बादलको ठाउँमा निर्वाचन गर्न १ करोड ६१ लाख खर्च लाग्ने

राजनीति

नेपाल लाइभ मंगलबार, वैशाख १४, २०७८ २०:४७

काठमाडौं– जेठ ६ गते हुन लागेको राष्ट्रिय सभाको उपनिर्वाचनका लागि निर्वाचन आयोगले १ करोड ६१ लाख ३० हजार रुपैयाँ बराबरको बजेट अनुमान गरेको छ। आयोगले मंगलबार विज्ञप्ति प्रकाशित गर्दै अनुमानिक बजेट सार्वजनिक गरेको हो।

‘निर्वाचन आयोगले २०७८ जेठ ६ गते सम्पन्न हुने राष्ट्रिय सभा सदस्यको उपनिर्वाचन सञ्चालनका लागि आर्थिक व्यवस्थापन सम्बन्धमा राष्ट्रिय सभा सदस्य उपनिर्वाचन सञ्चालन आर्थिक कार्यविधि, २०७८ तयार गरेको छ। उक्त कार्यविधि अनुसार निर्वाचन सञ्चालन तथा व्यवस्थापनका लागि जम्मा रू १ करोड ६१ लाख ३० हजार बजेट अनुमान गरिएको छ’, आयोगका प्रवक्ता राजकुमार श्रेष्ठद्वारा जारी विज्ञप्तिमा भनिएको छ।

निर्वाचन आयोग ऐन, २०७३ को दफा २७ र २८ अनुसार उक्त कार्यविधिमा सहमति र अनुमानित बजेट निकासाका लागि नेपाल सरकार, अर्थ मन्त्रालयमा लेखी पठाउन आयोगबाट निर्णय भएको हुँदा सो अनुसार नेपाल सरकार अर्थ मन्त्रालयमा पत्राचार समेत भएको आयोगले जनाएको छ।

माओवादी केन्द्रबाट निर्वाचित राष्ट्रिय सभाका सदस्य रामबहादुर थापा बादल एमाले प्रवेश गरेपछि उनको पद गुमेको थियो। बागमती प्रदेशबाट अन्य समूह अन्तर्गत निर्वाचित उनको स्थानमा जेठ ६ गते निर्वाचन हुन लागेको हो। पद रिक्त भएको ३५ दिनभित्र निर्वाचन गरिसक्नुपर्ने प्रावधान छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

धरहरा चढ्न विद्यार्थी, ज्येष्ठ नागरिक र अपांगता भएका व्यक्तिलाई ५० प्रतिशत छुट

मानव बेचबिखन गर्न लागेको आरोपमा एक जना पक्राउ

लामिछानेसहित १० जनाविरूद्ध चितवन जिल्ला अदालतबाट पक्राउ पुर्जी जारी