काठमाडौं– युरोकपमा आज (मंगलबार) ग्रुप अफ डेथ मानिएको समूह ‘एफ’ अन्तर्गत दुई खेल हुँदैछन्।
पहिलो खेल हंगेरी र पोर्चुगलबीच हुनेछ। खेल नेपाली समयानुसार राति ९:४५ बजेबाट बुढापेस्टस्थित पुस्कास एरेनामा राति शुरु हुनेछ। यस्तै, विश्वकप विजेता फ्रान्स र जर्मनीबीचको खेल म्युनिखस्थित एलिनाज स्टेडियममा हुनेछ। फ्रान्स र जर्मनीबीचको खेल नेपाली समयानुसार राति १२:४५ बजेबाट शुरु हुनेछ।
घरेलु मैदानमा हुने खेलमा हंगेरी पोर्चुगललाई स्तब्ध पार्ने लक्ष्यमा मैदान उत्रनेछ। पहिलोपटक युरोकप आयोजना गरिरहेको हंगेरीका लागि डिफेन्डिङ च्याम्पियन पोर्चुगलविरुद्धको खेल सजिलो भने हुनेछैन।
यद्यपि, हंगेरी गत सेप्टेम्बरमा रसियासँग ३–२ ले पराजित भएयता ११ खेलमा अपराजित छ। जसमा ७ जीत र ४ बराबरीको नजिता छ।
हंगेरीका प्रशिक्षक मार्के रोसीले पोर्चुगलविरुद्ध खेल्दा संयमित र सक्दो मिहेनत गरेर खेल्ने बताएका छन्। मुख्य प्रतियोगितामा दुई टिमबीच तेस्रो पटक प्रतिस्पर्धा हुन लागेको हो। सन् २०१६ को भेटमा दुई टोलीले ३–३ गोलको बराबरी खेलेका थिए।
त्यस अगाडि यसअघि सन् १९६६ को विश्वकपको समूह चरणमा भेट हुँदा पोर्चुगल विजयी भएको थियो। पोर्चुगल अहिलेसम्म हंगेरीसँग पराजित भएको छैन। १३ खेलमध्ये पोर्चुगल ९ खेलमा विजयी हुँदा ४ खेल बराबरीमा सकिएको छ।
'हामीलाई थाहा छ हाम्रोविरुद्ध को छ। तर, हामी जितका लागि खेल्छाैं। पोर्चुगलविरुद्ध खेल्दा खेल्दा संयमित र सक्दो मिहेनत गरेर खेल्छाैं,' खेल अघि हंगेरीका प्रशिक्षक राेसीले भने।
यता, हंगेरीलाई घरेलु दर्शककाे पनि साथ रहनेछ। यसपटक युरोकपका ११ आयोजक राष्ट्रमध्ये हंगेरी मात्र शतप्रतिशत दर्शकलाई अनुमति दिने एक्लो राष्ट्र हो। घरेलु मैदानमा हंगेरीले यसकाे फाइदा लिनेछ।
एडाम सज्लाई, नेमान्जा निकोलिक, इन्ड्री बोट्का, विल्ली अर्वन, एटिल्ला सेज्लाई र गोलरक्षक पिटर गुलाक्सीको साथ रहेको छ।
यता, पोर्चुगल डिफेन्डिङ च्याम्पियनको हैसियतमा मैदान उत्रदा हंगेरीलाई हराउँदै अघिल्लो चरणको यात्रालाई सहज बनाउने योजनामा हुनेछ। दुई बलिया प्रतिद्वन्द्वी फ्रान्स र पोर्चुगलविरुद्ध भिड्नुअघि हंगेरीविरुद्ध निश्चित जीत निकाल्न दबाब हुनेछ।
सन् २०१६ मा फ्रान्सलाई उसैको मैदानमा हराउँदै पहिलो पटक युरोकप जितेको पोर्चुगलकाे कप्तानी क्रिस्टियानो रोनाल्डो गर्दैछन्। रोनाल्डो ३६ वर्ष भइसकेका छन् यस्तै ३८ वर्षीय पेपे पनि टिममा छन्।
तर, यसबाहेक टिममा क्षमतावान् युवा खेलाडीहरु पनि थपिएका छन्। हंगरीविरुद्ध रोनाल्डो मुख्य केन्द्रमा रहेपनि सबैको नजर जोटामाथि रहने छ। २४ वर्षीय जोटालाई पोर्चुगलका 'भविष्य'को रुपमा हेरिएको छ।
जोटा व्यवसायिक फुटबल इंग्लिस क्लब लिभरपुरबाट खेल्ने गर्छन्। उनीसँग एट्लेटिको मड्रिड, पोर्टो लगायतका क्लबबाट खेलेको अनुभव छ। जोटाले पोर्चुगलको उमेर समूह अन्तर्गत यू–१९, २१ र २३ बाट खेलेका छन्। सिनियर टोलीबाट जोटाले १४ खेल खेल्दा ६ गोल गरिसकेका छन्।
