काठमाडाैं- युरोकप २०२० को उपाधिका लागि आज राति इङ्ल्यान्ड र इटालीबीच प्रतिस्पर्धा हुँदैछ। खेल लन्डनस्थित वेम्बली रंगशालामा नेपाली समयअनुसार राति १२:४५ बजे सुरू हुनेछ।
यी दुई टाेली पहिलोपटक युरोकपको फाइनलमा प्रतिस्पर्धा गर्न लागेका हुन्। मुख्य प्रतियोगितामा इङ्ल्यान्डले ५५ वर्षपछि फाइनल खेल्न लागेको हो।यसअघि इङ्ल्यान्डले युरो १९६८ र १९९६ तथा विश्वकप १९९० र २०१८ को सेमिफाइनल पुगेर हार बेहोरेको थियो।
यस्तै,सन् २०१९ को नेसन्स लिगमा पनि सेमिफाइनलमै पराजित भएको थियो। त्यसअघि इङ्ल्यान्डले १९६६ को विश्वकप जितेको थियो। यो नै इङ्ल्यान्डको पहिलो र एक मात्र ठूलाे उपाधि हो।
यता, चार पटकको विश्वकप विजेता इटालीले युरोकप भने एक पटक मात्र जितेको छ। सन् १९६० देखि सुरु युरोकपको तेस्रो संस्करणको आयोजना गर्दा इटालीले सन् १९६८ मा उपाधि नै जितेको थियो। तर, १९८० मा दोस्रो पटक आयोजक बन्दा भने इटाली सेमीफाइनलबाटै बाहिरिएको थियो। त्यसबाहेक सन् २००० र २०१२ को फाइनल पुगे पनि उपविजेतामा सिमित भयाे।
इटालीले पछिल्लोपटक २००६ मा विश्वकप जितेको थियो। इटाली पछिल्ला ३३ खेलमा अपराजित छ। जारी युरोकपको सेमीफाइनलमा इटालीले स्पेनलाई टाई ब्रेकरमा पराजित गरेको थियो। यी दुईबीचको खेल निर्धारित र अतिरिक्त समयमा १-१ गोलको बराबरीमा सकिएको थियो।
इङ्ल्यान्डले भने सेमिफाइनलमा डेनमार्कमाथि २-१ को जित निकालेर फाइनलमा स्थान बनाएको हो। युरोकपमा पहिलोपटक च्याम्पियन बन्ने लक्ष्यमा रहेकाे इङ्ल्यान्ड पछिल्लो १२ खेलमा अपराजित छ।
यी दुई टोली हालसम्म २७ खेलमा आमने–सामने भइसकेका छन्। जसमा इटाली ११ खेलमा विजयी भएको छ भने इङ्ल्यान्डले आठ खेल आफ्नो पक्षमा पारेको छ। आठ खेल बराबरीमा सकिएको छ। सन् २०१५ यता यी टोली दुई पटक मात्र खेलेका छन्। दुवै खेल १–१ गोलको बराबरीमा सकिएका थिए।
के भन्छन् प्रशिक्षक ?
इङ्ल्यान्डका मुख्य प्रशिक्षक ग्यारेथ साउथगेट फाइनल जित्नकै लागि खेल्ने बताउँछन्। ‘हामी फाइनलमा छौं। तर, हामीलाई अर्को एक ठूलो अवरोध छ। इटाली उत्कृष्ट टिम हो। पछिल्लो दुई वर्ष उनीहरु उत्कृष्ट लयमा छन्। तर, हामी जित्नकाे लागि खेल्छाैं,’ उनले भने। यसपटक इङ्ल्यान्डसँग लयमा रहेका कप्तान ह्यारी केन, रहिम स्टर्लिङ, बुकायो साका जस्ता खेलाडी छन्।
केन र स्टर्लिङलाई गोल्डेन बुट जित्ने अवसर छ। केनले क्रिस्टियानो रोनाल्डोलाई उछिन्दै गोल्डेन बुट जित्न कम्तीमा दुई गोल आवश्यक छ। स्टर्लिङलाई पनि गोल्डेन बुट जित्न तीन गोलको खाँचो छ।
इङ्ल्यान्डसँग च्याम्पियन्स लिग जितेका चेल्सीका दुई खेलाडी रिस जेम्स, बेन चिलवेल र मेसन माउन्टसमेत छन्। माउन्ट रोजाइमा परे पनि युरोकपमा जेम्स र चिलवेलले खासै अवसर पाएका छैनन्। प्रशिक्षक साउथगेटका लागि यी खेलाडी खेलको अन्त्यतिर उतार्ने विकल्प छ।
