काठमाडाैं- युइएफए च्याम्पियन्स लिग फुटबलअन्तर्गत सेमिफाइनलको पहिलो लेगमा आज इंग्लिस क्लब चेल्सीले स्पेनिस क्लब रियल मड्रिडसँग प्रतिस्पर्धा गर्दैछ। रियलको अस्थाई मैदान, स्पेनको अल्फ्रेडो डी स्टेफानोमा हुने खेल नेपाली समय अनुसार राति १२ः४५ बजे शुरु हुनेछ।
च्याम्पियन्स लिगको सर्वाधिक सफल टिम रियल घरेलु मैदानमा जित निकाल्दै फाइनलको नजिक पुग्न चाहन्छ।
तर, रियललाई चेल्सीविरुद्ध जित निकाल्न त्यति सहज भने हुनेछैन। रियल र चेल्सीबीच यो चौंथो भेट हो। यसअघिका तीन भेटमा चेल्सीले २ जित निकाल्दा एक खेल बराबरी भएको थियो।
२०१६ जुनमा च्याम्पियन्स कपमा रियल ३-२ ले विजयी भएकाे थियाे। त्यसअघि २०१३ को च्याम्पियन्स कपमा रियल ३–१ ले विजयी भएको थियो।
रियल सोही जितलाई निरन्तरता दिने लक्ष्यमा रहँदा चेल्सी रियललाई स्तब्ध पार्दै फाइनल नजिक पुग्न चाहन्छ।
चेल्सीविरुद्ध प्रमुख हतियार हाजार्ड
चेल्सीविरुद्ध रियलका विंगर इडेन हाजार्ड खेल्ने भएका छन्। चेल्सीका पूर्वस्टार हाजार्ड चोटमुक्त भएर मैदान फर्किसकेका छन्।
बेल्जियम विंगर हाजार्ड सन् २०१९ मा ८९ मिलियन पाउण्डमा चेल्सी छाडेर रियल गएका थिए। तर, उनले चोट बोकेपछि रियलमा लय समात्न सकेका छैनन्। उनी अधिकांश समय मैदान बाहिर रहे। हाजार्डले रियलका लागि हालसम्म ४ गोल मात्रै गरेका छन्।
चेल्सीका प्रशिक्षक थोमस टुचेलले हाजार्ड रियलका लागि प्रमुख हतियार बन्नसक्ने बताएका छन्। हाजार्ड एक उत्कृष्ट खेलाडी भएको भन्दै आफूले कमजोर नआँकेको उनले बताए।
‘हाजार्ड एक उत्कृष्ट खेलाडी हुन्, उनी यस क्लबका एक प्रमुख खेलाडीसमेत थिए। हामी उनीप्रति सदैव सम्मान गर्छौं। उनको क्षमता हामीलाई थाहा छ। उनलाई मार्क गरेर खेल्छौं,’ उनले भने।
हाजार्ड लामो समय मैदान बाहिर थिए। उनी यसै हप्ता रियल बेटिससँगको खेलमा मैदानमा फर्किएका हुन्। ७७औं मिनेटमा मैदान प्रवेश गरेपनि उनले गोल गर्न भने सकेनन्। उक्त खेल गोलरहित बराबरीमा सकिएको थियो।
तर, अहिले हाजार्ड मैदान फर्किन तमतयार रहेकाे रियलका प्रशिक्षक जिनेदिन जिदानले बताएका छन्।
‘उनी ठीक छन्। उनले यसभन्दा अगाडि खेलेको खेलमा सहज महसुस गरेका थिए। त्यो सबैभन्दा महत्वपूर्ण कुरा हो। अब उनी तयार छन्। हामी खुसी छौं, उनी हाम्रा लागि खेल्नेछन्,’ जिदानले भने।
यद्यपि, युरोपियन सुपर लिगमा भाग लिने सम्झाैता गरेसँगै युइएफएले च्याम्पियन्स लिगको अन्तिम चारबाटै निस्काशित गर्ने धम्की दिएको थियो। सो चेतावनीपश्चात चेल्सीले आफ्नो नाम फिर्ता लिएको छ भने रियलले लिएको छैन। तर, आफूले सुपर लिग खेल्ने निर्णय गरेर गल्ती नगरेको टुचेल बताउँछन्।
