काठमाडौं- युरोकपमा आज पनि तीन खेल हुँदैछन्। जसमा समूह ‘डी’ को एक तथा समूह ‘ई’ को दुई खेल हुनेछन्।
पहिलो खेलमा समूह ‘डी’ मा रहेका चेक रिपब्लिक र स्कटल्याण्डबीच हुनेछ। खेल स्कटल्याण्डको हम्पडेन पार्क स्टेडियममा नेपाली समयअनुसार साँझ ६:४५ बजे शुरु हुनेछ। यो समूहको यसअघि भएको खेलमा इंग्ल्याण्डले क्रोएसियालाई १–० ले हराएको थियो।
जायन्ट किलरको छवि बनाएको स्कटल्याण्ड सन् १९९८ पछि पहिलोपटक ठुलो प्रतियोगितामा उत्रदैछ। स्कटल्याण्डले २३ वर्षपछि ठूलो प्रतियोगिताको लागि मैदान उत्रदा चेक रिपब्लिकलाई हराउने लक्ष्यमा हुनेछ। स्कटल्याण्डले नेदरल्यान्ड्स र स्पेनजस्ता टिमलाई हराएको छ । स्कटल्याण्डले सन् १९९९ मा इंग्ल्याण्डलाई हराएको थियो ।
स्कटल्याण्ड १९९८ को विश्वकपको समूह चरणमा मोरोक्कोसँग ३–० ले पराजित भएको थियो। स्कटल्याण्ड यसपल्ट प्लेअफको बाटोबाट युरोमा छनोट भएको हो ।
चेकविरुद्धका पछिल्ला चार मध्ये तीन खेलमा जित पाएको स्कटल्याण्ड उत्साहित भएर मैदान उत्रनेछ। टोलीका प्रशिक्षक स्टिभ क्लार्क छन्।
यता, चेक पनि स्कटल्याण्डलाई हराउँदै युरोमा सुखद् सुरुवात गर्न चाहन्छ। तर, चेकले पछिल्लो चार खेलमा स्कटल्याण्डलाई हराउन सकेको छैन। चेकले पछिल्लोपटक २०१० मा स्कटल्याण्डलाई १–० ले पराजित गरेको थियो।
यस्तै, समूह ‘ई’ अन्तर्गत राति दुई खेल हुनेछन्। रुसको सेन्ट पिटर्सवर्ग स्टेडियममा पोल्याण्ड र स्लोभाकियाबीचको खेल राति ९:४५ बजेबाट शुरु हुनेछ।
पोल्याण्ड र स्लोभाकिया जित निकाल्दै सुखद सुरुवात गर्न चाहन्छ।
पोल्याण्डले सन् १९८० यता ८ ठूला प्रतियोगितामा खेलिसकेको छ। जसमा एक मात्रै जित हासिल गरेको छ। पोल्याण्डले अन्तिम युरोकपमा उत्तरी आयरल्याण्डविरुद्ध जित हात पारेको थियो।
यता, स्लोभाकिया समेत पोल्याण्डका प्रभावशाली स्ट्राइकर रोबर्ट लेवान्डोस्कीसँग सतर्क रहनेछ। पछिल्लो समय क्लब फुटबलमा लेवान्डोस्कीको प्रदर्शन उच्च रहेको छ। दुई टोली ठुला प्रतियोगितामा पहिलो पटक खेल्न लागेका हुन्।
यता, पोल्याण्ड हाम्सिक स्लोभाकियाका कप्तान तथा मिडफिल्डरसँग सतर्क हुनुपर्छ। स्लोभाक अट्याकिङ मिडफिल्डर हाम्सिक मिडलाइनमा बल होल्ड गर्न, लामा प्रहार गर्न, विपक्षी डिफेन्डरलाई सहजै बिट गर्न माहिर छन्।
उनी स्विडिस क्लब आईएफके गोटबर्कबाट व्यवसायिक फुटबल खेल्ने गर्छन्।हाम्सिकसँग नापोली, चाईनीज सुपर लिग क्लब डालियनबाट खेलेको अनुभवसमेत रहेको छ।
समूह ‘ई’ कै अर्को खेलमा सर्वाधिक तीन पटकको च्याम्पियन स्पेनले स्वीडेनसँग खेल्नेछ।
स्पेनको घरेलु मैदान स्टेडियो डे ला कार्टुजामा खेल राति १२:४५ बजेबाट शुरु हुनेछ। यसअघि क्वालिफायरमा पनि स्पेन र स्वीडेनबीच खेल भएको थियो। दुई लेगको खेलमा घरेलु मैदानमा स्पेन विजयी भएको थियो। स्वीडेनमा भएको खेल भने स्पेन १–१ को बराबरीमा रोकिएको थियो।
कोरोना संक्रमण भएपछि स्पेनका कप्तान सर्जियो बुस्केट अहिले सेल्फ आइसोलेसनमा छन्। उनले यो खेल गुमाउने छन्।
यस्तै, कोरोना संक्रमणबाट मुक्त भएका डिएगो लरेन्टे भने खेल्ने सम्भावना छ। यता, स्वीडेनले डेजान कुलुसेभ्सी र माथियस स्भानवर्ग कोरोनाका कारण गुमाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