यता, पछिल्लो तीन वर्ष अपराजित रहेकाे इटालीका मुख्य प्रशिक्षक रोबर्टो मान्सिनी यस उपाधिका लागि लामो समयदेखि आफूले मेहनत गरिरहेकाे बताउँछन्। कुनै हालतमा याे माैका खेर नफाल्ने उनको दाबी छ। ‘हामीले धेरै वर्षदेखि यसका लागि मेहनत गरिरहेका छौं। त्यसैले हामी धेरै खुसी छौं र खेलाडीहरूलाई यस कामका लागि धन्यवाद दिन चाहन्छु,’ उनले भने, ‘हामीले अहिलेसम्म केही जितेनौं। अब जित्नु पर्नेछ।’
इङ्लिस प्रिमियर लिग उपाधि जितेको अनुभव भएका मान्सिनीसँग युरोपका ठूला केही क्लब सम्हालेको इतिहास पनि छ। उनी खेलाडी छँदा जस्तै प्रशिक्षकमा पनि खारिएका छन्। उनले टीमको मध्यपंक्ति स्तरीय र अनुभवी बनाएका छन्। मार्को भेराट्टी मध्यपंक्तिका विश्वस्तरीय खेलाडी हुन्।
जोर्गिन्हो युरोपेली च्याम्पियन्स लिग विजेता टीम चेल्सीका सदस्य हुन्। उनी टिमको रक्षापंक्तिको ठीकअगाडि रहेर खेल्छन्। यस्तै, २४ वर्षका निकोलो बरेला इटालीको लिग विजेता इन्टर मिलानका सदस्य हुन्। यिनै तीन खेलाडीमा इटालीको मध्यपंक्ति टिकेको छ।
यद्यपि, मान्सिनीले घरेलु टीमसँग फाइनलमा ध्यान दिएर खेल्ने बताए। ‘इङ्ल्यान्डको पछाडि पूरै स्टेडियम हुनेछ। उनीहरुले हामीलाई दबाबमा राख्ने छन्। फाइनल अन्य खेलभन्दा फरक हुन्छ। हामीले ध्यान दिएर खेल्नु पर्छ,’ उनले भने।
इङ्ल्यान्डका समर्थकको संख्या मात्र नभएर उनीहरुको व्यवहार पनि इटालीका खेलाडीका लागि चुनौती हुनसक्छ। सेमीफाइनलमा डेनमार्कविरुद्धको खेलमा इङ्ल्यान्डका दर्शकको व्यवहार विवादित बनेको थियो। इङ्ल्यान्डका ह्यारी केनले पेनाल्टी प्रहार गर्नुअघि डेनमार्कका गोलरक्षक क्यास्पर स्माइकलको ध्यान भंग गर्न इङ्लिस समर्थकले मानव स्वास्थ्यका लागि खतरनाक मानिएको ‘लेजर लाइट’ उनका आँखामा पर्ने गरी बालिदिएका थिए।
घरेलु टाेलीविरुद्ध इटालीका खेलाडीकाे रणनीति के छ?
भेराट्टी स्पेनविरुद्ध सेमिफाइनल खेल्नु र इङ्ल्यान्डको सामना गर्नुमा फरक रहेकाे बताउँछन्। ‘फाइनलमा मध्यपंक्तिको खेल नै निर्णायक साबित हुनसक्छ। सायद हामी यो क्षेत्रमा केही अगाडि छौं र खेलमा फरक पार्न सक्छौं। हामीले खेललाई गति दिन सक्नुपर्छ ,’ उनले भने।
यता, इटालीका लियोनार्दो बोनुची युरोकपको फाइनल इङ्ल्यान्डको घरेलु मैदानमा खेल्दा कुनै डर नहुने बताउँछन्। ‘त्यहाँ धेरै इंङ्लिस टीमका समर्थक रहन्छन्। तर, एक हजार इटालियन समर्थकलाई वेम्बली रंगशालामा प्रत्यक्ष खेल हेर्न अनुमति प्रदान गरिएको छ। यसले हामीलाई अतिरिक्त प्रेरणा दिनेछ,’ बोनुची भन्छन्।
बोनुचीले फाइनल खेललाई युवाविरुद्ध बूढो मान्छेको भिडन्तको रुपमा व्याख्या गरेका छन्। ‘उनीहरुसँग निकै आक्रमक खेलाडी छन्। हामीले उनीहरुलाई ध्यान दिन आवश्यक छ,’ उनले भने, ‘हामीलाई पार्नसक्ने अफ्ठ्याराका विषयमा जानकार छौं।’
-एजेन्सीको सहयोगमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
