काठमाडाैं- युरोकप २०२० मा उपाधि दाबेदार मानिएकाे स्पेन र क्रोएसिया दुवैको राम्रो सुरुवात भएन। यी दुवै टिमले समूह चरणको अन्तिम तथा निर्णायक क्षणमा लय समातेका हुन्।
आफ्नो अन्तिम खेलमा स्पेनले स्लोभाकियालाई ५–० ले हराएको थियो। क्रोएसियाले पनि स्कटल्यान्डमाथि अन्तिम खेलमा ३–१ ले नतिजा निकालेको थियो।
स्पेन समूह ‘ई’ को उपविजेता र क्रोएसिया समूह ‘डी’को उपविजेता बन्दै अन्तिम १६ मा पुगेका हुन्।
समूह चरणको पहिलो खेलमा स्पेन स्वीडेनसँग गोलरहित बराबरीमा रोकिएको थियो। दोस्रो खेलमा पोल्याण्डसँग १-१ को बराबरीमा रोकिपछि स्पेनलाई अन्तिम खेल जित्नैपर्ने थियो। स्पेनलले अन्तिम खेलमा स्लोभाकियालाई ५-० को पराकिलो अन्तरले पराजित गर्दै नकआउटमा स्थान बनाएकाे थियाे।
क्रोएसिया पहिलो खेलमे इंग्ल्यान्डसँग १-० ले पराजित भएको थियो। दोस्रो खेलमा चेक रिपब्लिकसँग १-१ को बराबरी खेलेको क्रोएसियाले अन्तिम खेलमा स्कटल्याण्डलाई ३-१ ले हरायो।
त्यही दुई टिम अन्तिम १६ मा आज भिड्दैछन् र दुवैको नजर क्वाटरफाइनलमा रहेको छ। स्पेनले यसअघि समूह चरणको तीनवटै खेल घरेलु मैदान खेलेको थियो।
क्रोएसियाविरुद्ध खेल्दा स्पेन पहिलो पटक घर बाहिर खेल्दैछ। यी दुईबीचको खेल डेनमार्कको पार्केन एरिनामा नेपाली समय अनुसार राति ९ : ४५ बजे सुरु हुनेछ।
यस्ताे छ इतिहास
सन् २००८ देखि २०१२ सम्म लगातार तीन ठूला प्रतियोगिता जितेको स्पेन २०१४ र २०१८ को विश्वकप अनि २०१६ को युरोकपमा अन्तिम १६ बाटै बाहिरिएको थियो। यसपटक त्यो खराब यात्रालाई तोड्ने लक्ष्यमा छ स्पेन।
यता, क्रोएसियाले तीन वर्षअगाडि विश्वकपको फाइनल यात्रा तय गरेको थियो। त्यतिबेलाका १३ खेलाडी अहिलेको क्रोएसियाली टिममा छन्। सन् २००८ देखि २०१२ बीच तीन ठूला उपाधि जितेको स्पेनको खेल भने पछिल्लो समय केही खस्केको मानिन्छ।
सन् २०१६ मा फ्रान्समा भएको युरोकपमा स्पेन इटलीसँग र क्रोएसिया पोर्चुगलसँग पराजित भएको थियो।
क्रोएसिया र स्पेन युरोकपमा तेस्रो पटक भिड्न लागेका हुन्। नकआउट चरणमा भने यी दुई टोली पहिलो पटक आमने सामने हुँदैछन्।
सन् २०१२ को युरोमा स्पेनले क्रोएसियालाई समूह चरणमा पराजित गरेको थियो। चार वर्षपछि क्रोएसियाले स्पेनलाई हराएको थियो।
यस्तै, यूईएफए नेशन्स लिगअन्तर्गत सन् २०१८ मा भएको खेलमा दुवैले एक/एक खेल जितेका थिए। स्पेनले क्रोएसियालाई घरेलु मैदान ६-० ले हराएको थियो भने क्रोएसिया आफ्नो मैदानमा ३-२ ले विजयी भएको थियो।
