काठमाडौं– सरकारले मधेश आन्दोलन लगायतसँग सम्बन्धित१२० जना प्रतिवादीविरुद्धका १५ मुद्दा फिर्ता लिने निर्णय गरेपछि जनता समाजवादी पार्टी (जसपा)का नेताहरुले त्यसलाई 'सकारात्मक भएको' प्रतिक्रिया दिएका छन्।
मन्त्रिपरिषद बैठकले १५ वटा मुद्धामा प्रतिवादी बनाइएका १२० जनाको मुद्धा फिर्ता लिने निर्णय गरेपछि जसपाले ‘श्री गणेश’ भएको टिप्पणी गरेको छ।
जसपाका वरिष्ठ नेता राजेन्द्र महताले शेरबहादुर देउवा र पुष्पकमल दाहाल (प्रचण्ड)ले समेत पूरा नगरेका माग ओलीले पूरा गरेको भन्दै खुसी व्यक्त गरे।
‘हामीले आफ्ना माग पूरा गराउन देउवाजीलाई गुहार्यौं पूरा भएन, प्रचण्डजीलाई गुहार्यौं पूरा भएन। केपीजीले थोरै माग पूरा गरेर भएपनि श्री गणेश गर्नुभएको छ,’ महतोले भने, ‘जसपाले राखेका अरु मागका विषयमा ओलीजीले कसरी सम्बोधन गर्नुहुन्छ त्यसैअनुसार पार्टीले निर्णय गरेर अघि बढ्छ। जसपाका सबै माग पूरा नहुँदासम्म जसपा आफ्नो मुद्धामा अडिग हुन्छ।’
जसपाले रेशम चौधरीको मुद्दा अदालती प्रक्रियाबाट टुङ्गिनु पर्ने, लाल आयोगको प्रतिवेदन सार्वजनिक हुनुपर्ने, संविधान संशोधन टेबुल हुनुपर्ने र नागरिकतासम्बन्धी विधेकलाई अगाडि बढाउनु पर्ने माग राखेको छ। अब सरकारले जसपाका सबै माग सम्बोधन गर्ने संकेत देखाए मात्रै ‘मुभ’ हुने उसको भनाई छ।
अहिले जसपाका अध्यक्ष रहेका तत्कालीन समाजवादी पार्टीका नेता उपेन्द्र यादव २ बुँदे सम्झौता गरी सरकारमा गएपनि केही नभएको बताउँदै महतोले बल्ल प्रक्रिया अघि बढेको प्रतिक्रिया दिए। कांग्रेस, माओवादी लगायत दलहरुले संयुक्त सरकारको प्रक्रिया अघि बढाए जसपालाई कुनै टाउको दुखाइ नहुने महतोको भनाइ छ। ‘जसपाका लागि सबै बाटोहरु खुला छन्। पार्टीले जुन निर्णय लिन्छ त्यही नै आधिकारिक हुन्छ। त्यसैअनुसार पार्टी अगाडि बढ्छ,’ महतोले भने, ‘हाम्रो माग पूरा गर्ने सरकारलाई जहिल्यै समर्थन हुन्छ, यो वा त्यो व्यक्ति भन्ने छैन।’
जसपाका अर्का नेता नवराज सुवेदी भने सरकारले जसपाका केही मुद्धा सम्बोधन गरेर आफ्नो गल्ती ढाकछोप गर्ने प्रयास मात्रै गरेको टिप्पणी गरे। प्रधानमन्त्री ओलीले प्रतिगमन गरेको भन्दै आफूहरु आन्दोलनमा गएकाले उनको बहिर्गमन नै पहिलो सर्त भएको सुवेदीको भनाइ छ ।
संयुक्त सरकारका विषयमा जसपा एक ढिक्का भएकाले पार्टीमा कुनै समस्या नहुने सुवेदीले दाबी गरे। ‘अबको केही दिनभित्र अविश्वास प्रस्ताव दर्ता हुन्छ। अविश्वास प्रस्ताव दर्ता हुनैपर्छ। दर्ता गरेपछि अंकगणित पुग्दै जान्छ,’ सुवेदीले भने, ‘त्यसपछि जसपामा निरन्तर अविश्वासको प्रस्तावमा मत बढ्दै जान्छ।’
तर, जसपामा ओली सरकारलाई समर्थन गर्ने वा नगर्ने विषयमा स्पष्ट दुई धार छ। महन्थ ठाकुर, राजेन्द्र महतो ओली सरकारबाटै आफ्ना माग सम्बोधन गराउने पक्षमा छन्। ठाकुर–महतो ओली सरकार संकटमा परेकाले त्यसबाट आफ्ना माग सम्बोधन गराउने मनस्थितिमा छन्। त्यसपछि मात्रै ओली सरकारमा जाने वा नजाने भन्ने विषयमा पार्टी कमिटीमा निर्णय गरेर जानुपर्ने उनीहरुको भनाइ छ ।
जसपाकै उपेन्द्र यादव, बाबुराम भट्टराई, राजेन्द्र श्रेष्ठ लगायत नेताहरु ओलीसँग सम्वाद नै गर्न नहुने पक्षमा छन्। ओलीले संसद विघटन गरेपछि प्रतिगमनविरुद्धको आन्दोलनमा लागेर प्रतिनिधि सभा पुनस्र्थापना भएपछि पनि फेरि उनीसँगै माग सम्बोधन गराइपाउँ भन्न नमिल्ने उनीहरुको तर्क छ। यसअघि सरकारमा हुँदा आफूलाई अपमानपूर्वक मन्त्री पदबाट सरुवा गर्नुका साथै निरन्तर असहयोग गरेकाले यादव ओलीसँग निकै रुस्ट छन्।
पार्टी एक नहुँदा नहुँदै जसपाको ठाकुर र महतो पक्षले ओलीपक्षका नेताहरुसँग माग सम्बोधन गर्ने विषयमा निरन्तर छलफल चलाइरहेको छ।
जसपाको ठाकुर–महतो पक्षबाट लक्ष्मणलाल कर्ण र सर्वेन्द्रनाथ शुक्ल तथा सरकारी पक्षबाट अर्थमन्त्री विष्णु पौडेल तथा नेकपा एमालेका स्थायी कमिटी सदस्य सुवास नेम्वाङ र प्रधानमन्त्रीका परराष्ट्र सल्लाहकार राजन भट्टराईबीच जसपाले उठाएका मागका विषयमा छलफल हुँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
