काठमाडौं- लुम्बिनी प्रदेशका मुख्यमन्त्री शंकर पोखरेलविरुद्ध अविश्वास प्रस्ताव दर्ता भएपछि नयाँ मुख्यमन्त्रीको रूपमा कुलप्रसाद केसी ‘सोनाम’लाई प्रस्ताव गरिएको छ। हाल आन्तरिक मामिला तथा कानुनमन्त्री रहेका केसी माओवादी केन्द्रका केन्द्रीय सदस्य हुन्।
नेपाली कांग्रेस र माओवादी केन्द्रबीच गण्डकीमा कांग्रेस र लुम्बिनीमा माओवादीलाई मुख्यमन्त्री दिने सहमति भए बमोजिम प्रक्रिया अघि बढेको हो। यसअघि निर्वाचनमा केसीलाई भावी मुख्यमन्त्रीको रूपमा हेरेरै प्रदेश सभा निर्वाचनमा पठाइएको थियो। तत्कालीन एमाले-माओवादी भागबण्डामा मुख्यमन्त्री एमालेलाई परेपछि पोखरेलले मुख्यमन्त्री हुने मौका पाएका थिए।
को हुन् केसी?
केसी विसं २०२८ साल माघ १० गते रोल्पाको रोल्पा नगरपालिका–६ जिबाङमा जन्मेका थिए। २०४६ सालदेखि विद्यार्थी राजनीतिमा जोडिएका केसी २०४८ सालमा शिक्षक जागिर शुरु गरेपछि शिक्षक संगठनमा लागेर सक्रिय भए। २०४८ सालदेखि २०५० सालसम्म प्राथमिकतहको स्थायी शिक्षक भएका केसी शिक्षकको जागिर जोडेर माओवादी सशस्त्र युद्धमा भूमिगत भएका थिए।
तत्कालीन माओवादीले २०५२ साल फागुन १ गतेदेखि शुरु गरेको ‘जनयुद्ध’मा सहभागी हुने निर्णय गरेपछि केसी समेत भूमिगत भएका थिए। भूमिगत कालमा केसी दाङ, प्युठान र सल्यान जिल्लाको सेक्रेटरी भई जिम्मेवारी सम्हालेका थिए। नेकपा माओवादीको २०५७ सालमा भएको दोस्रो राष्ट्रिय सम्मेलनबाट केन्द्रीय सदस्यमा निर्वाचित भएका उनी २०६० सालमा उपत्यका ब्यूरो इन्चार्ज भएका थिए।
भारतको पटना पुगेका बेला २०६० साल जेठ १० गते गिरफ्तार परेका उनी शान्ति सम्झौता भएपछि मात्रै रिहा भएका थिए। जनमुक्ति सेनाका तेस्रो डिभिजन कमिसार भएका केसी सेना समायोजनका बेला महत्वपूर्ण भूमिका निर्वाह गरेका थिए।
एकीकृत पार्टीमा पोलिटब्यूरो सदस्यसँगै योङ कम्युनिस्ट लिग (वाईसीएल) इन्चार्जको जिम्मेवारीमा थिए। तत्कालीन एकीकृत माओवादी २०६९ सालमा विभाजन भएपछि केसी मोहन वैद्य नेतृत्वको माओवादीमा सहभागी भएका थिए। दोस्रो संविधान सभा निर्वाचन बहिस्कार गरेका केसी २०७३ साल रामबहादुर थापा‘बादल’पक्षसँगै एकतामा आएका थिए।
यसअघि निर्वाचनमा रोल्पाबाट प्रतिनिधि सभामा वर्षमान पुन निर्वाचित भएका थिए भने प्रदेश सभा-१ बाट उनी निर्वाचित भएका थिए। माओवादीमा सबैभन्दा कम अवसर पाउने नेतामा केसी पर्छन्।
रोल्पाका समकालीन नेता कृष्णबहादुर महरा बाहेक अन्य नेताहरूमा केसी सिनियर नेतामा पर्छन्। माओवादी विभाजन हुँदा वैद्यसँग लागेकाले राजकीय भूमिकामा उनले कम अवसर पाए। रोल्पाको पश्चिमी क्षेत्र माओवादी पकड बलियो बनाउन उनको महत्वपूर्ण योग्दान रहेको माओवादी नेताहरू चर्चा गर्छन्।।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1764146706.png)
