काठमाडौं- दोस्रो पटक प्रशिक्षण सम्हालेका जिनेदिन जिदानले स्पेनिस क्लब रियल मड्रिड छाडेका छन्। लिग उपाधि नजिक पुगेर पनि बन्चित भएपछि फ्रान्सेली प्रशिक्षक जिदानले बिहीबार राजीनामा दिएका हुन्।
जिदानले १० दिन अगाडि मात्र स्पेनी मिडियासँग आफूले रियल छाड्न सक्ने संकेत गरेका थिए। उनको रियलसँग सन् २०२२ सम्मका लागि अनुबन्ध रहेको छ।
जिदान बाहिरिनु क्लबको लागि निराशाजनक हाे। यद्यपि, कीर्तिमान १३ पल्टको युरोपेली विजेता क्लबले याे सिजन उनकाे प्रशिक्षणमा राम्राे नतिजा निकाल्न सकेन। ला लिगामा प्रतिद्वन्दी एट्लेटिको मड्रिडभन्दा पछि रहँदै रियल दोस्रो भएको थियो।
यता, रियल च्याम्पियन्स लिग सेमिफाइनलमा चेल्सीसँग पराजित रहेको थियो।
जिदानले आफूले क्लब छाड्ने जानकारी क्लबका निर्देशक र टोलीका केही खेलाडीलाई यसअगाडि नै दिसकेका थिए।
यता, खेलाडी स्थानान्तरणबारे सूचना सार्वजनिक गर्ने फाब्रिजिओ रोमानोले पनि रियलले यस सिजन कुनै उपाधि जित्न नसकेपछि जिदानले क्लब छाडेकाे बताए।
अर्काे कुरा जिदान सुपर लिग ‘प्रोजेक्ट’सँग असन्तुष्ट रहेकाे बताइने गरिन्छ।
रियलका अध्यक्ष फ्लोरेन्टिनो पेरेज सुपर लिगबाट पछाडि हटेका छैनन्। यद्यपि, युरोपियन फुटबलको सर्वोच्च निकाय युइएफएले क्लबमाथि कारबाही शुरु गरिसकेकाे छ।
एक महिनासम्म चल्ने कारबाही प्रकृया पुरा भएपछि रियल अर्को सिजनको च्याम्पियन्स लिग वा दुई सिजनको घरेलु लिगबाट बाहिर रहने र ठूलो मात्रामा जरिवाना लाग्ने सम्भावना छ।
यस्तै युइएफएको स्वीकृतिविना कुनैपनि सदस्य क्लबले बाहिरको प्रतियोगिता खेल्न र स्थापना गर्न पनि नपाउने नियममा छ। युइएफएको नियम अनुसार कुनैपनि टिमले समानान्तर प्रकृतिको प्रतियोगिता खेल्न नपाउने उल्लेख छ।
यद्यपि, अध्यक्ष पेरेजले युइएफएकाे कदमकाे विराेध गर्दै आएका छन्। उनीले सुपर लिग ‘प्रोजेक्ट’बाट पछि हट्ने संकेत देखाएका छैनन्।
जिदान सन् २०१९ मा रियलका मुख्य प्रशिक्षक बनेका थिए। प्रशिक्षक सान्टीयागो सोलारीलाई बर्खास्त गर्दै रियलले जिदानलाई प्रशिक्षक नियुक्त गरेको थियो ।
त्यसअघि जिदानले २०१६ देखि १८ सम्म रियलको टिम हेरेका थिए। जिदानको नेतृत्वमा रियलले तीन च्याम्पियन्स लिग र दुई ला लिगा जितेको छ।
यस्तै उनले रियललाई दुई युएईएफए सुपर कप, दुई क्लब विश्वकप दुई स्पेनिस सुपर कप जिताएका छन्।
जिदानले छाडेपछि रियलको प्रशिक्षक को बन्छ भन्ने चर्चा पनि हुन थालिसकेको छ। यसअघि मासिमिलियानो अलेग्री जिदानले छाडेमा रियल आउने हल्ला थियो। रियलकै पूर्वकप्तान तथा रियल कास्टिलाका प्रशिक्षक राहुलको नाम पनि रियलको नयाँ प्रशिक्षकको रुपमा चर्चामा छ ।
यस्तै, इटालियन क्लब इन्टर मिलान छाडेका एन्टोनियो कोन्टे पनि अहिले खाली नै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766673313.png)
-1764146706.png)
-1766648928.png)
-1763721444.png)
