काठमाडौं- युरोपेली क्लब फुटबलको सबभन्दा लोकप्रिय र आकर्षक मानिने प्रतियोगिता, यूईएफए च्याम्पियन्स् लिगमा इङ्लिस प्रिमियर लिगका वर्चस्वको रहँदै आएको छ, पछिल्ला वर्षहरुमा।
पछिल्ला तीन वर्षमा दुई पटक फाइनलमा दुवै इङ्लिस क्लबबीच नै भेट भएको छ। दुई वर्षअगाडि २०१८/१९ मा लिभरपुल र टोटेनहमले फाइनल खेलेका थिए। यसपटक फाइनलमा दुई इङ्लिस टोली म्यानचेस्टर सिटी र चेल्सीबीच उपाधि भिडन्त हुँदैछ।
यी दुई प्रतिद्वन्द्वीबीचको खेल नेपाली समयानुसार शनिबार मध्यरात १२ः४५ बजे सुरु हुनेछ। पछिल्लो तीन सिजन पारम्परिक युरोपेली महाशक्ति क्लबहरूले धेरै राम्रो गर्न सकेका छैनन्।
ठूला खेलाडी भित्र्याउने होडले गर्दा दुई स्पेनी महारथी रियल मड्रिड र बार्सिलोना ऋणमा डुबेका छन्। यसका साथै प्रशिक्षक लामो समय टिक्न नसक्दा पनि प्रतियोगितामा असर पार्दै आएको छ।
यूईएफएको प्रतिवदेन हेर्ने हो भने विश्व फुटबल बजारमा ४३ प्रतिशत सरुवाको व्यापार इङ्लिस क्लबले नै धानेका छन्। इङ्लिस क्लबमा बिदेशी लगानीको ओइरो लाग्न थालेको छ।
पहिलो पटकमै उपाधि उचाल्ने लक्ष्यमा सिटी
झन्डै एक दशकदेखि इङ्लिस फुटबलमा आफूलाई महारथीको रूपमा स्थापित गरेको म्यान्चेस्टर सिटी पहिलोपटक यूरोपेली प्रतियोगिताको फाइनलमा पुगेको छ। सिटीका मालिक आबुधाबीका शेख मन्सुर बिन जायेद उल नहायान हुन्।
उनले स्पेनिस प्रशिक्षक पेप ग्वार्डिओलाको रणनीतिलाई क्लबमा लगानी गर्दै आएका छन् । ग्वार्डिओलाले बार्सिलोनाका लागि प्रशिक्षकका रुपमा दुई पल्ट च्याम्पियन्स लिग जिताइसकेका छन्।
उनको नेतृत्वमा सिटीले नयाँ खेलाडीमा सटिक लगानी गरेको छ। ग्वार्डिओला आएयता सिटीले उत्कृष्ट खेल प्रदर्शन गर्दै आएको छ।
ग्वार्डिओलाको प्रशिक्षणमा सिटीले यस सिजन च्याम्पियन्स लिगमा ११ खेल जितिसकेको छ। सिटीलाई रियलको कीर्तिमान बराबरी गर्ने अवसर पनि मिलेको छ। सन् २००१-०२ सिजनमा रियलले १२ जितको कीर्तिमान राखेको थियो। त्यसबेला रियलले १७ खेलमा यो कीर्तिमान हासिल गरेको थियो। सिटी भने १३ खेलमा नै जितको कीर्तिमान राख्ने संघारमा छ।
हुन त सिटीले पछिल्ला चार सिजनमध्ये तीनमा इङ्लिस प्रिमियर लिग जितेको छ। सिटी च्याम्पियन्स् लिग वा युरोपेली प्रतियोगिताको फाइनल पुग्ने नवौं इङ्लिस टोली पनि हो।
यो संख्या इटाली र जर्मनीका अन्य क्लबभन्दा ६-६ बढी हो। तर, च्याम्पियन्स लिग फाइनल खेल्ने पछिल्ला १० नयाँ टोलीमा एक पटक मात्र नयाँ टोलीले उपाधि उठाएको इतिहास छ।
२०००/२००१ को सिजन यता हेर्ने हो भने पहिलो पटक फाइनल पुगेका कुनै पनि टोलीले फाइनल जितेका छैनन्। यद्यपि, १९८२ मा इङ्लिस क्लब एस्टन भिल्ला र १९९७ मा जर्मन क्लब बोरुसिया डर्टमन्डले भने पहिलो फाइनलमै उपाधि उचालेका थिए।
गत सिजन फ्रान्सको पेरिस सेन्ट जर्मेन (पीएसजी) जर्मन क्लब बायर्न म्युनिखसँग पराजित भएको थियो भने त्यसअगाडि टोटेनहम फाइनलमा लिभरपुलसँग पराजित भएको थियो।
ग्वार्डिओलाको सिटीले बाजी मा¥यो भने १९९७ पछि पहिलो फाइनलमै उपाधि जित्ने पहिलो टोली बन्ने छ। ग्वार्डिओलासँग धेरै अवसर र उपाय छ। उनले पछिल्लो समय आफ्ना दुई प्रमुख खेलाडी अर्जेन्टिनी सर्जियो अगुइरो र ब्राजिली ग्याब्रियल जेससलाई समेत बेन्चमा राख्दै आएका छन्।
