माधव नेपालसहित ११ जना ‘सांसद'लाई एमालेको साधारण सदस्य समेत नरहने गरी निष्कासन

राजनीति

नेपाल लाइभ सोमबार, जेठ १०, २०७८ १८:५४

काठमाडौं- नेकपा (एमाले)ले माधवकुमार नेपाल पक्षका ११ जना ‘सांसद’लाई पार्टीको साधारण सदस्य समेत नरहने गरी निष्कासन गरेको छ। सोमबार प्रधानमन्त्री निवास बालुवाटारमा बसेको एमालेको बैठकले यस्तो निर्णय गरेको हो।

उनीहरुलाई जेठ ८ गते बसेको स्थायी कमिटीको निर्णय अनुसार स्पष्टीकरण सोधिएको थियो। सोमबार बिहानसम्मको समय दिइएको भए पनि उनीहरुले जवाफ दिएका थिएनन्।

जवाफ नदिएपछि उनीहरुलाई पार्टीबाट निष्काशन गरिएको स्थायी कमिटी सदस्य मणि थापाले जानकारी दिए। बैठकमा पार्टी अध्यक्ष केपी शर्मा ओलीले उनीहरुलाई 'सिद्धान्तहीन लम्पसारवादी गुट' भन्दै आरोप लगाएका थिए।

जेठ ८ गतेको स्थायी कमिटी बैठकको निर्णय अनुसार माधव नेपाल पक्षका ११ जना सांसदलाई स्पष्टीकरण सोधिएको थियो। माधव नेपाल, झलनाथ खनाल, भीम रावल, मुकुन्द न्यौपाने, रामकुमारी झाँक्री, कल्याणी खड्का, पुष्पाकुमारी कर्ण कायस्थ, सरलाकुमारी यादव, लक्ष्मीकुमारी चौधरी, कालिला खान र नीरादेवी जैरुलाई स्पष्टीकरण सोधिएको हो। उनीहरुलाई सोमबार बिहानसम्मको समय दिइएको थियो।

उनीहरुलाई कांग्रेस सभापति शेरबहादुर देउवालाई प्रधानमन्त्री बनाउन हस्ताक्षर गरेको, राष्ट्रिय सभाको उपनिर्वाचनमा एमाले उम्मेदवार रामबहादुर थापा 'बादल'लाई हराउन भूमिका खेलेको, फ्लोर क्रस गरेको लगायतका विषयसँग जोड्दै स्पष्टीकरण सोधिएको थियो।

कांग्रेस सभापति शेरबहादुर देउवालाई प्रधानमन्त्री बनाउन एमालेका माधव नेपाल पक्षका २६ सांसदले हस्ताक्षर गरेका थिए।

तीमध्ये कतिपयले हस्ताक्षर गरेको छैन भनेका, कतिपयले नेपाललाई प्रधानमन्त्री बनाउने शर्तमा हस्ताक्षर गरेका र कतिपयले अगाडि बेग्लै प्रयोजनका लागि गरिएको हस्ताक्षर दुरुपयोग भयो भनेर भनेकाले अरुलाई स्पष्टीकरण नसोधिएको गत जेठ ८ गते एमाले प्रवक्ता प्रदीपकुमार ज्ञवालीले बताएका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

चीनको अन्तरिक्ष मिसनमा अर्को सफलता :'शेइयान-२७' उपग्रह प्रक्षेपण

नौ महिनामा रू तीन खर्ब ६६ अर्ब ऋण उठाइयो

एक लाख बढी पर्यटकले दर्शन गरे शालिग्राम सङ्ग्रहालय