कायम राख्ने निर्णय गरेको छ। त्यसअघि ओलीले नेपाल पक्षलाई लक्ष्य गर्दै ‘आममाफी’ दिने घोषणा गरेका थिए।
नेपाल पक्षलाई स्पष्टिकरण समेत सोधेर जवाफ आइरहेको समयमा उनले भने, ‘बाटो बिराएका र भड्किएकालाई आममाफी भयो।’ यसैगरी त्यहीँ उनले एकताका लागि आह्वान समेत गरे। पुष्पलालबाट प्ररेणा लिएर एकजुट हुँदै अघि बढ्नुपर्ने बताए।
उनले भने, ‘पद र स्वार्थका कुरा छाडौं। देशका कुरा गरौं। एकताका कुरा गरौं। आउनुहोस् मिलेर काम गरौं।’ मिलेर काम गरेर पार्टीलाई मजबुत बनाउनुपर्ने बताउँदै उनले एकजुट हुन आह्वान गरेका हुन्। उनले थपे, ‘आउनोस् मिलेर काम गरौं। यस आन्दोलन मजबुत पारौं। एकजुट भएर जाउँ।’
त्यसलगत्तै बसेको केन्द्रीय कमिटीको समापन बैठकले एकताका लागि भइरहेका छलफल कायम राख्ने निर्णय गर्यो। बैठकपछि प्रवक्ता प्रदीप ज्ञवालीले, ‘आज बैठकको समापन मात्रै थियो, मूलतः पार्टीको एकतालाई कायम राख्नका निम्ति भइरहेको छलफलका विषयमा थप छलफल गरेका छौं। एकताका प्रयासलाई निरन्तरता दिने निर्णय गरेका छौं।’
नेपाल पक्षप्रति खास सकारात्मक रुपमा प्रस्तुत नभएको बैठकले आकस्मिक रुपमा सवैलाई समेट्न अधिकतम प्रयत्न गर्ने निर्णय गर्नुका पछाडि त्यही संवादको भूमिका रहेको थियो।
रोकियो नेपालको स्पष्टिकरण र रावलको राजिनामा
बिहीबार दिउँसो विकसित यी घटनाक्रमपछि एमालेका वरिष्ठ नेता नेपालले ओलीलाई पठाउन तयार पारिसकेको स्पष्टिकरण पत्रको जवाफ रोकिएको छ। प्रधानमन्त्री शेरबहादुर देउवालाई विश्वासको मत दिने २२ जना एमाले सांसदलाई बुधबार मात्रै स्पष्टिकरण पत्र थमाइएको थियो। उनीहरुलाई २४ घन्टाभित्र जवाफ दिन भनिएको थियो।
नेपाल पक्षले बिहीबार स्पष्टिकरणको जवाफ तयार गर्यो। नेपालनिकट कानुन व्यवसायीहरुले उक्त जवाफको ड्राफ्ट गरेका थिए। नेपालको समेत जवाफ तयार भएपनि बुझाउने समयमा भने रोकियो। अन्य सांसदलाई भने संवादको वातावरण बनिरहेको विषयमा जानकारी गराइएन। जानकारी नपाएका १९ सांसदले स्पष्टिकरण पेश समेत गरिसकेका छन्। स्पष्टिकरणका विषयमा एमालेका प्रमुख सचेतक विशाल भट्टराईले भने, ‘माधव नेपालसहित ३ जनाको आउन बाँकी छ। १९ जनाको प्राप्त भइसक्यो।’ उनले पनि संवाद सकारात्मक दिशामा अघि बढिरहेकाले नेपालको स्पष्टिकरण नआएको संकेत गरे।
यसैगरी साउन ३ गते प्रधानमन्त्री शेरबहादुर देउवाले विश्वासको मत लिनुअघि सांसद पद र पार्टी उपाध्यक्षबाट राजिनामा घोषणा गरेका रावल निष्क्रिय थिए। बुधबार बेलुकी वरिष्ठ नेता नेपालसँगको भेटपछि उनले एकताका लागि फेरि प्रयत्न गर्ने बताएका थिए। नभन्दै रातिदेखि नै उनी सक्रिय भए।
नेताहरुबीच संवादको वातावरण बनेपछि भने अब रावलले सभामुखलाई बुझाएको राजीनामा फिर्ता लिने भएका छन्।
कहिले आउला ‘सरप्राइज’ !
