काठमाडाैं- फिफा वरीयतामा चौथो स्थानमा रहेको इंग्ल्यान्ड युरोपको प्रतिष्ठित महादेशीय फुटबल प्रतियोगिता, युरोकपको यस्तो ‘अनलक्की’ टोली हो, जो जुनसुकै ठूलो प्रतियोगितामा दाबेदारको रुपमा रहन्छ। तर, सन् १९६६ को विश्वकप विजेता इंग्ल्यान्डले अहिलेसम्म युरोकप उपाधि जित्न सकेको छैन।
२०१८ को विश्वकपमा इंग्ल्यान्ड सेमिफाइनल पुगेको थियो। गारेथ साउथगेटको प्रशिक्षणमा रहेको इंग्ल्यान्डले अनपेक्षित रूपमा सेमिफाइनलसम्म यात्रा गरेको थियो। इंग्ल्यान्ड यहाँसम्म पुग्नेछ भनेर कमैलाई विश्वास थिएन।
तर, क्रोएसियासँग सेमिफाइनलमा पराजित हुँदै टोली बाहिरियो। यसपटक हृयारी केनको नेतृत्वमा रहेको इंग्लिस टोलीलाई अहिलेसम्म प्राप्त गर्न नसकेको त्यही उपलब्धि हात पार्ने राम्रो अवसर मिलेको छ।
त्यसका लागि इंग्लिस टोलीले जारी युरोकपको दोस्रो सेमिफाइनल खेलमा बुधबार घरेलु मैदानमा डेनमार्कसँग खेल्दै छ।
खेल नेपाली समय अनुसार राति १२:४५ बजे शुरु हुनेछ। यो खेलले इंग्ल्यान्डले नयाँ इतिहास रच्ने वा फेरि पनि ‘अनलक्की’ ठहरिने निर्णय गर्नेछ। युरोकपमा इंग्ल्यान्ड योसहित तेस्रोपटक सेमिफाइनलमा पुगेको छ।
१९९० र २०१८ को विश्वकपमा अन्तिम चारमा रोकिएको इंग्ल्यान्ड युरोकप १९६८ र १९९६ मा पनि फाइनल पुग्न सकेको थिएन। २०१९ को यूईएफए नेसन्स लिगमा पनि इंग्ल्यान्ड नेदरल्यान्ड्ससँग सेमिफाइनलमा पराजित भएको थियो।
अघिल्लो दुवैपटक सेमिफाइनल चरणमै रोकिएको इंग्ल्यान्डले यसपटक फाइनल पुग्दै नयाँ इतिहास रच्नका लागि निश्चित मिहिनेत गर्नेछ। यदि इंग्ल्यान्डले खेल जितेमा युरो फाइनल पुग्ने १३ औं राष्ट्र बन्नेछ भने सन् २००४ पछि पहिलो नयाँ टिम बन्नेछ। २००४ मा पोर्चुगल र ग्रीस पहिलो पटक फाइनल पुगेका थिए।
इंग्लिस डिफेन्डर किरोन ट्रिपियर भन्छन्, ‘पछिल्ला केही वर्षमा हामीले निकै सुधारिएको खेल प्रदर्शन गरेका छौं। इंग्ल्यान्डले अहिलेसम्म युरोकपमा तय गरेको यात्राको प्रमुख कारण ठोस रक्षापंक्ति हो। मैले टिमका केही युवा सदस्यसँग छलफल गरेको छु। उनीहरूलाई भनेको छु- मनमा कुनै डर नराख्नु।’
इंग्ल्यान्डले पछिल्ला ५ खेलमा कुनै गोल खाएको छैन। वेम्बलीबाहिर रोममा खेलेको एकमात्र खेलमा इंग्ल्यान्डले क्वाटरफाइनल युक्रेनमाथि ४-० गोलको प्रभावशाली जित निकालेको थियो।
युक्रेनलाई सहजै हराएको इंग्ल्यान्ड २५ वर्षपछि युरोको सेमिफाइनल पुगेको थियो। समूह चरणमा क्रोएसिया र चेक रिपब्लिकलाई पराजित गरेको इंग्ल्यान्डले स्कटल्याण्डसँग गोलरहित बराबरी खेलेको थियो।
