काठमाडाैं- जारी युरोकप फुटबलको पहिलो सेमिफाइनल खेल आज (मंगलबार) राति हुँदै छ। इंग्ल्यान्डको वेम्बली स्टेडियममा हुने पहिलो सेमिफाइनलमा इटाली र स्पेन प्रतिस्पर्धा गर्दै छन्। सेमिफाइनल खेल नेपाली समयअनुसार राति १२:४५ बजे सुरु हुनेछ।
इटाली र स्पेनबीचको विजेताले फाइनलमा इंग्ल्यान्ड र डेनमार्कबीचको विजेतासँग खेल्नेछ। इंग्ल्यान्ड र डेनमार्कबीचको दोस्रो सेमिफाइनल बुधबार राति हुनेछ।
इटाली फिफा वरीयताको शीर्ष टिम बेल्जियमलाई हराउँदै सेमिफाइनलमा पुगेको हो भने स्पेनले क्वाटरफाइनलमा स्वीट्जरल्यान्डलाई पेनाल्टी सुटआउटमा ३-१ गोल अन्तरले पराजित गरेको थियो।
इटाली र स्पेनबीच हालसम्म ३३ खेलमा प्रतिस्पर्धा भएको छ। जसमा स्पेनले १२ खेल जितेको छ। १२ खेल नै बराबरीमा सकिँदा ९ खेल इटालीले जितेको छ।
युरोपियन च्याम्पियनसिपमा दुई टिमबीच सातौं पटक प्रतिस्पर्धा हुन लागेको हो।
आजको ‘प्लेयर्स टु वाच’ मा हामीले स्पेनका अल्भारो मोराटा, इटालीका लोरेन्जो इन्सिग्ने, स्पेनका आयमेरिक लापोर्टे र इटालीका जोर्गिन्होको बारेमा चर्चा गरेका छाैं।
मोराटा : फर्वाड, स्पेन
मोराटा स्पेनिस टोलीका मुख्य फर्वाड हुन्। जारी युरोकपमा स्पेनले खेलेको पाँचमध्ये पाँचै खेलमा उनले खेलेका छन्।
यद्यपि, प्रतियोगितामा उनीबाट आशा गरिए जति गोल भने सम्भव हुन सकेको छैन। समूहगत चरणको खेलमा पोल्यान्डविरुद्ध र प्रिक्वार्टरफाइनलमा क्रोएसियाविरुद्ध उनले एक/एक गोल गरेका थिए।
मोराटासँग रियल मड्रिड, चेल्सी, एट्लेटिकोबाट खेलेको अनुभव छ। उनले बेलारुससँगको खेलसँगै राष्ट्रिय टोलीबाट डेब्यु गरेका हुन्।
स्पेनिस क्लब एट्लेटिको मड्रिडबाट इटालियन सिरी ‘ए’ क्लब युभेन्टस पुगेका स्पेनका प्रभावशाली स्ट्राइकर मोराटाले गत सिजन क्लबका लागि ३२ खेलमा ११ गोल गरेका थिए। उनीसँग स्पेनको यू १७, १८, १९ र २१ टोलीबाट खेलेको अनुभव छ।
इन्सिग्ने : विंगर, इटाली
इन्सिग्ने इटालीको अग्रपंक्तिका मुख्य खेलाडी हुन्। जारी युरोकपमा उनी लयमा देखिएका छन्।
लोरेन्जो स्पिनाज्जोलाले चोटका कारण प्रतियोगिताका बाँकी खेल गुमाएपछि इटालीको अग्रपंक्तिको बायाँतर्फको जिम्मेवारी अब पूर्णरूपमा उनीमाथि नै निर्भर रहेको छ।
टोलीको आगामी प्रतिस्पर्धामा उनको भूमिका महत्त्वपूर्ण हुने अपेक्षा गरिएको छ।
इटालियन क्लब नापोलीका विंगर इन्सिग्ने जारी प्रतियोगितामा इटालीलाई अघि बढाउन महत्त्वपूर्ण योगदान पुर्याउँदै आइरहेका छन्।
लापोर्टे : सेन्टरब्याक, स्पेन
लापोर्टेले विभिन्न उमेर समूहमा फ्रान्सबाटै खेलेका थिए । इंग्लिस प्रिमियर लिग च्याम्पियन म्यानचेस्टर सिटीका सेन्टरब्याक लापोर्टेले गत मे महिनामा मात्रै स्पेनी नागरिकता प्राप्त गरेका थिए।
फिफाको स्वीकृति लिएका उनले स्पेनबाट युरो २०२० का पाँचसहित कूल छ खेल खेलिसकेका छन्। स्लोभाकियाविरुद्ध उनले एक गोल गरेका थिए।
जोर्गिन्हो : डिफेन्सिभ मिडफिल्डर (इटाली)
डिफेन्सिभ मिडफिल्डर जोर्गिन्होले जारी युरोकपमा इटालीका लागि उत्कृष्ट प्रदर्शन गरिरहेका छन्।
ब्राजिलमा जन्मिएका २९ वर्षीय जोर्गिन्होसँग प्रतिघण्टा २७.७ किमिसम्म क्षमता छ। उनले पछिल्लो सिजन चेल्सीलाई च्याम्पियन्स लिगको उपाधि दिलाउन पनि महत्त्वपूर्ण योगदान गरेका थिए। उनले इटालीबाट ३३ खेलमा पाँच गोल गरिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