संवादमा सक्रिय नेताहरुका अनुसार अघिल्ला वार्ताहरु भन्दा यसपल्ट मिलनबिन्दू स्पष्ट देखिएको छ। त्यसैले एक दुई दिनमै एमालेको अन्तरद्वन्द्वमा ‘सरप्राइज’ आउने दाबी गरिएको छ। बिहीबार बिहान पुष्पलालको ४३औं स्मृति दिवसको अवसरमा पुष्पलाल स्मृति प्रतिष्ठान चम्पादेवीमा आयोजित कार्यक्रममा बोल्दै एमाले वरिष्ठ नेता नेपालले अब अपमान सहेर एमालेमा नबस्ने बताएका थिए। उनले परिस्थिति के हुन्छ भनेर आफूले हेरिरहेको बताउँदै भनेका थिए, ‘आफूले बनाएको घर त्यसै छाडेर जाने चाहना कसैको हुन्न। तर, अपमान सहेर, गलत कुरा सहेर बस्न सकिँदैन।’
उनलाई स–सम्मान एमालेमा आउने वातावरण बन्न थालेको बताइएको छ। त्यसका लागि नेपाललाई अधिकारसहितको दोस्रो अध्यक्ष वा संसदीय दलको नेता बनाउने संकेत एक नेताले गरे। नेपालले भने रावललगायतलाई ‘हस्ताक्षर चल्ने अध्यक्ष’ आफ्नो बटमलाइन भएको बताएको उल्लेख गर्दै उनले भने, ‘संसदीय दलको नेता तत्काल चुुन्न सकिने भएकाले अहिलेलाई यही बाटोबाट ‘पावर सेयरिङ’ गर्ने र पछि दोस्रो अध्यक्ष समेत बनाएर अघि बढ्ने सहमति पनि हुन सक्छ, तर यसमा कुरा हुन बाँकी छ।’
बुधबार साँझ रावललाई भेट्न टोखास्थित निवासमै पुगेका वरिष्ठ नेता नेपालसमक्ष रावलले आफूले एकताका लागि ठूलो प्रयत्न गरेको तर त्यसको स्वामित्व नलिइदिएर नेपाललेसमेत आफ्नो ‘चित्त दुखाएको’ गुनासो गरेका थिए। बिहीबार बिहानै रावल नेपाललाई भेट्न एमालेका दोस्रो तहका अरु नेतासहित कोटेश्वरस्थित निवासमा पुगे। त्यसक्रममा पनि रावलले ‘पार्टी म मिलाउँछु, तपाईंले मलाई विश्वास गर्नुस्’ भनेका थिए। ‘त्यसपछि माधव नेपालले आफ्ना बटमलाइन पनि प्रष्टसँग राख्नुभो र अघि बढ्नुस् भन्नुभो’, रावलनिकट स्रोतले नेपाल लाइभसँग भन्यो, ‘त्यसपछि उहाँहरु अध्यक्ष ओलीलाई भेट्न जानुभो, माधव नेपालका कन्सर्नहरु पनि सुनाउनुभो, त्यसमा ओली पनि सकारात्मक देखिनुभएको छ।’
त्यो ‘सकारात्मक संकेत’को पटाक्षेप बिहीबार नै ओली–नेपाल भेटवार्तामार्फत् गराउने तयारी भए पनि बिहीबार भने त्यो सम्भव भएन। विघटित कार्यदलका सदस्यहरुबीचमै ‘मुलभुत समझदारी’ गरिसकेपछि ओली र नेपालबीच भेट हुने लगभग तय भएको छ। तर, यसबीचमै सकेसम्म चाँडै दुवै नेताको भेट गराउन आफूहरु प्र्रयासरत रहने कार्यदलका एक सदस्यले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
