काठमाडाैं- फुटबलका प्राय: लिगमा शीर्षस्थानमा रहनकाे लागि रोमाञ्चक भिडन्त हुने गर्छ। तर, यसपटक इंग्लिस प्रिमियर लिगमा भने त्याे राेमाञ्चकता देख्न पाइएन।
गत मंगलबार राति भएको खेलमा दोस्रो स्थानको म्यानचेस्टर युनाइटेड लेस्टर सिटीसँग पराजित भएसँगै १० अंकको अग्रता बनाएको म्यान्चेस्टर सिटीले तीन खेल अगावै उपाधि उचाल्याे।
लिगमा ३५ खेल खेलेको सिटीको ८० अंक बनाउँदा उसकाे आसपास काेही पुग्नै सकेनन्। दोस्रो स्थानको युनाइटेडको ७० अंक हुँदै सिटीले उपाधि हात पारिसकेकाे थियाे।
अहिलेसम्म च्याम्पियन्स लिगका लागि सिटी र युनाइटेडले मात्र स्थान सुरक्षित गरेका छन्।
तर, प्रिमियर लिगकाे शीर्ष चारमा रहन रोमाञ्चक भिडन्त हुँदैछ। युनाइटेडले दोस्रो स्थानमाथि पकड बनाएसँगै तेस्रो र चौथो स्थानका लागि तीन क्लबबीच प्रतिस्पर्धा चलिरहेको छ।
प्रिमियर लिगमा सबै टिमले एक-एक खेल खेल्न बाँकी छ। यी बाँकी खेलहरु आज (आइतबार) हुँदैछन्। आज हुने सम्पूर्ण खेलहरू नेपाली समय अनुसार ८:४५ मा सुरु हुनेछ।
आजको खेलले अर्काे सिजन च्याम्पियन्स लिग फुटबल खेल्ने टोलीको टुङ्गो लाग्नेछ। जसका लागि लेस्टर सिटी, चेल्सी र लिभरपुल दावेदार छन्।
चेल्सीले एस्टन भिल्लाको सामना गर्दैछ। भिल्लालाई हराए चेल्सी स्वतः तेस्रो स्थानमा रहँदै च्याम्पियन्स लिगका लागि छनाेट हुनेछ। यता, आजै लिभरपुलले क्रिस्टल प्यालेससँग खेल्दैछ भने लेस्टर सिटी र टोटनहमसँग भिड्दै छ।
लिभरपुल र लेस्टरको नतिजाले भने चेल्सीलाई फरक पर्ने छैन।
तर, भिल्लासँग बराबरीमा रोकिए वा हार ब्यहोरे चेल्सीको शीर्ष चारमा पर्ने लक्ष्य लिभरपुल र लेस्टरको नतिजामा भर पर्नेछ। लिभरपुल वा लेस्टरले आफ्नो खेलमा अंक गुमाए वा पराजय ब्यहोरे चेल्सी शीर्ष चारमा पर्नेछ।
यदि चेल्सी पराजित अथवा लिभरपुल र लेस्टरले बराबरी खेले भने गोल भिन्नताका आधारमा तेस्रो र चौथो स्थानमा पर्ने टिमको निर्क्यौल हुनेछ।
बर्नलीलाई ३-० पराजित गरेपछि लिभरपुल चौथौ स्थानमा उक्लेको थियाे। लिभरपुलकाे ३७ खेलबाट ६६ अंक छ। सामान अंक पनि गोल अन्तरका आधारमा लेस्टर पाँचौ स्थानमा छ। तेस्रो स्थानमा रहेको चेल्सीको ६७ अंक छ।
यता, दाेस्राे स्थानमा रहेकाे युनाइटेडकाे ७१ अंक रहेकाे छ।
यद्यपि, शीर्ष चारमा नपरे पनि चेल्सीको च्याम्पियन्स लिगमा पर्ने सम्भावना जिवितै रहनेछ। तर, त्यसका लागि आउँदो मे २९ मा सिटीविरुद्धको च्याम्पियन्स लिग फाइनल चेल्सीले जित्नुपर्नेछ।
शनिबारको एफ ए कपकाे फाइनलमा हारे चेल्सीकाे मनमा उपविजेतामा चित्त बुझाउनुपरेकाे घाउँकाे पीडा अझै ताजै छ। उक्त खेलमा हारेकाे चेल्सीलाई लेस्टर सिटीविरुद्ध बदला लिने माैका मिलेकाे छ।
यदि आज चेल्सीले भिल्लालाई हराए त्याे बदला पुरा हुनेछ। लेस्टरले युरोपा लिगको बाटो खोलिसकेको छ । अंक तालिकाको पाँचौ र छैटौं स्थानमा रहने दुवै टिमले युरोपा लिग खेल्न योग्य हुनेछन् ।
सबैभन्दा महत्त्वपूर्ण कुरा भिल्ला पार्कको लागि अन्तिम दिन यात्रा चेल्सीकाे लागि त्यति धेरै डरलाग्दो छैन। तर, ११औं स्थानमा रहेकाे भिल्लाले कडा टक्कर भने दिन सक्छ।
यता, युरोपा लिगका लागि पनि वेस्ट ह्याम युनाइटेड, टोटेनहम र एभर्टनबीच प्रतिस्पर्धा छ । अर्को सिजनदेखि सुरु हुने युरोपा कन्फ्रेन्स लिगका लागि आर्सनल र लिड्स युनाइटेड दौडमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
