काठमाडाैं- लन्डन क्लब चेल्सीका प्रशिक्षक थोमस टुचेलले अझै थप उपाधि जित्न चाहेको बताएका छन्। क्लबसँग १८ महिनाका लागि सम्झौँता गरेका टुचेलले चेल्सीमै रहेर थप उपाधि जित्न चाहेको बताएका हुन्।
क्लबकै पूर्वकप्तान फ्रान्क लाम्पार्ड बर्खास्तीमा परेपछि टुचेल चेल्सीमा पुगेका थिए। उनको प्रशिक्षणमा चेल्सी इंग्लिस प्रिमियर लिगको शीर्ष चारमा छनोट भएको थियो। त्यस्तै एफए कपको फाइनलमा समेत पुगेको थियो। टुचेलले त्यसबाहेक क्लबलाई च्याम्पियन्स लिगको उपाधि दिलाए।
‘हरेक दिन जसो हामी उपाधिको नजिक पुगेका थियौं । खेलाडीहरु जितका लागि प्रतिबद्ध थिए, तर सकेनाैं। हामी फेरि उपाधि जित्न चाहन्छौं। फेरि च्याम्पियन बन्न चाहन्छौं। म भविष्यमा चेल्सीले प्राप्त गर्ने सफलताको हिस्सा बन्न चाहन्छु। म चेल्सीबाट थप उपाधि जित्न चाहन्छु,’ जर्मन प्रशिक्षक टुचेलले च्याम्पियन्स लिग जितेपछि भने।
उनले चेल्सीसँग सम्झौंता नविकरण हुनेमा पनि आफू आशावादी रहेको बताए। ‘शतप्रतिशत म ढुक्क त छैन। तर मलाई लाग्छ चेल्सीले सम्झौंता नविकरण गर्छ। मेरा एजेन्टले त्यही संकेत गरिसकेका छन्,’ उनले भने।
यस्तै, उनले चेल्सीका मालिक रोमन अब्राहिमोभिचसँग पनि कुरा गरिसकेको बताए।
‘खेलपछि म आफैँले पनि चेल्सी मालिक अब्राहिमोभिचसँग कुरा गरें। च्याम्पियन्स लिग जितेपछि भएको कुराकानी यसै पनि सकारात्मक हुन्छ। हामी फेरि कुरा गर्नेछौं,’ उनले भने।
अब क्लब नयाँ सिजनको तयारीमा लाग्ने पनि बताए। ‘यो सिजन हाम्रो चौथो स्थानमा रोकिएका थियौं। अब हामी नयाँ सिजनको तयारीमा लाग्नेछौं’ टुचेलले भने।
बोरुसिया डर्टमन्डका पूर्वप्रशिक्षक टुचेल गत डिसेम्बरमा पेरिस सेन्ट जर्मेन (पीएसजी) बाट बर्खास्तीमा परेका थिए। उनले गत सिजन पीएसजीलाई च्याम्पियन्स लिगको फाइनलमा पुर्याएका थिए। तर, फाइनलमा भने पीएसजी जर्मन क्लब बार्यन म्युनिखसँग पराजित भएको थियो।
त्यसपछि उनी चेल्सी आएका थिए। चेल्सी आएर आएको वर्षैमै उनले युरोपियन क्लब फुटबलको सर्वोच्च प्रतियोगिता च्याम्पियन्स लिग जिताएका छन्।
शुक्रबार बलियो म्यानचेस्टर सिटीलाई हराउँदै चेल्सीले दोस्रो पटक च्याम्पियन्स लिग जित्दा उनी मुख्य नायक बने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
