काठमाडौं– प्रधानमन्त्री कप एकदिवसीय क्रिकेट प्रतियोगिताअन्तर्गत सोमबार भएका दुवै खेल वर्षाका कारण प्रभावित बनेका छन्। जसका कारण दुवै खेलको टुंगो डिएल मेथडको आधारमा लगाइएको छ। जसमा पुलिस र प्रदेश १ विजयी भएका छन्।
कीर्तिपुरस्थित टियू मैदानमा भएको खेलमा पुलिसले प्रदेश ७ लाई १ सय ७४ रन फराकिलो अन्तरले पराजित गरेको छ।
टस जितेर पहिले ब्याटिङ गरेको पुलिसले ५० ओभरमा ६ विकेट गुमाएर ३ सय २४ रनको विशाल योगफल बनायो। पुलिसका लागि ओपनर सुनील धमलाले सर्वाधिक ८३ रन जोडे। रनआउट हुनुअघि उनले १ सय १३ बलमा ९ चौका प्रहार गरे । उनी खेलको म्यान अफ द म्याच चुनिए।
पुलिसका लागि आरिफ शेखले ५७ रनको योगदान दिए। उनले ३७ बलमा उनले ५ छक्का र २ चौका प्रहार गरे। कप्तान मञ्जित श्रेष्ठले पनि ३३ बलमा ३ छक्का र ४ चौकाको सहयोगमा ४९ रन बनाए। दिलीप नाथले २७, दिपेन्द्र सिंह ऐरीले २५, कुशल भुर्तेलले २२ र सिद्धान्त लोहनीले २६ रन बनाए।
बलिङतर्फ प्रदेश ७ का शेर मल्लले २ विकेट लिए।
३ सय २५ रनको विशाल लक्ष्य पछ्याएको प्रदेश ७ ले ब्याटिङ गर्दैगर्दा खेल वर्षाले प्रभावित भयो। वर्षा रोकिएपछि सुरु भएको खेल ३७ ओभरमा छोट्याइयो भने प्रदेश ७ ले ३ सय ५ रनको नयाँ लक्ष्य पायो। तर, कमजोर सुरुआत गरेको प्रदेश सातका अरुण ऐरीबाहेक अन्य ब्याट्सम्यान धेरै समय क्रिजमा टिक्न सकेनन्। ऐरीले ७० रनको पारी खेले पनि अन्यले गतिलो रन बटुल्न सकेनन्।
बलिङतर्फ पुलिसका दीपेन्द्रसिंह ऐरीले ४ तथा ललितसिंह भण्डारीले २ विकेट लिए।
सोमबारै मूलपानीमा भएको अर्को खेलमा प्रदेश १ ले प्रदेश २ लाई ६८ रनले हरायो। प्रदेश नम्बर १ ले टस जितेर पहिले व्याटिङ गर्दै ५० ओभरमा ७ विकेट गुमाएर २२३ रन बनाएको थियो।
प्रदेश १ का लागि सन्दीप ढुंगानाले ५१ रन बनाए। ६९ बल खेलेका सन्दीपले ८ चौका प्रहार गरे। यसैगरी फिर्दोश अन्सारी र श्रवन यादबले आउट नभई ३७ र ३४ रन जोडे।
प्रदेश २ का सांसेद शेखले ४ तथा मेहबुब आलमले २ तथा हरिनारायण साहले १ विकेट लिए। २२४ रनको लक्ष्य पछ्याएको प्रदेश २ ले १७ ओभरमा ६ विकेट गुमाएर ६७ रन बनाउँदा खेल वर्षाले रोकिएको थियो। त्यसपछि खेल ३४ ओभरमा झारियो र प्रदेश २ ले २१४ रनको नयाँ लक्ष्य पायो।
तर, प्रदेश २ ले ३० ओभरमा ओभरमा १ सय ४५ रन मात्र जोडेपछि प्रदेश १ को ६८ रनको जित निकाल्न सफल भयो। प्रदेश २ का लागि ओपनर हरिशंकर शाहले सर्वाधिक ४४ रन बनाए पनि अन्यले गतिलो रन बनाउन सकेनन्। उसले २८ अतिरिक्त रन पाएको थियो। बलिङतर्फ १ नम्बर प्रदेशका पुष्प थापा र मिनास थापाले ३–३ विकेट लिए। कप्तानसमेत रहेका पुष्प थापा खेलको म्यान अफ द म्याच चुनिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
