बुधबार स्वाब दिँदै सांसद महन्थ ठाकुर।
काठमाडाैं- प्रतिनिधि सभाको विशेष अधिवेशन वैशाख २७ गते शुरु हुँदै छ। संविधानको धारा १०० अनुसार विश्वासको मत लिनका लागि सरकारको सिफारिसमा राष्ट्रपति विद्यादेवी भण्डारीले वैशाख २७ गतेका लागि अधिवेशन बोलाएकी हुन्।
हिउँदे अधिवेशन समाप्त भएको दुई सातामै प्रधानमन्त्री केपी शर्मा ओलीले विश्वासको मत लिन लागेका छन्। प्रधानमन्त्री ओलीले विघटन गरेकाे प्रतिनिधि सभा सर्वोच्च अदालतले फागुन ११ गते पुन:स्थापना गरेको थियो ।
सर्वोच्चको फैसलापछि फागुन २३ गतेदेखि संसदको हिउँदे अधिवेशन शुरु भएको थियो । उक्त अधिवेशनमा सरकारले कुनै पनि विजनेश नदिँदा शोक प्रस्ताव पारित गर्ने कार्यमा सीमित हुँदै समाप्त भएको थियो। अब बर्खे अधिवेशन बोलाउनुपर्ने समय भएको अवस्थामा सरकारको सिफारिसमा विशेष अधिवेशन बोलाइएको छ।
जेठ १५ गते बजेट ल्याउनुपर्ने संवैधानिक व्यवस्था अनुसार प्रि-बजेट छलफल शुरु गर्नुपर्ने समयमा सरकारले विश्वासको मत लिन लागेको छ। राष्ट्रपतिबाट अधिवेशन आह्वान भएपछि संसद् सचिवालयले बैठकको तयारी थालेको छ । संसद् सचिवालयले बुधवारदेखि बैठकको तयारीका लागि सांसदहरुको कोरोना परीक्षण शुरु गरेको छ। बुधबार र बिहीबार सांसद, संसद् सचिवालयका कर्मचारी र अन्यको पीसीआर परीक्षणपछि संक्रमण भएका र नभएकाहरु अलग गर्नेछ।
सचिवालयका अनुसार प्रतिनिधि सभाका सभामुख, राष्ट्रिय सभाका अध्यक्षसहित सबै सांसद र सचिवालयका कर्मचारीको स्वाब संकलन गरिएको छ। पीसीआर परीक्षणको नतिजाअनुसार केही सांसदकाे रिपाेर्ट पाेजिटिभ आएकाे छ।
हालसम्म १३ जना सांसदलाई कोरोना पुष्टि भएको छ। थप सांसदलाई कोरोना देखिएमा यो संख्या थप हुनेछ। हालसम्म पूर्वप्रधानमन्त्री एवं सांसद झलनाथ खनाल, मन्त्री भानुभक्त ढकाल, जुली महतो, टोपबहादुर रायमाझी, लेखराज भट्ट, र मणि थापालाई कोरोना पुष्टि भएको छ। यीमध्ये थापा सांसद छैनन् तर उनी मन्त्रीको हैसियतमा संसद् जान पाउने थिए।
त्यस्तै, सांसदहरु खिमलाल भट्टराई, किसान श्रेष्ठ, सुरेश कुमार राई र पुष्पा कुमारी कर्णलाई पनि कोरोना संक्रमण भएपछि आइसोलेनमा छन्। बुधबार गरिएको पीसीआर परीक्षणमा थप चार जना सांसदमा कोरोना संक्रमण पुष्टी भएको छ। सबै सांसदले कोरोनाविरुद्धको खोपको पहिलो डोज लगाइसकेका छन्। कोरोनाविरुद्धको खोपको पहिलो डोज लगाएका उनीहरुमा कोरोना देखिएको हो।
प्रतिनिधि सभामा नेकपा (एमाले)का १२१, कांग्रेसका ६३, माओवादी केन्द्रका ४९, जनता समाजवादी पार्टीका ३४, नेपाल मजदुर किसान पार्टी, राष्ट्रिय जनमोर्चा, राष्ट्रिय प्रजातन्त्र पार्टी र स्वतन्त्र सांसद १–१ जना गरी २७१ सांसद छन्। कांग्रेसका २ जना र जनता समाजवादी पार्टीका २ जना निलम्बनमा परेका छन्।
२७५ सदस्यीय प्रतिनिधि सभामा केपी शर्मा ओलीले प्रधानमन्त्री पदमा कायम रहन १३६ सांसदको समर्थन पाउनुपर्ने छ। बुधबार संसद् सचिवालयले ६ सय जनाको स्वाव संकलन गरेको थियो। यसको रिर्पोट आज आउने संसद सचिवलयका प्रवक्ता रोजनाथ पाण्डेले बताए। बाँकीको आज पनि स्वाब संकलन हुँदैछ।
कोरोना पोजिटिभ भएका सांसदले मत दिन पाउँछन कि पाउँदैनन्?
संसद् सचिवालयले कोरोना पोजिटिभ देखिएका सांसदलाई विश्वासको मत लिने प्रक्रियामा भाग लिन दिने कि नदिनेबारे अहिलेसम्म केही निर्णय गरेको छैन। सचिवालयका प्रवक्ता पाण्डेका अनुसार सचिवालय र सभामुख अग्नि सापकोटाले के गर्ने भन्ने बारेमा छलफल गरिरहेको उनले बताए ।
प्रस्तावको पक्ष या विपक्षमा मत दिन पाउने/नपाउने निर्णय गर्न दलहरुसँग पनि परामर्श गर्नुपर्ने भएकाले सभामुख सापकोटाले कार्यव्यवस्था परामर्शको बैठक र त्यसअघि पनि दलहरुसँग अनौपचारिक/औपचारिक छलफल गरिरहेको उनले बताए।
‘अहिलेसम्म मत दिन पाउने या नपाउने भन्ने कुनै निर्णय भएको छैन,’ पाण्डेले भने, ‘दलहरुले जसरी गर्ने सहमति जुटाउँछन् त्यही अनुसार सचिवालयले व्यवस्था मिलाउँछ।’
गण्डकी प्रदेशमा यसअघि यस्तै भएको थियो । गण्डकी प्रदेशका मुख्यमन्त्री पृथ्वीसुब्बा गुरुङविरुद्धको अविश्वासको छलफल नै यही कारण भद्रगोल भएको थियो । यो प्रक्रियामा बीचमै एक सांसद हराएपछि प्रदेश सभा बैठक नै अनिश्चितकालका लागि स्थगित भएको छ भने मुख्यमन्त्री आफैं कोरोना संक्रमित भएर बसेका छन्।
सम्बन्धित समाचार :
लक्ष्मणलाल कर्णसहित चार सांसदलाई कोरोना संक्रमण
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
