काठमाडौं– अस्थायी एकदिवसीय मान्यता पाएका नेपालसहित चार देश आइसिसीको पूर्ण राष्ट्रको एकदिवसीय वरियतामा समावेश भएका छन्। अहिले रहेका १२ पूर्ण सदस्यसहित अस्थायी एकदिवसीय मन्यता पाएका ४ टिम गरी अब १६ टिमको एकदिवसीय वरीयता सार्वजनिक गरिनेछ।
अस्थायी एकदिवसीय मान्यता पाउनेमा नेपाल, स्कटल्यान्ड, नेदरल्यान्ड्स र युएई छन्। यसअघि अस्थायी राष्ट्रको छुट्टै वरीयता गरिने गरिएको थियो।
यो वरीयता जुन १ २०१८ देखि लागु हुने आइसिसीले जनाएको छ। अब अस्थायी राष्ट्रले खेलेका टिमको खेलको रेटिङ र प्रदर्शनलाई पनि वरीयताको आधार बनाइनेछ।
नेदरल्यान्ड्सले आइसिसी विश्व लिग च्याम्पियनसिप जितेर चार वर्षका लागि अस्थायी एकदिवसीय मान्यता पाएका थियो। स्कटल्यान्ड, नेपाल र युएई भने विश्वकप छनोटमा एसोसिएट टिममध्ये उत्कृष्ट ३ मा रहदै एकदिवसीय मान्यता पाएका थिए।
नयाँ वरीयता अनुसार पूर्ण सदस्य टिमपछि स्कटल्यान्ड १३औं स्थानमा छ। १२ औं स्थानको आयरल्यान्डको भन्दा स्कटल्यान्डको १० अंक कम छ। १४औं स्थानमा युएई छ। नेदरल्यान्ड्स र नेपाल भने वरीयतामा छैनन्। आइसिसीका अनुसार ४ वटा भन्दा बढी एकदिवसीय खेल खेलेपछि मात्र दुवै टिमलाई वरीयतामा राखिनेछ। रेटिङमा भने नेदरल्यान्ड्सको १३ अंक छ भने नेपालको शून्य अंक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
