काठमाडाैं- नेदरल्याण्ड्सका प्रशिक्षक फ्रान्क डे बोएरले राजीनामा दिएका छन्। जारी युरोकप २०२० मा टोलीले अपेक्षित नतिजा निकाल्न नसकेपछि उजले राजीनामा दिएका हुन्।
समूह चरणका तीनै खेल जित्दै नकआउट चरणमा पुगेको नेदरल्याण्ड्स चेक रिपब्लिकसँग २-० ले पराजित हुँदै बाहिरिएको थियो।
हंगेरिस्थित पुस्कास एरेना स्टेडियममा भएको खेलको ५५औं मिनेटमा टोलीका मुख्य डिफेन्डर लिग्टले हातले बल रोकेपछि भिडियो असिस्टेन्ट रेफ्री (भीएआर)को सहायता लिँदै रेफ्रीले रातो कार्ड दिएका थिए।
उनले पेनाल्टी क्षेत्रभित्र लडेपछि शिकलाई रोक्ने क्रममा हातले बल रोकेका थिए। डच टोली १० खेलाडीमा समेटिएपछि चेकले दबाब सिर्जना गर्दै दुई गोल गर्न सफल भएको थियो।
नेदरल्याण्ड्स फुटबल महासंघले विज्ञप्ति जारी गर्दै दुवै पक्षको सहमतिमा ५१ वर्षीय प्रशिक्षक डे बोएर जिम्मेवारीमुक्त भएको जनाएको छ।
उनले गत सेप्टेम्बरमा मात्र जिम्मेवारी सम्हालेका थिए। ‘दुवै पक्षको सहमति अनुसार प्रशिक्षक आफ्नो जिम्मेवारीबाट अलग हुँदैछन्,’ महासंघले जारी गरेको विज्ञप्तिमा भनिएको छ, ‘उनले आफैं प्रशिक्षक पदमा कायम नरहने जानकारी दिएका हुन्।’
सम्झौतामा उल्लेख गरेअनुसार नेदरल्याण्ड्सले युरोपेली च्याम्पियनसिपमा क्वाटरफाइनलसम्म पुग्नुपर्ने थियो। त्यसैले पनि उनको सम्झौता नवीकरण नहुने भएको हो।
डे बोएर आफैंले पनि लक्ष्य प्राप्त नहुँदा जिम्मेवारीबाट अलग्गिएको जानकारी दिएका छन्।
‘आफ्नो प्रदर्शनलाई मध्यनजर गर्दै मैले प्रशिक्षक पदमा निरन्तरता नदिने निर्णय लिएको छु। मलाई दिइएको लक्ष्य पनि प्राप्त हुन सकेन,’ उनले भनेका छन्।
उनले आफूले यस जिम्मेवारीलाई गौरव र चुनौतीको रुपमा लिएको पनि बताएका छन्।
‘जब मलाई यो पदको लागि प्रस्ताव आयो, मैले जिम्मेवारी लिँदा यससँगै आउने दबाबको बारेमा पनि सोचेको थिएँ। त्यो दबाब बढ्दै गएको छ। यो मेरो लागि राम्रो स्थिति होइन। टोलीका लागि पनि यो अवस्था सुखद छैन। त्यसैले विश्वकप छनोटको महत्त्वपूर्ण खेल आउँदै गरेको अवस्थामा मैले टाढा हुने निर्णय लिएँ,’ उनले भनेका छन्।
यता हारपछि सम्पूर्ण जिम्मेवारी डी लिग्टले लिएका थिए। ‘पक्कैपनि निकै नराम्रो लागेको छ। हामीले खेल हार्नुको मुख्य कारण नै मैले गरेको गल्ती हो। यसले गर्दा नराम्रो महसुस भएको छ। त्यो नियन्त्रणमै थियो। अहिले फर्केर हेर्दा मैले त्यो बललाई बाउन्स हुन नै नदिनुपर्ने थियो जस्तो लाग्छ,’ उनले भनेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