समग्रमा यी दुई टोलीबीच ८ खेल हुँदा स्पेनले ४ खेल जितेको थियो भने क्रोएसियाले ३ खेल जितेको थियो। १ खेल बराबरीमा सकिएको थियो।
स्पेनका परिचित खेलाडी
स्पेनले युरो २०२० को अन्तिम १६ मा सोमबार क्रोएसियाको सामना गर्दा डानी ओल्मोका लागि सबै विपक्षी खेलाडी परिचित नै रहनेछ। खासमा यस प्रतियोगितामै उनले स्पेनका लागि नभएर क्रोएसियाका लागि पनि खेल्न सक्थे। डिनामो जाग्रेभबाट १६ वर्षको उमेरमा उनी बार्सिलोनाको एकेडेमी पुगेका थिए।
उनले माथिल्लो स्तरमा स्पेनी क्लबका लागि भने खेलेनन्, जर्मनीको आरबी लाइप्जिगमा आबद्ध भए। तर उनलाई स्पेनका लागि खेल्ने निर्णय गरे।
यी २३ वर्षीय खेलाडी प्रशिक्षक लुइस एनरिकेको नयाँ स्वरूपको स्पेनी टिमका मुख्य खेलाडीमध्ये एक हुन्। क्रोएसियाको सामना गर्दा उनको एउटा थप भूमिका हुनेछ, आफ्नो प्रशिक्षकलाई विपक्षी टिमको गोप्य तथ्य जानकारी गराउने।
यता, स्पेनले कप्तान सर्जियो बुस्केट्सको साथ नियमित पाउनेछ। अघिल्लो खेलमा उच्च प्रदर्शन गरेका पाब्लो सराबियाले आफ्नो स्थान राख्ने पक्का जस्तै छ।
अल्भारो मोराटाले अपेक्षित प्रदर्शन गर्न नसक्दा उनको स्थानमा जेरार्ड मोरेनोले खेल्ने सम्भावना छ। मिडफिल्डमा अर्को खेलाडी थप्न एन्रिकेले मुख्य फरवार्डमा मोरेनोलाई खेलाउन सक्छन्।
क्रोएसियाका लागि अर्को एउटा ठूलो समस्या रहेको छ। त्यो हो, स्पेनविरुद्ध इभान पेरिसिचको अनुपस्थिति। उनी कोभिड–१९ को संक्रमणबाट ग्रस्त भएपछि १० दिनको आइसोलेसनमा छन्। उनले समूह चरणमा २ गोल गरेका थिए।
उनको अनुपस्थितिमा क्रोएसियाले आन्द्रे क्रमारिच र आन्टे रेबिचलाई आक्रमणको जिम्मेवारी सुम्पने देखिन्छ। निकोला भ्लासिच, लुका मोड्रीच, म्याटियो कोभाचिच मिडफिल्डमा हुनेछन्।
के छ रणनीति ?
क्रोएसियाका प्रशिक्षक ज्लाट्को डालिचले स्पेनविरुद्ध टोलीले आफ्नो स्तरअनुसार खेल्न जरुरी रहेको बताए।
‘स्पेनमा युवा, फास्ट र जोशिला खेलाडी छन्। उनीहरुले पासमा निर्भर रहेर निरन्तर विपक्षीलाई दबाबमा राख्न सक्छन्,’ उनले भने, ‘हाम्रो पनि आफ्नो खेल्ने शैली छ। उनीहरुलाई सहज रुपमा खेल्न दिने छैनौं।’
यता, स्पेनका फरवार्ड ड्यानी ओल्मोले क्रोएसियालाई कमजोर आँक्न नमिल्ने बताए।
‘जुन खेलमा पनि क्रोएसियाको टोली निकै कडा चुनौती पेस गर्छ। उनीहरु आफ्नो देशका लागि सबैथोक दिन तयार हुन्छन्,’ उनले भने, ‘उनीहरुमा कठिन परिस्थितिमा खरो उत्रने क्षमता छ। आजको खेल जसले पनि जित्न सक्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