यस्तै, जर्मनीमा जन्मिएका २८ वर्षीय विलि ओर्बान अर्का सम्भावना बाेकेका खेलाडी हुन्। उनले उमेर समूहको अन्तर्राष्ट्रिय फुटबल जर्मनीबाट खेलेका थिए। उनले जर्मनीको यू-२१ टिमबाट खेलेका थिए। तर, सिनियर टिमबाट भने उनले हंगेरीबाट खेलिरहेका छन्।
जर्मन क्लब आरबी लाईपजिगबाट व्यवसायिक फुटबल खेल्दै आएका उनले हंगेरीबाट २१ खेल खेल्दा ५ गोल गरिसकेका छन्।
यता, म्यानचेस्टर सिटीबाट खेल्दै आएका युवा डिफेन्डर जोआ कान्सेलो कोरोना संक्रमणको कारण टिम बाहिर रहने छन्। उनको स्थानमा डिएगो डालोट टोलीमा जोडिएका छन्।
पोर्चुगलका प्रशिक्षक फर्नान्डो सान्तोषले टोली समूह चरणबाट अघि बढ्न नसके त्यो असफलता हुने बताएका छन्।
'हामीलाई थाहा छ हाम्राे प्रतिस्पर्धी काेकाे छन्। हामीले लक्ष्य भेटाउन उनीहरुलाई पराजित गर्नुपर्छ। टोली समूह चरणबाट अघि बढ्न नसके हामी यसलाई असफलताकाे रुपमा लिनेछाैं। त्यसैले जित निकाल्न सबै शक्ति खर्चिन्छाैं,' उनले भने।
पोर्चुगल गत नोभेम्बरमा नेसन्स लिगमा फ्रान्ससँग १–० ले पराजित भएयता ६ खेलमा अपराजित छ। जसमा चार जित र दुई बराबरीको नतिजा छ। हंगेरीविरुद्ध रोनाल्डोको इतिहास राम्रो रहेको छ। उनले हंगेरीविरुद्धको तीन खेलमा चार गोल गरेका छन्।
रोनाल्डो कीर्तिमान नजिक
रोनाल्डो लगातार ५ युरोकप खेल्ने पहिलो खेलाडी समेत बन्दैछन्। यसअघि उनले २००४, २००८, २०१२ र २०१६ मा युरो कप खेलिसकेका छन्।
उनले युरोकपमा सर्वाधिक २१ खेल समेत गरेका छन्। उनले छनोटसहित गरेर सर्वाधिक ४० गोल गरेका छन्। चार संस्करणको युरोकप खेल्ने रेकर्ड भने रोनाल्डोसँगै १७ खेलाडीको नाममा छ।
यस्तै, पाँचौ पटक युरोकप खेल्न लागिरहेका रोनाल्डो युरोकपमा सर्वाधिक गोल गर्ने कीर्तिमान नजिक छन्। उनले हंगेरीविरुद्ध एक गोल गरेमात्रै पनि युरोकपमा १० गोल पुग्नेछ। अहिले फ्रेन्च मिचेल प्लाटिनी र रोनाल्डोको समान ९ गोल छ।
रोनाल्डोले सन् २००४ मा २ गोल, २००८ मा १ गोल, २०१२ मा ३ गोल र २०१६ मा ३ गोल गरेका थिए। आजकाे एक खेलमा गाेल गरे प्लाटिनीलाई उनले उछिन्ने छन्।
यस्तै, रोनाल्डोले हंगेरीविरुद्ध गोल गर्दा पाँच संस्करणको युरोकपमा गोल गर्ने पहिलो खेलाडी बन्नेछन्। अघिल्लो संस्करणमा गोल गरेसँगै रोनाल्डो चार संस्करणमा गोल गर्ने पहिलो खेलाडी बनेका थिए।
यस्तै, अन्तर्राष्ट्रिय फुटबलमा पनि सर्वाधिक गोल गर्नेमा रोनाल्डो अहिले १०४ गोलसहित दोस्रो स्थानमा छन्। इरानका अली दाईको कीर्तिमानभन्दा उनी ५ गोलले मात्र पछि छन्।
रोनाल्डोले युरोकप शुरु हुनुअघि नै लगातार दुई युरोकप जित्नु महत्वपूर्ण भएको बताएका छन्। रोनाल्डोले टिमले राम्रो तयारी गरेको बताए। ५ वर्षपछि धेरै सम्भावना भएको युवा टिम रहेको र प्रतियोगिता अघि बढ्दै जाँदा राम्रो वा नराम्रो हुने थाहा हुने उनकाे भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
