काठमाडौं- १६औं संस्करणको युरोकप फुटबलमा आज (मंगलबार) विश्व विजेता तथा युरोकपको साविक उपविजेता फ्रान्स र विश्वकप तथा युरोकपको पूर्वविजेत जर्मनी भिड्दैछन्। एलिएन्ज एरिना म्युनिख जर्मनीमा हुने खेल नेपाली समय अनुसार राति १२:४५ बजे सुरु हुनेछ।
ग्रुप अफ डेथ मानिएको समूह ‘एफ’ मा रहेका दुबै टिम पहिलो खेलमा जित निकाल्ने योजनामा हुनेछन्।
यो समूहमा फ्रान्सलाई यो सिजनको युरो कप उपाधिको प्रमुख दाबेदारको रुपमा हेरिएको छ। साविकको उपविजेता फ्रान्स विश्व वरीयतामा दोस्रो स्थानमा छ।
दुई पटकको च्याम्पियन फ्रान्स तेस्रो पटक युरो उपाधि जित्ने योजनामा छ।
सन् २०१६ मा पनि फ्रान्सलाई दाबेदार टोलीको रुपमा हेरिएको थियो। तर, घरेलु मैदानमा फाइनलमा पोर्चुगलसँग पराजित भयो।
त्यसयता लगातार सुधारिएको प्रदर्शन गर्दै आएको फ्रान्सले विश्वकप जितेको थियो। आफ्नो सोही लयलाई फ्रान्स निरन्तरता दिन चाहन्छ।
यी दुई टोलीको पछिल्लो ८ खेलको नतिजामा फ्रान्स चार खेलमा विजयी हुँदा जर्मनीले दुई खेल जितेको थियो। दुई खेलभने बराबरीमा सकिएको छ। पछिल्लो पाँच खेलमा फ्रान्स जर्मनीसँग अपराजित छ।
सन् २०१४ को विश्वकपको क्वाटरफाइनलमा फ्रान्स जर्मनीसँग १–० ले पराजित भएको थियो। त्यसयता फ्रान्सले ३ खेल जित्दा २ खेल बराबरीमा सकिएको छ। पछिल्लोपटक २०१८ को नेशन्स लिगमा फ्रान्सले २–१ को जित निकालेको थियो।
तर, फ्रान्स र जर्मनी युरोकपमा अहिलेसम्म जम्मा १ पटक आमुनेसामुने भएका छन्। २०१६ को सेमिफाइनलमा फ्रान्सले जर्मनीलाई पराजित गरेको थियो।
२०१८ मा रुसमा भएको विश्वकप फ्रान्सले जित्दा जर्मनी समूह चरणबाटै बाहिरिएको थियो। फ्रान्सका मुख्य प्रशिक्षक डिडीएर डेसच्याम्पले यस खेललाई आफूले ठूलो खेलको रुपमा लिएको बताएका छन्।
'यो ठूलो खेल हो। हामी दुबै युरोकपका शीर्ष टिम हौं। दुबैको उदे्दश्य मैदानमा प्रभावकारी खेल्नु हो। त्यसले निर्णय गर्नेछ,' उनले खेल अगाडी भने।
यसपटक सबैको नजर ३३ वर्षीय करिम बेन्जिमाप्रति हुनेछ। उनी साढे पाँच वर्षको लामो निर्वासनपछि फ्रान्सेली टिममा फर्केका छन्। रियल मड्रिडमा पछिल्लो सिजन उनका लागि राम्रो रह्यो। तर, चोटका कारण बेन्जिमाले जर्मनीविरुद्ध खेल्ने सम्भावना न्यून छ।
यस्तै, एन्टोनियो ग्रीजम्यान, केलियन एमबाप्पे जस्ता खेलाडीको साथ फ्रान्सलाई रहेको छ।
यता, मिडफिल्ड एन गोलो कान्टे, पउल पोग्वा, एड्रिओन रावओट जस्ता खेलाडीले सम्हाल्ने छन्। कप्तान ह्युगो लोरिसले गोलपोष्ट सम्हाल्नेछन् भने डिफेन्समा राफेल भरान, बेन्जामिन पाभार्ड, लुकास हर्नान्डेज र प्रेसनेल किम्बेम्पे हुनेछन्। ओलिभर जिरुड फ्रान्सको सर्वाधिक गोलकर्ता बन्ने लक्ष्यमा छन्।
