काठमाडाैं- नेपालले एसियन कप छनोटको प्लेअफमा स्थान बनाएकाे छ।
शुक्रबार राति कुवेतस्थित जाबेर अल अहमद अन्तर्राष्ट्रिय रंगशालामा भएकाे आफ्नो अन्तिम खेलमा अष्ट्रेलियासँग ३-० ले पराजित भएसँगै नेपालकाे एसियन कप छनोटको तेस्रो चरण पुग्ने सम्भावना सकिएकाे हाे।
जितसँगै ७ खेलमा २१ अंक बनाएकाे अष्ट्रेलिया विश्वकप छनोटको तेस्रो चरण तथा एसियन कपका लागि छनोट भएको छ।
यता, हार बेहाेरेकाे नेपाल भने ८ खेलमा ६ अंकसहित चौथो स्थानमा रह्यो। अब तेस्रो चरण पुग्न नेपालले प्लेअफ चरण पार गर्नुपर्ने हुन्छ। सबै समूहका पुछारका टोली र चौथो स्थानमा रहने चार टोलीले प्लेअफमा प्रतिस्पर्धा गर्नेछन्।
शुक्रबार भएकाे खेलकाे छैटौँ मिनेटमा नै नेपाल पहिलो गाेल खाएकाे थियाे। कप्तान म्याथु लेकीले गोल गर्दै अष्ट्रेलियालाई सुरुवाती अग्रता दिलाए। अजिज बेहिचले बायाँ विंगबाट दिएको क्रसलाई लेकिले हेडरमार्फत गोल गरेका थिए।
केही अतालिएकाे नेपालले ३८ औं मिनेटमा दाेस्राे गाेल खायाे। लेकिले दायाँ विंगमा उत्कृष्ट मुभ बनाउँदै दिएको कटब्याकमा फ्रान करासिकले गोल गर्दै अग्रता २-० मा पुर्याए।
यस्तै, पहिलाे हाफकाे समाप्ति नजिक नेपाल १० खेलाडीमा समेटियाे। पेनाल्टी क्षेत्र बाहिर वन भर्सेस वनको स्थितिमा मार्टिन बोएललाई फल गरेको भन्दै रेफ्रीले राेहित चन्दलाई रातो कार्ड देखाएका थिए।
दोस्रो हाफको ५७ औं मिनेटमा अष्ट्रेलियाले अग्रता ३-० मा पुर्यायो। ज्याक्सन अर्भाइनको पासलाई मार्टिन बोएलले पेनाल्टी क्षेत्र बाहिरबाट सहजै गोल गरे।
यसरी पुग्याे नेपाल प्लेअफमा
नेपालको लक्ष्य एसियन कप खेल्नु हो। एसियन छनोटको प्लेअफ खेल्न नेपाल चौथो स्थानमा रहिरहनु पर्ने थियाे। त्यसका लागि चौथो स्थानमाथि कब्जा जमाउनु आवश्यक थियो।
एसियन कपमा कुल २४ टिमले भाग लिनेछन्। जारी एसियातर्फको विश्वकप छनोटको समूह विजेता भएका आठ टिम र उत्कृष्ट उपविजेता चुनिएका चार टिम स्वतः योग्य हुनेछन्।
एसियन कप छनोटको तेस्रो चरणमा सहभागी हुने कुल २४ टिमलाई आठ समूहमा विभाजित गरिनेछ। र, समूह विजेता र उपविजेता गरी कुल १२ चीनमा हुने एसियन कपका लागि छानिने छन्। जसले एसियातर्फको विश्वकप छनोटको समूह विजेता भएका आठ टिम र उत्कृट उपविजेता चुनिएका चार टिमसँग प्रतिस्पर्धा गर्नेछन्।
विश्वकप छनोट चरणमा उपविजेता भएका अन्य चार टिम र समूह चरणमा तेस्रो भएका आठ टिमले भने छनोटको तेस्रो चरण खेल्नेछन्। त्यस्तै, विश्वकप छनोट चरणमा आआफ्ना समूहमा चौथो भएका उत्कृष्ट चार टिमले पनि छनोटको तेस्रो चरण खेल्ने मौका पाउनेछन्। छनोटको तेस्रो चरण खेल्न पाउने टिमको संख्या १६ हुनेछ।
यी १६ टिमसँग अन्य आठ टिमले तेस्रो चरणमा प्रतिस्पर्धा गर्नेछन्। ती आठ टिम प्लेअफबाट आउनेछन्। विश्वकप छनोट चरणमा आआफ्ना समूहमा चौथो हुने चार टिम र पाँचौँ हुने आठ टिमले प्लेअफमा भाग लिनेछन्।
नेपालको हकमा भने प्लेअफ नखेली सिधै एसियन छनोटको तेस्रो चरणमा स्थान बनाउने अवसर थियाे। तर, त्यो त्यति सहज भने थिए। नेपालले जाेर्डन वा अस्ट्रेलियालाई हराउन पर्ने थियाे। यद्यपि, दुवै खेलमा नेपाल समान ३-० गाेलले पराजित भयाे।
समूह ‘एच’मा रहेको उत्तर कोरियाले छनोटबाट नाम फिर्ता लिएपछि उक्त स्थान निर्धारण गर्दा समूहको अन्तिममा रहेको टोलीसँगको नतिजा गणना नहुने एएफसीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
