काठमाडौं- नेपाली महिला राष्ट्रिय फुटबल टोलीका प्रशिक्षक ग्यारी फिलिप्सले एएफसी महिला एसियन कप क्वालिफायर्सका लागि आफू उत्साहीत भएको प्रतिकृया दिएका छन्।
उनले फिलिपिन्स र हङकङसँगको खेल होस्ट गर्न पाउँदा आफू उत्साहीत रहेको बताएका हुन्। क्वालिफायर्समा नेपाल समूह ‘एफ’ मा परेको छ। क्वालिफायर्स अन्तर्गतको खेलमा नेपालले फिलिपिन्स र हङकङसँग घरेलु मैदानमा खेल्ने छ।
मलेसियाको क्वालालम्पुरमा बिहीबार भएकाे भर्चुल ‘ड्र’ अनुसार नेपाल हङकङ र फिलिपिन्ससँगै समूह ‘एफ’मा परेकाे हाे। ‘हिजो ‘ड्र’ सार्वजनिक भयो, योबाट हामी उत्साहीत छौं। साथै फिलिपिन्स र हङकङसँगको खेल होस्ट गर्न पाउँदा उत्साहीत छौं, ’उनले भने।
नेपालले यसअघि तीन पटक एसि कप खेलेको थियो। सन् १९८६ मा पहिलो पटक सहभागिता जनाएको नेपालले १९८९ र १९९९ मा पनि एसियन कप खेलेको थियो तर, एक खेल पनि जित्न सकेको थिएन।
नेपालको समूहमा रहेको फिलिपिन्स विश्व वरीयतामा ६८औं स्थानमा छ। नेपाल १ सय १औं स्थानमा रहँदा हङकङ ७६औं स्थानमा छ। नेपालले यसअघि १९८६ र १९८९ मा हङकङसँग खेलेको थियो भने १९९९ मा फिलिपिन्ससँग खेलेको थियो।
उक्त खेलमा नेपालले फिलिपिन्ससँग ५-० को हारेको थियो। यस्तै, हङकङसँग ३-० को हार बेहोरेको थियो। नेपालको एपीएफ महिला टोलीले भने हङकङको राष्ट्रिय टोलीलाई सन् २०१८ मा भएको मैत्रीपूर्ण खेलमा ३-१ ले पराजित गरेको थियो।
यद्यपि, फिलिपिन्स र हङकङ बलियो भएको स्वीकार्दै उनले आफ्नो टोली आत्मविश्वासी भएर खेल्ने बताएका छन्। ‘फिफा वरीयतामा यी दुवै देशहरु हामीभन्दा अघि छन्। यद्यपि, हामी घरेलु मैदानमा दर्शकको अगाडि खेल्न पाउनु ठूलो अवसर हो। यसले खेलाडीहरुलाई इन्सेन्टिभ र मोटिभेसन दिनेछ। यो खेलमा लागि हामी आत्मविश्वासी छौं,’ उनले भने।
घरेलु मैदानमा घरेलु समर्थकका बीच खेल्दै समूहको शीर्ष स्थानमा रहँदै अर्को चरणमा प्रवेश गर्ने आफ्नो लक्ष्य भएको फिलिप्सले सुनाए। ‘हङकङ र फिलिपिन्सलाई हराउँदै एसियन कपमा क्वालिफाइ हुने राम्रो अवसर छ। यो नेपालका लागि ऐतिहासिक क्षण हुनेछ,’ उनले भने।
एएफसीले हाललाई छनोटको प्रारम्भिक मिति १३ देखि २५ सेप्टेम्बर (२८ भाद्रदेखि ९ असोज) तोकेको छ। छनोटमा सहभागी हुने टोलीलाई ८ समूहमा विभाजन गरिएको छ।
चार समूहमा ४-४ टिम छन् भने अर्को चार समूहमा ३-३ टिम छन्। ८ वटै समूहको विजेता टोली भारतमा हुने एसिया कपमा छनोट हुनेछ। महिला एसिया कप आगामी वर्षको जनवरी २० देखि फेब्रुअरी ६ तारिखसम्म आयोजना हुँदैछ।
२०२२ जनवरी २० देखि फेब्रुअरी ६ सम्म भारतको तीन शहरमा हुने प्रतियोगितामा कुल १२ टिमले प्रतिस्पर्धा गर्नेछन्। यसअघि नै पछिल्लो संस्करणको शीर्ष तीन टिम जापान अष्ट्रेलिया र चीनसहित आयोजक भारत सिधै छनोट भइसकेका छन्।
महिला टोलीको मुख्य प्रशिक्षक रहेका हरि खड्काले १३औं दक्षिण एसियाली खेलकुदको फाइनलमा नेपाली महिला टोली भारतसँग पराजित भएपछि राजीनामा दिएपछि अखिल नेपाल फुटबल संघ (एन्फा)ले ग्यारी फिलिप्सलाई नियुक्त गरेको थियो।
यसअघि फिलिप्स सन् २०१९ मा एन्फाको प्राविधिक निर्देशक नियुक्त भएका थिए। त्यतिबेला उनले नेपाली राष्ट्रिय फुटबल टिम, प्रशिक्षक, प्रशिक्षण कार्यक्रम र एन्फाको अन्य प्राविधिक पक्ष हेरेका थिए।
१९६३ जन्मिएका उनी अस्ट्रेलियाका पूर्व फुटबलर हुन्। उनले अस्ट्रेलियामा कम्युनिटी फुटबल एकेडेमी स्थापना गरेका थिए। उनको एकेडेमी लन्डनको किनिटिक फुटबल एकेडेमी, लिभरपुल र म्यानचेस्टर सिटीसँग पनि जोडिएको थियो।
सन् १९९७ मा फुटबलबाट संन्यास लिएपछि उनी सिड्नी ओलम्पिकका लागि प्रशिक्षक नियुक्त भएका थिए। मलेसियाको सुपर लिगको टिमको समेत प्रशिक्षक रहेका उनले सन् २०१५ मा पपुवा न्युगिनीको महिला राष्ट्रिय टिमको प्रशिक्षकको जिम्मा पाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781240272.png)
-1764146706.png)