यता, अनुभवी गोलकिपर मानुएल नोएको कप्तानीमा रहेको जर्मनी पनि युरोकपको उपाधि दाबेदार हो। सबैभन्दा धेरै युरो कप खेल्ने राष्ट्र जर्मनी हो।
शुरुका तीन संस्करण नखेलेको जर्मनीले सन् १९७२ देखि निरन्तर रुपमा प्रतियोगितामा भाग लिइरहेको छ। जर्मनीले सर्वाधिक ६ पटक फाइनल समेत खेलेको छ। जसमा तीन पटक उपाधि जित्दा तीन पटक उपविजेता बनेको थियो।
जर्मनीले यसअघि १२औं संस्करण खेलिसकेको छ। यसपटक जर्मनीको १३औं सहभागिता हुनेछ।
अहिलेसम्म जर्मनी (पश्चिम जर्मनीसहित) र स्पेनले सर्वाधिक ३ पटक युरो कपको उपाधि जितेको छ। सन् १९७२ र १९८० मा पश्चिम जर्मनीले उपाधि जितेकाे थियाे। पछि जर्मनी एक भएपछि १९९६ मा उपाधि जितेकाे थियाे।
सन् २०१४ को विश्वकप विजेता जर्मनी फिफा वरीयतामा १२औं स्थानमा छ। जर्मनी २०१६ को युरोमा सेमिफाइनलमै पराजित भएको थियो। यस्तै, २०१८ काे विश्वकपमा समूह चरणबाटै बाहिरिएको थियो।
छनोट चरणमा जर्मनी समूह 'सी' मा अपराजित रहँदै शीर्ष स्थानमा रहेको थियो। जर्मनीलाई पुनरागमनका लागि यो युरो कप महत्वपूर्ण सक्छ।
थोमस मुलर र माट हुमेल्सले राष्ट्रिय टिममा पुनरागमन गरेका छन्। उनीहरु २ वर्षदेखि टाेली बाहिर थिए। प्रशिक्षक जोचिम लोलेको टाेलीमा टिमो वेर्नर, काइ हाभेर्ज, लरे साने, जोसुअ किम्मिक जस्ता खेलाडी छन्।
यस्तै, सर्ज जिनाब्री, लरेस साने, जोसुअ किम्मीक जस्ता खेलाडी जर्मनी टिममा छन्। मिडफिल्डमा टोनी क्रुस र एल्के गुन्डागोनको साथ रहनेछ।
लियोन गोर्टेज्काले फ्रान्सविरुद्धको खेल गुमाउने छन्। उनले खुट्टाको चोट बोकेका छन्। इल्के गुण्डोगान र टोनी क्रुसले जर्मनीको मिडफिल्ड सम्हाल्ने छन्।
लोले यस युरो कपपछि जर्मनीको टिम छाड्दैछन्। त्यसैले छाड्नुअघि उनी सुखद् रुपमा अन्त्य गर्न चाहन्छन्।
पछिल्लोपल्ट उनको नेतृत्वमा जर्मनीको प्रदर्शन उत्साहजनक हुन सकेको छैन। उनकै प्रशिक्षणमा सन् २०१४ मा ब्राजिललाई ७–१ को नमिठो हार चखाएको जर्मनीले यसैवर्ष स्पेनसँग ६–० को हार चाखेकाे थियाे। लोउ जर्मनीका लागि आफ्नो अन्तिम प्रतियोगितालाई सुखद अन्त्य गर्न चहान्छ। तर, जर्मनीले समूह चरणमा फ्रान्ससँगै पोर्चुगल र हंगेरीको चुनौती पन्छाउनुपर्ने हुन्छ।
'आज महत्वपूर्ण हुनेछ । शीर्ष टिमविरुद्ध टिमले कस्तो प्रदर्शन देखाउने छ त्यो हेर्नेछौं,' फ्रान्ससँगको खेल अघि लोलेले भने।
उनले फ्रान्सविरुद्ध खेल्दा आत्मविश्वासी भएर खेल्ने बताए। 'फ्रान्स विश्व फुटबलको सबैभन्दा सन्तुलित टिम हो । उसले कसरी फुटबल खेल्छ भनेर अनुमान गर्न सक्छौं, तर कहिलेकाहीं यो कसैको क्षमताभन्दा बाहिरको हुन्छ । अहिले हाम्रो टिमको माहोला राम्रो छ। आत्मविश्वासी भएर खेल्नेछौं,' उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
