काठमाडौं- नेपालमा कोरियन ड्रामाका फ्यान धेरै छन्। विशेषगरी युवा पुस्तालाई कोरियन ड्रामाले आकर्षित गरेको पाइन्छ। स्कूल तथा कलेजका विद्यार्थीहरू यस्ता ड्रामाका ‘डाइहार्ट फ्यान’ हुने गरेका छन्।
झनै अघिल्लो वर्ष ओस्कार अवार्ड कोरियन फिल्म ‘प्यारासाइट’ले जितेपछि फिल्म र सिरिजप्रेमीको नजर कोरियनतिर सरेकोे छ। त्यहाँ बनेका उत्कृष्ट फिल्म छानीछानी हेर्ने जमात पछिल्लो समय निकै बढेका छन्।
यदि तपाईं पनि कोरियन ड्रामाको फ्यान हुनुहुन्छ भने छुटाउनै नहुने ड्रामा छ, नभिलेरा। नभिलेरा भनेको कोरियन भाषामा बूढो नर्तक हो। यो ड्रामालाई नेटफ्लिक्समा ‘लाइक द बटरफ्लाई’ नामबाट पनि खोज्न सकिन्छ।
कथावस्तु
७० वर्षका वृद्ध छन्, सिम देओक चुल। चुलका परिवारमा श्रीमती, दुई छोरा, जेठी बुहारी, एक नातिनी र छोरी ज्वाइँ छन्। चुलको ७०औं जन्मदिनमा भेट भएका उनीहरू एकआपसमा झगडा मात्रै गर्छन्।
चुलको परिवार उनको रिटायर्ड जिन्दगी रमाइलोसँग बिताओस् भन्ने चाहन्छ। त्यसैले छोराछोरी आफ्ना बाबुआमा हाइकिङ जाओस् र प्रकृतिसँग रमाओस् भन्ने चाहन्छन्। तर, वृद्ध चुलको सपना भने बेग्लै छ। उनी उड्न चाहन्छन्, सेतो राजहाँस जस्तै। मर्नुअघि उनलाई स्टेजमा ब्यालेट डान्स गर्नुछ। त्यसैले उनी डान्स स्टुडियोको वरपर चक्कर लगाउँछन् र हिम्मत गरेर आफूलाई ब्यालेट डान्स सिकाउन
आग्रह गर्छन्।
ड्रामाका नायक छन्, २३ वर्षीय सुन्दर युवक ली चाइ रोक। उनलाई ब्यालेट डान्स भगवानले दिएको उपहार हो। जब उनी ब्यालेट गर्न थाल्छन्, उनको सुन्दरता र नृत्यको लचकतामा सबैको होस गुम्छ।
चाइकी आमा बितेकी हुन्छिन्। बाबु किम ताई हुन पनि विद्यार्थीलाई पिटेको आरोपमा जेल गएको हुन्छ। ऊ जिन्दगीमा एक्लो हुन्छ।
चाई रोक जिद्दी स्वभावको हुन्छ। ब्यालेट डान्स गर्दा उनको खुट्टा मर्किन्छ तर पनि ऊ पेनकिलर खाएर नाँच्छ।
चाइ रोकका कोच छन्, सेओङ जो। उनी कुनै बेलाका चर्चित ब्यालेट डान्सर हुन् तर युवावस्थाको जिद्दीपनाले उनी स्टेजमा कहिल्यै जान सक्दैनन्। त्यसैले आफ्नो सपना पूरा गर्न सेओङ जोले चाइ रोकलाई रोजेको हुन्छ।
चाइ रोक पनि आफूजस्तै जिद्दी स्वभावको देखेर उसलाई ठीक बनाउन सेओङ जोले ७० वर्षीय वृद्ध चुललाई ब्यालेट डान्स सिकाउने जिम्मा चाइ रोकलाई दिन्छ।
चाइ रोकले सीधै इन्कार गर्छ तर सेओङले आफ्नो निजी स्टुडियोमा निःशुल्क ब्यालेट नसिकाउने धम्की दिएपछि ऊ वृद्ध चुललाई ब्यालेट डान्स सिकाउन बाध्य हुन्छ।
७० वर्षीय चुल र २३ वर्षीय युवक चाइ रोकको सहकार्यले कस्तो रूप लिन्छ होला? ७० वर्षीय चुल स्टेजमा ब्यालेट गर्न सक्ला या नसक्ला? चुललाई परिवारले सपोर्ट गर्ला या नगर्ला? यी सबैको उत्तर थाहा पाउन तपाईंले नभिलारा हेर्नुपर्ने हुन्छ। ड्रामा १२ एपिसोडको छ।
