नेपालगन्ज– तेस्रो नेपालगन्ज गोल्डकप फुटबल प्रतियोगिता बाँकेको खजुरामा जेठ २१ देखि २८ सम्म हुने भएको छ।
नेपालगन्जदेखि करिब ८ किलोमिटर टाढा रहेको डिगाउँस्थित आदर्श आधारभूत विद्यालयको खेल मैदानमा हुन लागेको गोल्डकप प्रतियोगितामा त्रिभुवन आर्मी क्लब, एपिएफ, संकटा, च्यासल, सुदूर पश्चिम ११, रुपन्देही–११, घरेलु टिम नेपालगन्ज ११ र भारतको पञ्जाब टिम गरी ८ टिम सहभागी हुँदैछन्।
बाँके जिल्ला फुटबल संघले आयोजना गर्दै आएको पहिलो र दोस्रो गोल्डकप नेपालगन्ज रंगशालामा भए पनि आठौं राष्ट्रिय खेलकुदका लागि रंगशालाको मर्मत भइरहेकाले तेस्रो गोल्ड कप खजुरामा गर्न लागिएको हो।
नेपालगन्जमा अत्याधिक गर्मी भएका कारण प्रतियोगिता हरेक दिन साझ ५ बजेदेखि सुरु हुने आयोजक बाँके जिल्ला फुटबल संघका अध्यक्ष भोजराज शाहीले बताए।
करिब ७५ लाखको लागतमा हुन लागेको प्रतियोगितामा प्रथम हुने टिमलाई ५ लाख, द्वितीय हुने टिमलाई २ लाख ५१ हजार, म्यान अफ दि सिरिजलाई मोटरसाइकल र प्रत्येक खेलको म्यान अफ दि म्याचलाई एउटा मोबाइल सेट पुरस्कार दिइनेछ।
बाँकेको खजुरास्थित डाँफे स्पोट्र्स कल्बसँग सहकार्य गरेर संघले प्रतियोगिता आयोजना गर्न लागेको हो।
पहिलो पल्ट ए डिभिजन स्तरको फुटबल प्रतियोगिता खजुरामा आयोजना गर्न लागिएका कारण फुटबलप्रेमी खजुराबासीहरु उत्साहित भएका छन्।
स्थानीय फुटबलप्रेमी युबाहरुले खेल मैदानलाई व्यवस्थित र हरियाली बनाउन गर्मीको समेत पर्वाह नगरेर राति अबेरसम्म मिहिनेत गरिरहेका छन्।
यसअघि भएको पहिलो गोल्डकपमा सुदुर पश्चिम ११ र दोस्रो गोल्डकपमा रुपन्देही ११ ले उपाधि हात पारेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790596204.png)
-1790590624.png)
-1786602170.png)