यस्तै, अन्तिम १६ मा जर्मनीलाई २-० ले पराजित गर्दै इंग्ल्यान्ड उपाधि दाबेदारको रुपमा अघि आएको थियो। प्रशिक्षक साउथगेट पुरानो अनुभवले पनि टोलीलाई यसपटक केही सहज हुने अपेक्षा गर्छन्।
‘विपक्षी टोली राम्रो छ भन्ने हेक्का छ। यो स्थितिमा यसअघि पनि खेलेकाले हामीलाई अहिले अनुभव पनि छ। हामी खेलका लागि तयार छौं। खेलाडी पनि तयार छन्। खेल निकै प्रतिस्पर्धात्मक हुने अपेक्षा गरेका छौं,’ उनले भने।
टोलीका कप्तान ह्यारी केन आफ्नो प्रदर्शनमा ध्यान केन्द्रित गर्ने बताउँछन्। ‘डेनमार्क राम्रो टिम हो। हामी आफ्नो प्रदर्शनमा ध्यान दिन्छौं। हामीले आफ्नो योजना अनुसार खेल्न सकेको खण्डमा फाइनलमा खेल्ने अवसर छ,’ उनले भने।
इंग्ल्यान्डलाई डेनमार्कको चुनौती मुस्किल हुने पक्का छ। इंग्ल्यान्डले डेनमार्कलाई पछिल्लो ६ भेटमा एकपटक मात्र हराएको छ।
सन् २००२ को राउन्ड अफ १६ मा इंग्ल्यान्ड ३-० ले विजयी भएको थियो। त्यसअघि सन् १९९२ को युरोकपमा डेनमार्कले उपाधि जित्दा समूह चरणमा यी दुईले गोलरहित बराबरी खेलेका थिए। अघिल्लो वर्ष नेसन्स लिगमा इंग्ल्यान्डले डेनमार्कसँग दुई खेलमा एक हार र एक बराबरीको नतिजा निकालेको थियो।
सन् १९९२ को विजेता टोली डेनमार्क जारी प्रतियोगिताको पछिल्लो खेलमा उत्कृष्ट प्रदर्शन गर्दै अन्तिम चारमा आइपुगेको टोली हो। पहिलो खेलमै फिनल्याण्डसँग १-० ले पराजित भएको डेनमार्क त्यसपछि बेल्जियमसँग अग्रता लिएर पनि २-१ ले पराजित भयो।
तर, तेस्रो खेलमा रुसलाई ४-१ ले पराजित गरेपछि समूह उपविजेता बन्दै नकआउट चरण पुगेको डेनमार्कले अन्तिम १६ मा वेल्सलाई ४-० ले हरायो। त्यसपछि क्वाटरफाइनलमा चेकलाई २-१ ले पराजित गरेको डेनमार्क अर्को जितको प्रतीक्षामा छ।
डेनमार्कका प्रशिक्षक कास्पर ह्युलमान्ड भन्छन्,‘हामीले यो खेल राम्रो हुने अपेक्षा गरेका छौँ। हामी यसमा पनि खुसी छौँ कि त्यहाँ हाम्रा पनि समर्थक हुनेछन्। हाम्रो लक्ष्य भनेको विपक्षी समर्थकलाई शान्त राख्ने हो। तर, त्यो लक्ष्य सहज भने हुने छैन।’
डेनिस मिडफिल्डर थोमस डिलानेले प्रतियोगिताको शुरुमा बेम्बलीमा पुग्ने लक्ष्य राखेको र अहिले पुगिएको बताए। उनी भन्छन्, ‘हामीले प्रतियोगिता सुरु हुँदादेखि नै वेम्बली स्टेडियममा यो खेल खेल्नेछौँ भन्ने योजना बनाएका थियौँ। त्यसैले हामी यो खेलका लागि तयार छौँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
