काठमाडाैं- युइएफए च्याम्पियन्स लिगको दोस्रो सेमिफाइनलको दोस्रो लेगमा आज (बुधबार) राति इंग्लिस क्लब चेल्सी र स्पेनिस क्लब रियल मड्रिडबीच खेल हुँदैछ।
चेल्सीको मैदान स्टामफोर्ड ब्रिजमा हुने खेल नेपाली समयअनुसार राति १२ः४५ बजे हुनेछ।
यी दुई क्लबबीच भएकाे पहिलाे लेग १-१ गोलको बराबरीमा सकिएकाे थियाे। त्यसैले यी दुईलाई आज जित्न निकाल्न नै पर्नेछ। आज जित निकाल्ने मध्ये एक टाेली २९ मेमा टर्कीको इस्तानवुलमा हुने फाइनलमा इंग्लिस क्लब म्यानचेस्टर सिटीसँग भिड्ने छ।
सिटीले साविकको उपविजेता फ्रान्सेली क्लब पेरिस सेन्ट जर्मेन (पीएसजी) लाई समग्रमा ४-१ ले पराजित गर्दै क्लबको ५१ वर्षपछि पहिलोपटक युरोपको फाइनलमा स्थान बनाएको छ।
त्यसैले उपाधिकाे रक्षा गर्न दुबै टाेली गर वा मरकाे स्थितिमा रहेका छन्। यद्यपि, आजकाे खेलमा चेल्सीलाई अवे गोल र घरेलु मैदानको फाइदा हुनेछ। गोलरहित बराबरीको नतिजा वा हारले रियलको यात्रा सेमिफाइनलमा टुंगिनेछ।
चेल्सी ९ वर्षपछि पहिलोपटक फाइनलमा पुग्ने दाउमा
चेल्सी ९ वर्षपछि पहिलाेपल्ट च्याम्पियन्स लिगकाे सेमिफाइनलमा पुगेकाे छ।
सन् २०११-१२ को च्याम्पियन चेल्सीले त्यसबेला जर्मन क्लब बायर्न म्युनिखलाई हराएको थियो। त्यसपछि चेल्सीले २०१३-१४ को सिजनमा सेमिफाइनलको यात्रा तय गर्दा त्यसपछि प्रि-क्वाटरफाइनलभन्दा अघि बढ्न सकेको थिएन।
चेल्सीका क्रिस्टियन पुलिसिस, काइ हाभर्टज, टिमो वेर्नर, बेन चिलवेल, जर्गिन्हो, एङ्गोलो कान्टे, सिजर एज्पिलिक्वेटा र एन्टेनियो रुडिगर उच्च लयमा रहेका छन्।
यता, आन्द्रेस क्रिस्टेन्सेन, रिस जेम्स, कोर्ट जोउमा, हाकिम जियाच, ट्याम्मी अब्राहम, मार्काेस अलन्सो र ओलिभर जिरुउड, थियागो सिल्भा र गोलरक्षक इडुआर्ड मेन्डी पनि लयमै देखिएका छन्।
यद्यपि, चोटका कारण मासन माउन्ट र माटियो कोभोसिसले खेल्ने सम्भावना न्यून छ।
चेल्सीका प्रशिक्षक थोमस टुचेलले च्याम्पियन्स लिगमा रियललाई हराउने हो भने खेलाडीहरूले आफूलाई विश्वास गर्नुपर्ने बताउँछन्।
'हामीले महसुस गरेका थियौं कि हामी अझ शक्तिशाली हुन सक्छौं। चुनौती भनेको सम्पूर्ण खेलमा तीव्रता राख्नु हो,' उनले भने,' यो सेमीफाइनल हो, दबाब छ, एक नकआउट खेलमा आफूमाथि विश्वास राख्न आवश्यक छ। हामीसँग रियल जस्ता टोलीविरूद्ध कुनै अवसर हुनेछैन।'
उनले आफ्नाे एकमात्रै लक्ष्य भनेकाे उपाधि जित्नु रहेकाे बताउँछन्।
'च्याम्पियन्स लिग जित्नु नै एक मात्र लक्ष्य हो। विश्वास छ हाम्राे जितको ग्यारेन्टी छ,' उनले भने।
इतिहास रच्दै रियल
सर्वाधिक १३ पटकको च्याम्पियन रियल पछिल्लो दुई सिजन प्रि-क्वाटरफाइनलबाट अघि बढ्न सकेको थिएन।
२०१८-१९ मा डच क्लब आयाक्स र २०१९-२० मा सिटीसँग पराजित हुँदै प्रि-रियल क्वाटरफाइनलबाट बाहिरिएको थियो।
त्यसैले पहिलो लेगमा अवे गोलमा पछि परेको च्याम्पियन्स लिगको सर्वाधिक सफल टोली रियल घरेलु टोली चेल्सीलाई हराउँदै फाइनल पुगेर इतिहास रच्ने दाउमा रहेकाे छ।
फाइनल पुग्न रियललाई कम्तीमा पनि १-० को जितको खाँचो छ।
करिम बेन्जेमा, भिनिसियस जुनियर, मार्काे एसेन्सियो, लुका मोड्रिच, टोनी क्रुस, क्यासमिरो, इडर मिलिसाओ र रोड्रिगो गोएस यस सिजन लयमा देखिएका छन्। यस्तै, नाचो फर्नान्डेस र गोलरक्षक थिवाउट कोर्टुवा पनि लयमा देखिएका छन्।
रियलका तीन खेलाडी फर्किए
घाइते भएर मैदान बाहिर रहेका रियलका कप्तान सर्जियो रामोस र इडेन हाजार्ड टाेलीमा फर्किएका छन्। यस्तै काेराेना संक्रमणपछि मैदान बाहिर रहेका फेडे भाल्भेर्डे पनि टाेलीमा फर्किँदै छन्।
यद्यपि रियलले चोटका कारण राफायल भरान, ड्यानी कार्भाहल र लुकास भास्क्वेज गुमाएकाे छ।
'हाम्रो कप्तान टाेलिमा फर्किएका छन्। यसको मतलब उनी खेल्न तयार छन्,'प्रशिक्षक जिनेदिन जिदानले भने।
यी दुई टोलीको पछिल्लो तीन भेटमा रियल दुई खेलमा विजयी भएको छ। एक खेल बराबरीमा सकिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