दायाँतर्फ विंगर भएर खेल्ने अल्जेरियाली रियाद महारेज उनका प्रमुख हतियार हुन्। उनले यो सिजन १४ गोल गरिसकेका छन्।
यस्तै, बायाँतर्फ खेल्ने फिल फोडेनले १६ गोल गरेका छन्। उनले १० गोलमा अवसर सिर्जना गरेका छन्। मध्यपंक्तिका जर्मन खेलाडी इकाई गुन्डुवान प्रभावशाली खेलाडी हुन्। उनले १७ गोल गरेका छन्। यस्तै, मिडफिल्डमै बेल्जियमका केभिन डी ब्रुयनले १८ गोलमा सहयोगी भूमिका खेलेका छन्।
तेस्रो पटक फाइनलमा चेल्सी
चेल्सीमा ब्याक टू ब्याक च्याम्पियन्स लिगको फाइनलमा पुर्याएका प्रशिक्षक थोमस टुचेल छन्। उनी मात्रै होइन, यही उपलब्धि हासिल गरेका कप्तान थियागो सिल्भा पनि टोलीमा रहेका छन्। यी दुईको नेतृत्वमा पछिल्लो सिजन पीएसजी फाइनलसम्म पुगेको थियो।
चेल्सीका मालिक, रुसी धनाढ्य रोमन अब्राहिमोभिच हुन्। अब्राहिमोभिचले क्लब प्रशिक्षकको रणनीति अनुसार चेल्सीमा लगानी गर्दै आएका छन्।
सिटी इङ्लिस लिगमा स्थापित हुँदैगर्दा चेल्सीले पहिलो पटक च्याम्पियन्स लिग जितिसकेको थियो। सिटीले पहिलो पटक इङ्लिस प्रिमियर लिग २०१२ मा जितेको थियो। सोही सिजन चेल्सीले च्याम्पियन्स लिग जितेको थियो।
सन् २००८ मा पहिलो पटक फाइनलमा पुगेको चेल्सी म्यानचेस्टर युनाइटेडसँग पेनाल्टी शूटआउटमा पराजित भएको थियो। त्यसको चार वर्षपछि जर्मन महारथी बायर्न म्युनिखलाई उसैको मैदानमा हराएर चेल्सीले पहिलो पटक च्याम्पियन्स लिगको उपाधि जितेको थियो।
चेल्सीको बलियो पक्ष भनेको डिफेन्स हो। सिल्भा आएपछि चेल्सीको डिफेन्स बलियो भएको छ। खासमा यी दुवै टिम गोल गर्न र अवसर सिर्जना गर्नमा माहिर छन्।
चेल्सीका इङ्लिस खेलाडी मेसन माउन्ट र उनका अमेरिकी साथी क्रिस्टियन पुलिसिक तीव्र गतिमा खेलाउन माहिर छन् । जर्मन टिमो वार्नर, काइ हाभेर्ट्ज पनि सिटीका लागि मुख्य चुनौती हुन सक्छन्।
पछिल्लो भेट यस्तो छ
चेल्सी र सिटी दुवैले यस सिजन च्याम्पियन्स लिगमा बलियो प्रदर्शन गरेका क्लब हुन्। दुवै टोलीले प्रतियोगिता अवधिभर जम्मा ४ गोल खाएका छन्।
सन् २००५/०६ यता दुवै टोलीले कम गोल खाएको यो पहिलो पटक हो। त्यसबेला फाइनलअघि आर्सनलले २ र बार्सिलोनाले ४ गोल खाएका थिए।
प्रिमियर लिगका प्रतिद्वन्दी यी दुई क्लबबीच यो सिजन भएका तीन भेटमा चेल्सीले दुई खेल जितेको छ। प्रिमियर लिगमा दुवै टोलीले अवे खेल जितेका थिए।
एफए कपको सेमिफाइनलमा चेल्सीले सिटीलाई पराजित गरेको थियो। तर, फाइनलमा चेलसी लेस्टर सिटीसँग पराजित भएको थियो।
अन्तिम-१६ मा स्पेनिस क्लब एट्लेटिको मड्रिडविरुद्ध समग्रमा ३-० को जित निकालेको चेल्सी त्यो जितसँगै क्वार्टरफाइनलमा पुगेको थियो।
क्वार्टरफाइनलमा पोर्टोविरुद्ध समग्रमा २-१ ले चेल्सी विजयी भएको थियो। प्रतियोगिताको सर्वाधिक सफल क्लब रियल मड्रिडलाई सेमिफाइनलमा समग्रमा ३-१ ले पराजित गर्दै चेल्सीले फाइनलमा स्थान बनाएको थियो।
त्यस्तै, अन्तिम-१६ मा बोरुसिया मोन्चेन्ग्लाडबाखविरुद्ध समग्रमा ४-० को जित निकालेको सिटी त्यो जितबाट क्वार्टरफाइनलमा पुगेको थियो।
क्वार्टरफाइनलमा सिटीले बोरुसिया डर्टमन्डविरुद्ध ४-२ को नतिजा हात पारेको थियो। त्यस्तै, सेमिफाइनलमा गत सिजनको उपविजेता पीएसजीलाई पाखा लगाउँदै सिटीले चेल्सीसँगको भेट सुनिश्चित गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