‘यस बिषयलाई राजनीतिक प्रभावको रुपमा लिने हो भने हामी यो खेल खेल्न लायक छैनौं। तर, प्रदर्शनको हिसाबले हेर्ने हो भने हामी सेमिफाइनलमा प्रवेश पाउन योग्य थियौं। हामी लामो यात्रामा आएका छौं, रियाल मड्रिडजस्तै,’ उनले भने।
यता, च्याम्पियन्स लिगले आत्मियता बनाएको भन्दै यसबाट क्लबलाई बाहिर राख्ने निर्णय गलत भएको बताउँछन् जिदान। ‘हामी च्याम्पियन्स लिगमा हुन सक्दैनौं भनेर सोच्नु मूर्खता हो,’ उनले भने।
चोटले पिरोलेको टोली
चोटले दुवै क्लबलाई पिरोलेको छ। दुवै क्लबका मुख्य हतियार मैदान बाहिर रहेका छन्। त्यसैले खेल कस्ताे हुने हाे अहिले नै आकलन लगाउन सकिँदैन।
रियलका लेफ ब्याक फरल्याण्ड मेण्डी घाइते छन्। उनी जिदानका भरपर्दा खेलाडी हुन्। यता, कप्तान सर्जियो रामोस पनि चोट र कोरोना संक्रमणको कारण यस खेलमा उपलब्ध हुने छैनन्। यता, चाेटकै कारण लुकास भास्क्वेज पनि टोली छैनन् भने कोरोना संक्रमणका कारण मिडफिल्डर फेडे भाल्भेर्डेले पनि खेल गुमाउने छन्।
तर, रियलका लागि एक सुखद् खबर छ, त्यो हो– मिडफिल्डर टोनी क्रुज चोटपछि मैदान फर्किएका छन्।
यता, चोटले चेल्सीलाई पनि उत्तिकै पिरोलेको छ। उसका मिडफिल्डर माटेओ कोवाटिच घाइते छन्। उनको मांशपेशीमा चोट लागेको छ।
‘उनीहरु हामीमाथि निर्भर रहनु दिगो होइन। खेलाडी आफैं बन्नुपर्छ। उनीहरु आफैंले खेल खेल्नुपर्छ। हाम्रो काम भनेको आत्मविश्वास बढाउन हौसला दिने मात्रै हो। चुनौती आफैंमा ठूलो पाठ हो, त्यो सिक्नुपर्छ,’ टुचेलले भने।
यता, टोलीका दुई खेलाडी नभएपनि खेलमा केही कमी नहुने बताउँछन् जिदान। ‘हामीसँग पूर्ण टोली छ। चुनौती छ। तर, डटेर लाग्ने छौं,’ उनले भने। तर, चेल्सीलाई कमजोर टिमका रुपमा नलिएको उनले बताए।
‘मलाई लाग्दैन चेल्सी कमजोर छ। उसको पूर्ण टिम लयमा छ, उनीहरूले आक्रमण गर्छन् र राम्रोसँग डिफेन्ड गर्छन्,’ उनले भने।
रियल : करिम बेन्जेमा, इडेन हाजार्ड, भिनिसियस जुनियर, रोड्री, मार्काे एसेन्सियो, लुका मोड्रिच, क्यासमिरो, राफयल भरान, इडर मिलिसाओ, नाचो फर्नान्डेज, ड्यानी कार्भाहल, इस्को, मार्सेलो, अल्भारो ओर्डिजोला, एन्टेनियो ब्लान्को र गोलरक्षक थिवाउट कोर्टुवा।
चेल्सी : टिमो वेर्नर, काइ हाभर्टज, क्रिस्टियन पुलिसिस, मासन माउन्ट, बेन चिलवेल, जर्गिन्हो, एङ्गोलो कान्टे, सिसर एज्पिलिक्वेटा, एन्टेनियो रुडिगर, थियागो सिल्भा, एन्ड्रिएस क्रिस्टेन्सेन र गोलरक्षक इडुआर्ड मेन्डी।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
