काठमाडौं– युरेनियम–२३८ (युरेनियम कच्चा पदार्थ)सहित पक्राउ परेका चार जना मध्ये १ जना धरौटीमा रिहा भएका छन् भने ३ जना पुर्पक्षका लागि कारागार चलान भएका छन्।
जिल्ला अदालत काठमाडौंले बिहीबार सिन्धुलीको सुनकोशी–४ का २० वर्षीय मनोज न्यौपानेलाई २ लाख धरौटीमा रिहा गर्ने आदेश दिएको हो। उनी धरौटी बुझाएर रिहा भएको महानगरीय प्रहरी परिसर काठमाडौंका एसएसपी अशोक सिंहले जानकारी दिए ।
बाँकी तीन जना रामेछाप लिखु तामाकोशी–५ बस्ने ४० वर्षीय नारायणसिंह तामाङ, काठमाडौं बौद्ध बस्ने रामेछाप लिखु तामाकोशी–५ घर भएकी ४० वर्षीया जानुका तामाङ र मन्थली नगरपालिका–४ का २० वर्षीय प्रकाश चौहानलाई भने पुर्पक्षका लागि कारागार पठाउने आदेश अदालतले दिएको छ।
जानुकालाई केन्द्रीय कारागार सुन्धारा पठाइएको छ भने बाँकी २ जना सदरखोर डिल्लीबजार पठाइएको छ। महानगरीय प्रहरी कार्यालय रानिपोखरीको विशेष टोलीले गत फागनु २८ गते साढे २ किलो युरेनियम–२३८ सहित ४ जनालाई पक्राउ गरेको थियो। प्रहरीले बरामद गरेको युरेनियम २० वर्षअघि नेपाल भित्रिएको अनुसन्धानबाट खुलेको थियो।
भारतको एक खानीमा काम गर्ने अमर लामा भन्ने व्यक्तिले २० वर्षअघि उक्त युरेनियम ल्याएको प्रहरीको भनाइ छ। लामा हाल अमेरिकामा छन्। बरामद भएको युरेनियम लामाकी बुहारी जानुकासँग थियो। आफ्नो विवाह हुनुभन्दा अघि नै उक्त पदार्थ घरमा भएको जानुकाले बयानमा बताएकी छिन्। आफूलाई युरेनियम हो भन्ने थाहा नभएको तर, ससुराले पुरानो वस्तु हो घरमा राख्दा राम्रो हुन्छ भनेपछि राखेको उनको बयान छ।
राष्ट्रिय विधि विज्ञान प्रयोगशाला (नास्ट)मा जाँच गर्दा प्रहरीले बरामद गरेको पदार्थ अप्रशोधित युरेनियम (युरेनियम–२३८) भएको रिपोर्ट आएको थियो। त्यसपछि थप जाँचका लागि चीन पठाउँदा पनि अप्रशोधित युरेनियम भएको रिपोर्ट आएको थियो ।
बरामद पदार्थ युरेनियम भएको पुष्टि भएपछि रेडियोधर्मी पदार्थ (उपयोग तथा नियमन) ऐन, २०७७ अन्तर्गतको कसूरमा मुद्दा दर्ता गरिएको थियो ।
याे पनि पढ्नुहाेस् :
काठमाडौंमा २० वर्षदेखि लुकाइएको थियो युरेनियम, कहाँबाट आयो, कहाँ थियो गन्तव्य?
युरेनियम बरामद घटना : अनुसन्धान सकेर फाइल सरकारी वकिल कार्यालयमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
