काठमाडौं- गत जेठ २५ गते बौद्धस्थित नयाँबस्तीमा मान्छेको खुट्टाको भाग मात्रै भेटिएको घटना हत्या नभएको प्रहरीले निष्कर्ष निकालेको छ। घुँडाभन्दा मुनिको शवको अवशेषको भागका बारेमा अनुसन्धानमा जुटेको प्रहरीले शवको उक्त अवशेष हत्यापछि फालिएको नभएको निष्कर्ष निकालेको हो।
घुँडाभन्दा मुनिको शवको अवशेष भेटिएपछि प्रहरी वृत्त बौद्ध, महानगरीय अपराध महाशखा, महानगरीय प्रहरी परिसर काठमाडौंले अनुसन्धान सुरु गरेका थिए। सँगै केन्द्रीय अनुसन्धान ब्यूरो (सीआईबी)ले पनि घटनाको अनुसन्धानमा प्राविधिक सहयोग गरेको थियो। यी चार प्रहरी युनिटले एक महिना लामो अनुसन्धानपछि उक्त घटना हत्या नभएको निष्कर्ष निकालेका हुन्।
विभिन्न प्राविधिक पाटोको अनुसन्धान, म्यानुअल अनुसन्धान, घटनास्थितको विश्लेषण, पोष्टमार्टम रिपोर्ट लगायतबाट उक्त घटना हत्या नभएको निष्कर्ष निकालिएको महानगरीय अपराध महाशाखा प्रमुख, प्रहरी वरिष्ठ उपरीक्षक (एसएसपी) चन्द्रकुवेर खापुङले नेपाल लाइभलाई बताए। खुट्टामुनिको अवशेषको अनुसन्धानमा जुटेको प्रहरीले हत्या नभएर कालगतीले नै मृत्यु भएका व्यक्तिको अवशेष भएको निष्कर्ष निकालेको छ।
घुँडाभन्दा मुनिका खुट्टाको भाग भेटिएको र त्यसको पनि हड्डी भने थिएन। मासु छिलेर निकाले जसरी हड्डी बिनाको मासुको भाग मात्रै नयाँबस्तीमा फ्याँकेको पाइएपछि प्रहरीले हड्डी निकाल्नकै लागि कालगतीले मरेका व्यक्तिको शवबाट कसैले निकालेको हुनसक्ने निष्कर्ष निकालेको छ।
कालगतीले नै मृत्यु भएका व्यक्तिको उचित तरिकाले सद्गद् गर्न नसक्दा मृत व्यक्तिको हड्डी कुनै लामा, धामी तथा झारफुकको काम गर्ने व्यक्तिले निकालेको हुनसक्ने प्रहरीले निष्कर्ष निकालेको छ। ‘एउटा खुट्टाको हड्डी छैन। अर्को खुट्टाको पनि हड्डी खुर्केर निकालिएको बाँकी रहेको अवशेषबाट देखिन्छ’ एसएसपी खापुङले भने, ‘जसरकारण हत्या भन्दा पनि कालगतीले नै मृत्यु भएका व्यक्तिको कसैले हड्डी निकालेको हो भन्ने हामीले निष्कर्ष निकालेका छौं।’
यता घटनाको अनुसन्धान गरिरहेको प्रहरी परिसर काठमाडौंले पनि हत्या नभएको निष्कर्ष निकालेको छ। मासु छिलेर हड्डी मात्रै निकालिनु र अहिलेसम्म कुनै व्यक्ति पनि आफन्त हराएको भनेर नआउनुले उक्त घटना हत्या नभएको हुनसक्ने परिसर काठमाडौंका एसएसपी अशोक सिंह बताउँछन्।
अवशेष करिब ७ साता पुरानो रहेको फरेन्सिक विज्ञले बताएका थिए। यदि व्यक्तिको हत्या भएको भए हराएको तीन साता हुँदासम्म उनका आफन्त प्रहरीकहाँ पुगिसक्नु पर्ने, शवको अन्य भाग नभेटिनु र घुँडामुनिको भाग मात्रै घनाबस्तीको बीचमा भेटिनुले हत्यापछिको शव व्यवस्थापन हुन नसक्ने प्रहरीको निष्कर्ष रहेको छ।
‘अनुसन्धानबाट पनि हत्या भएपछि शव व्वस्थापन गरेजस्तो देखिँदैन र घटना सार्वजनिक हुँदा पनि अहिलेसम्म व्यक्ति हराएको भन्दै प्रहरीमा कोही नआउनुले हत्या हो भन्ने सक्ने अवस्था छैन’ एसएसपी सिंहले भने।
घुँडाभन्दा मुनिको अवशेष भेटिएपछि अनुसन्धानमा जुटेको प्रहरीले अवशेषको पोष्टमार्टमदेखि डिएनएसम्म जनाँचका लागि त्रिवि शिक्षण अस्पताल पठाएको थियो। डिएनए जाँचबाट उक्त अवशेष महिलाको भएको पुष्टि भएको थियो। त्यसपछि हराएका महिलाको विवरणअनुसार प्रहरीले खोजी गरेको थियो। तर, त्यसतर्फ पनि कुनै संकेत प्रहरीले फेला पार्न सकेको थिएन।
अनुसन्धानको क्रममा खुट्टा भेटिएकै ठाउँ नजिक चार जनाले एउटा बोरा फ्याँकेको सीसीटिभी फुटेज प्रहरीले फेला पारेको थियो। यसलाई केन्द्रमा राखेर अहिले प्रहरीले अनुसन्धान गरेपनि बोरा फ्याँक्ने मान्छेको पहिचान अहिलेसम्म हुन सकेको छैन।
सीसीटिभी फुटेजमा ती चार युवा भने प्रष्ट नदेखिएकाले अनुसन्धानमा समस्या भएको प्रहरीले जनाएको छ। ‘रातिको समयमा बोरा फ्याँकेको देखिन्छ। तर, उनीहरुको अनुहार प्रष्ट देखिँदैन। उनीहरु को हुन्? के फ्याँके भन्नेबारे खुल्न बाँकी छ’, एसएसपी सिंह बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
