सुर्खेत– विनोद भण्डारीको कप्तानीमा रहेको त्रिभुव आर्मी क्लबले कर्णाली प्रिमियर लिग (केपीएल) को उपाधिक नजिक पुगेको छ। आज भएको दोस्रो सेमिफाइनलमा धनगढी क्रिकेट एकेडेमीलाई ८ विकेटले पराजित गर्दै आर्मीले उपाधिका लागि शक्ति गौचनको कप्तानीमा रहेको रुपन्देही–११ सँगको भेट पक्का गरेको हो।
टस जितेर पहिलो ब्याटिंग गरेको धनगढीले निर्धारित २० ओभरमा ८ विकेट गुमाएर एक सय ३१ रन जोड्यो। उसका लागि कप्तान भुवन कार्कीले सर्वाधिक ४४ रन बनाए। त्यस्तै सन्जु धामीले २३, दिपेन्द्र थापाले २१ र रोमन बमले १६ रनको योगदान दिए। बलिङतर्फ सागर पुन र चन्द्र सावदले २–२ तथा जितेन्द्र मुखिया, सुशन भारी र हरीकृष्ण झाले १–१ विकेट लिन सफल भए।
एक सय ३२ रनको लक्ष्य आर्मीले १७ ओभरमा मात्र २ विकेट गुमाएर पूरा गर्यो। उसका लागि नरेश बुढाऐरले अविजित ६३ र राजु रिजालले २८ रनको योगदान दिए। त्यस्तै ओपनर सागर पुनले १४ र अनिल मण्डलले १३ रन बनाएका थिए। बलिंगतर्फ धनगढीका भुवन कार्की र नारायण जोशीले १–१ विकेट लिए ।
आजै भएको पहिलो खेलमा मध्यपश्चिम क्रिकेट क्लबलाई पराजित गर्दै रुपन्देही–११ फाइनल प्रवेश गरेको थियो। फाइनल खेल भोलि शनिबार विहान ८ बजेदेखि सुर्खेत रंगशालामा हुनेछ ।
बन्धुविकास सहकारी संस्थाको आयोजनामा सञ्चालन भइरहेको प्रतियोगिताको विजेताले तीन लाख र उपविजेताले एक लाख ५० हजार नगदसहित ट्रफी प्राप्त गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