बूढेशकालको मनोविज्ञान
ड्रामामा बूढेशकालमा मानिसले भोग्ने गरेका विषयवस्तुलाई देखाइएको छ। कोरिया र नेपालका धेरै कुराहरू मिल्छ। जस्तो कि, छोरीज्वाइँले बाबुआमा हेर्न हुँदैन, छोरोले बाबुआमाको जिम्मा बूढेसकालमा लिनुपर्छ, बाबुआमाले दुःख पाए समाजले छोरालाई के भन्लान्, छोरी बुहारी भनेका कार्यालयको काम गर्ने हैन, घरधन्दा गर्ने हुन् आदि, इत्यादि।
यी र यस्ता कुरा कोरियाली समाजमा पनि चल्ने रहेछ भन्ने कुरा ड्रामा हेर्दा अनुभूति हुन्छ।
ड्रामा हेर्दा छोराछोरीले माया गरेर बाबुआमालाई भनेका कतिपय कुराहरूले उनीहरूको चित्त दुख्दो रहेछ। उदाहरणका लागि चुलका जेठा छोरा उनको ब्यालेट डान्सप्रति पूर्णरूपमा असहमत हुन्छन्। बाबुलाई चोट लाग्ला, लडेर शरीर दुख्ला भनेर असहमत भएका हुन्। तर छोराको असहमतिमा बाबुलाई शरीरमा लागेको चोटभन्दा धेरै दुख्छ।
वृद्ध चुलको अर्को पनि समस्या हुन्छ, अल्जाइमर्स। उनी भुल्ने बिमारीको शिकार बनेका हुन्छन्। सबै कुरा बिर्संदा पनि ब्यालेट डान्स भने उनको दिमागमा रहिरहन्छ।
ड्रामा निकै ‘इमोसनल’ छ। वृद्ध चुल खुसी हुँदा दर्शक खुसी हुन्छन्, दुःखी हुँदा सँगै रून्छन्। धेरैले आफ्ना घरमा भएका वृद्ध अभिभावक सम्झन्छन्, त कतिले आफू बूढो भएपछि कस्तो होला भन्ने अनुभूति गर्छन्।
ड्रामामा चुलको हिम्मत बयान गरिसाध्य छैन। उनी धेरैपटक असफल हुन्छन् तर ब्यालेट छाड्दैनन्। एक्लै हुँदा रून्छन् तर अरूको अगाडि सधैं खुसी देखिन्छन्।
ड्रामामा बूढेशकालको एक्लोपनाले कति पिरोल्छ भन्ने कुरा पनि देखाइएको छ। साथै, एउटा युवकको साथले वृद्धमा आएको हिम्मत पनि।
वृद्ध मानिस र भर्खरका युवाको मित्रता पनि गज्जबसँग चित्रण गरिएको छ। उनीहरू सँगै नुहाउँछन्, एउटै भाँडाबाट निकालेर खान्छन्, उस्तै लुगा लगाउँछन्। एउटा दृश्यले उनीहरूको मित्रता कतिसम्म घनिष्ठ रहेछ भनेर देखाएको छ। उक्त दृश्यमा चुलले ब्यालेट डान्स गर्दा लगाउने अन्डरवेयर ल्याउन भुलेको हुन्छ। चाइ रोकले मसँग दुईवटा छ, एउटा लगाऊ भनेर दिन्छ। वृद्ध चुलले अन्डरवेयर नाकनेर पुर्याउँछ र राम्रोसँग धोएको त छस्? भनेर प्रश्न गर्छ। चाइ रोकले हल्का रिसाएको जसरी हेर्छ र राम्रोसँग धोएको छु, फिर्ता गर्दा सफा गरेर दे भन्छ।
कोरियन ड्रामामा सामाजिक कथा खोज्नेहरूका लागि नभिलेरा गज्जब छ। यदि तपाईं नृत्य मन पराउनुहुन्छ र एउटा सुन्दर ड्रामाको खोजीमा हुनुहुन्छ भने नभिलेरा हेर्नुस्, समय खेर गएजस्तो पक्कै लाग्ने छैन।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1736655415.png)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
