काठमाडौं– नेपालका लागि पूर्वभारतीय राजदूत रञ्जित रेले भारतले नेपालमा संवैधानिक शासनको समर्थनमा सार्वजनिक रुपमा आफ्नो स्थिति स्पष्ट गर्न आवश्यक रहेको उल्लेख गरेका छन्।
भारतीय पत्रिका हिन्दूस्तान टाइम्समा एक लेख लेख्दै पूर्वराजदूत रेले प्रतिनिधि सभा विघटनपछि नेपालमा विकसित पछिल्लो राजनीतिक घटनाक्रमका बारेमा व्याख्या गर्दै भारतले सधै नेपालमा बहुदलीय लोकतन्त्र र परिवर्तनको समर्थन गरेको उल्लेख गरेका छन्। तर, पछिल्लो समय भारतले एक निरंकुश र अलोकप्रिय शासनको समर्थन गरिरहेको धारणा आम रुपमा बनिरहेको उनले लेखेका छन्।
प्रधानमन्त्री केपी शर्मा ओलीका आलोचक महन्थ ठाकुर र राजेन्द्र महतो आश्चर्यजनक रुपमा उनको पक्षमा लागेको भन्दै त्यसलाई भारतसँग जोडेर मानिसहरुले धारणा बनाइरहेको उनको भनाइ छ।
‘जनता समाजवादी पार्टी (जसपा)को महन्थ ठाकुर र राजेन्द्र महतोको नेतृत्वले आश्चर्यजनक रुपमा केपी ओली सरकारलाई दिएको समर्थनसँग मानिसहरुले भारतलाई जोडिरहेका छन् जुन पक्ष ओलीको कटु आलोचक र संविधान जारी गर्ने बेलामा विरोधमा थियो र उक्त गुट पारम्परिक रुपमा भारतसँग नजिक रहेको छ’, उनले लेखेका छन्।
पूर्वराजदूत रेले नेपालका राजनीतिक दल र नेतासँग सम्बन्ध राख्नुपर्ने उल्लेख गर्दै ओलीको विरोधमा सहभागी भएकाहरुलाई भारतले पक्षपातपूर्ण देख्न नहुने उल्लेख गरेका छन्।
रेले नेपालमा स्थिर राजनीति भारतको हितमा रहेको उल्लेख गरेका छन्। अस्थिरताले नेपाललाई बाहिरी प्रभावहरुमा कमजोर पार्ने उनको धारणा छ।
भारतले प्रतिवद्धता गरेको कोभिड–१९ खोपको आपूर्तिबाट पछि हटेको देखिएको र चीनले त्यसतर्फ कदम अघि बढाइरहेको उनको धारणा छ।
उनले नेपालमा महामारी उग्र अवस्थामा रहेकोले चुनाव निर्धारित समयमा हुनेमा प्रश्न उब्जिएको भन्दै चुनाव भए स्थिति समान्य हुने आशा गर्न सकिने भएपनि विपक्षी दलले प्रधानमन्त्री र राष्ट्रपतिको असंवैधानिक कदमविरुद्ध राजनीतिक र कानूनी लडाइँको घोषणा गरेकाले उनीहरु चुनावमा भाग लिन अनिच्छुक बन्न सक्ने उल्लेख गरेका छन्।त्यहीकारण उनले नेपाल संवैधानिक संकटउन्मुख भएको आफ्नो लेखमा उल्लेख गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
